• Ministeriu Planu Finansas lansa IV Avaliasaun PEFA (Public Expenditure and Financial Accountability) iha Timor-Leste.

Home » Announcements » Ministeriu Planu Finansas lansa IV Avaliasaun PEFA (Public Expenditure and Financial Accountability) iha Timor-Leste. Print Page

Ministeriu Planu Finansas lansa IV Avaliasaun PEFA (Public Expenditure and Financial Accountability) iha Timor-Leste.

20180410_Ministeriu Planu Finansas lansa IV Avaliasaun PEFA-Final review by pbpeo VM 2

Ministériu Planu no Finansas hamutuk ho Banku Mundiál realiza workshop sobre avaliasaun PEFA iha salaun Auditorium Xanana Gusmão, MPF iha loron 5 fulan Abril 2018.

Lansamentu ofisiál workshop ne’e prezidi husi Vice-Ministra, Sara Lobo Brites no akompaña husi Simon Le Grand, Xefe Delegasaun Uniaun Europeia ho David Knight, Reprezentante husi Banku Mundiál.

Partisipantes iha workshop ne’e hamutuk 70 pessoas ne’ebé konta ho prezensa Dirijentes husi Liñas Ministeriais, Diretores Ministériu Planu no Finansas, Ajênsia Autónomas, Banku Sentrál no reprezentantes husi Parseirus Dezenvolvimentu sira hanesan European Union (EU), National Authorization Office (NAO), Banku Mundial ho ekipa tékniku PEFA. Ema ne’ebé partisipa ba Workshop tomak sei simu sertifikasaun asina husi Vise-Ministra no formadór.

Iha Vise-Ministra ninia intervensaun hateten katak, “avaliasaun PEFA ne’e importante no utíl tebes tamba PEFA proporsiona framework ida atu avalia no identifika pontus fortes no pontus frakus iha ita nia Sistema Jestaun Finansas Públika (JFP). Avaliasaun PEFA dahuluk akontese iha tinan 2007, tuir fali iha tinan 2010 no ikus iha tinan 2013. Rezultadu husi avaliasaun sira iha passadu, kontribui ona mai ita hodi halo ona reforma lubuk ida mai iha ita nia sistema Jestaun Finansas Públikas, ita bele hare’e ona ninia impaktu positivu hosi reforma ne’e rasik iha área síkulu orsamentál nian ne’ebé atinji tiha ona”.

Hare’e ba importânsia husi avaliasaun ne’ e, Vise-Ministra mos apela ba partisipante hotu-hotu atu aproveita didiak formasaun durante loron rua ne’e hodi partisipa ho aktivu, nune’e bele hetan informasaun no koñesimentu klean oinsá halo avaliasaun PEFA hodi bele kontinua halo monitorizasaun atu fortalese no melhora diak liu tan JFP liu-liu iha area planeamentu no orsamentasaun, relatóriu finanseiru, aprovizionamentu, kontrolu internu, jestaun ba dívida públika, arekadasaun reseitas tributárias/ laos-tributárias ho forma efisiênsia no efikásia.

Iha sorin seluk Xefe Delegasaun Uniaun Europeia, Simon Le Grand expresa katak nia antusiasmu tebes ho avaliasaun PEFA foun ida ne’e, no nia fó hanoin katak Uniaun Europeia iha komprimisu atu uja country-system atu fornese asistensia. Nia salienta mós katak PEFA sei fó mensajen ekselente kona-ba komprimisu bo’ot ba Governu hodi haforsa ita nia Jestaun Finansas Públika rasik.

Alêm de ne’e Reprezentante husi Banku Mundiál, David Knight mós hateten katak sira kontenti tebes ho misaun ida ne’e, no repetisaun ne’ebé misaun ne’e sei halo hamutuk ho Governu Timor-Leste, tamba Governu Timor-Leste mak hanesan na’in ba prosesu ne’ e rasik.

Workshop ne’e ho modelu treinamentu atu partisipantes sira bele aprende no prátika metodolojia PEFA nian hodi fo valór (Scoring) ba pilares, dimensaun no indikadór sira atu wainhira tékniku PEFA nia misaun tuir mai sei halo konsulta diretamente iha Liña Ministériu, Ajensia Autónomas hodi rekolha dadus hafoin sei analiza no produz relatório no rekomendasoens ho baze ba rezultadu avaliasaun.

Avalisaun PEFA 2018 simu apoiu finanseiru no tekniku husi Banku Mundiál, Millenium Corporation Challenge (MCC) no European Union.