• Ministeriu Planu no Finansas Anunsia Lansamentu Interligasaun GRP no R-TiMOR (STP).

Home » Anúnsiu » Ministeriu Planu no Finansas Anunsia Lansamentu Interligasaun GRP no R-TiMOR (STP). Imprime pájina

Ministeriu Planu no Finansas Anunsia Lansamentu Interligasaun GRP no R-TiMOR (STP).

Ministériu Planu no Finansas finalmente anunsia ligasaun Sistema Integradu Informasaun Jestaun Finanseira, Planeamentu Rekursus Governu nian (IFMISU-GRP) ho BSTL nia sistema transferénsia automátiku naran “Rede Transferénsia iha Momentu Real” ka R-TiMOR.

Ministériu Planu no Finansas no FreeBalance hahu ho projetu STP (Straight Through Processing) iha fulan Agostu 2014, ho objetivu prinsipal atu liga úniku sistema informasaun jestaun finanseira governu nian ho BSTL nia sistema pagamentu. Diskusaun inisial kona-ba ligasaun GRP no R-TiMOR akontese iha tinan refere, ne’ebé reprezentatnte sira husi MF, BSTL, FreeBalance no Montran partisipa. Ligasaun GRP-R-TiMOR nia faze ba dahuluk (ho avizu pagamentu elektróniku ne’ebé seguru no semi-automátiku – SEPA haruka ba BSTL) hahu iha fulan Maiu 2015 no funsiona ho susesu to’o foin daudauk, iha fulan Janeiru 2018.

Ministru Planu no Finansas, Rui A. Gomes no Governador Banku Sentral Timor-Leste, Abrão de Vasconselos, konvida RDTL nia funsionariu nível as hotu, inklui ministru, vise-ministru no CEO sira husi banku komersial lokal sira iha Timor-Leste, hanesan Banku Austrália-Nova Zelandia (ANZ), Banku Mandiri, Banku Nasional Komérsiu Timor-Leste (BNSTL), Banku Rakyat Indonésia (BRI) no Kaixa Jerál Depozitus (BNU / KJD) no parte interesadu sira seluk ne’ebé relevante ba serimónia lansamentu ofisial kona-ba ligasaun GRP-R-TiMOR (STP), ne’ebé realiza iha loron 8 Fevereiu 2018, iha Sala Konferensia Torre MPF nian. Eventu refere lansa husi Primeiru Ministru RDTL, Marí Bim Amude Alkatiri.

Iha loron 6 Fevereiru 2018, lote inisial ne’ebé kompostu husi tranzasaun 29 maka konjuntu pagamentu elektróniku totalmente automátiku ba dahuluk ne’ebé prosesa ho susesu husi sistema GRP MF nian ba sistema R-TiMOR BSTL nian iha tempu real hanesan parte Faze ba dahuluk ligasaun ida ne’e nian ho tranzasaun pagamentu fornesedor lokal no internasional sira nian. Implementasaun Faze ba daruak, ne’ebe inklui Surat Pagamentu no Rekonsiliasaun Bankaria. Ikus liu mak, implementasaun Faze ba datolu ne’ebé sei konsentra iha prosesu ligasaun ho Reseita liuhosi R-TiMOR ne’ebé MPF no BSTL diskute daudauk.

Solusaun husi FreeBalance Planeamentu Rekursus Governu (GRP) nian ba governu sentral fornese previzibilidade no kontrolu kona-ba ezekusaun orsamentu, finansas públikas ne’ebé sólidu no estabilidade fiskál bo’ot liu husi transparénsia no responsabilidade ida ne’ebé diak liu. FreeBalance® nia Accountability Suite maka solusaun GRP ida ne’ebé automatiza siklu tomak jestaun orsamentu nian, inklui orsamentu ne’ebe bazeia ba polítika, kuadru despezas prazu médio (MTEF), transferénsia orsamentu, prioridade despezas, jestaun rekursus esternus, kontas projetus espesial sira nian no desentralizasaun fiskál.

Iha parte seluk, sistema R-TiMOR maka sistema pagamentu elektróniku ida modernu no automátiku ne’ebé BSTL mak opera no liga ho banku komersial hotu-hotu iha Timor-Leste liuhosi rede dadus interbankáriu privadu ne’ebé seguru maka’as hodi permite pagamentus iha forma fásil, efisiente no seguru iha tempu real husi selu nain ba benefisáriu, liuhosi kontas Likidasaun husi banku respetivu iha BSTL. R-TiMOR maka pasu dezenvolvimentu ba dahuluk ba futuru sistema pagamentu nasionál no sei garante ba sidadaun timoroan hotu-hotu, la konsidera nia lokalizasaun ka situasaun finanseira, asesu ba servisu finanseiru modernu ne’ebé asesivel.

Prosesa pagamentu husi GRP ba R-TiMOR, ne’ebé transfere osan entre konta partisipante sira nian ne’ebé rai iha sistema laran. MPF no BSTL asegura katak liña ministériu, ajénsia públika autonoma no munisípiu sira sei simu osan iha sira nia konta lalais liu no bai-bain iha loron hanesan bainhira haruka pagamentu elektróniku. Agora daudauk, banku lokal komersial lima maka partisipante diretu R-TiMOR nian no MPF nudar partisipante indiretu.

Relevansia prestasaun servisu bankáriu tradisional iha ajénsia real sira hamenus ba beibeik iha mundu atual finanseiru, ne’ebé teknolojia permite introduz modelu korrespondénsia bankaria bainhira eskola, instalasaun komersial, klínika médika ka igreja rasik bele asume papel pagamentu finanseiru no báziku, hamutuk ho banku no instalasaun finanseira sira ne’ebé iha lisensa, tuir BSTL.
Lansamentu ofisial ligasaun GRP-R-TiMOR (STP) Ministériu Planu no Finansas ho BSTL marka pasu eselente no ho susesu ida ba Governu Timor-Leste no ba nasaun tomak ne’ebé kontinua apoia ninia esforsu kona-ba reforma fiskál husi transparénsia no responsabilidade ida ne’ebé diak liu.

FIM