• Ministériu Planu no Finansas Komemora Loron Proklamasaun Independensia Ba Dala 42 hamutuk ho Povu Aileu.

Home » Announcements » Ministériu Planu no Finansas Komemora Loron Proklamasaun Independensia Ba Dala 42 hamutuk ho Povu Aileu. Print Page

Ministériu Planu no Finansas Komemora Loron Proklamasaun Independensia Ba Dala 42 hamutuk ho Povu Aileu.

Seremonia 28 Novembru iha Aileu - Final

Ministru Planu no Finansas, Rui A. Gomes sai inspetor seremonia isar bandeira komemorasaun loron aniversariu proklamasaun independensia ba dala hat nulu resin rua iha Munisípiu Aileu, 28 Novembru 2017.

Iha ninia diskursu Ministru Planu no Finansas, Rui A. Gomes hateten katak nu’udár nasionalista ita hakarak garantia bei-beik independensia no respeitu ba dignidade atu halakon kiak no hari Timor-Leste ida ne’ebé forti no ho moris diak liutan.

“Hau hakru’uk dala ida tan ba memória maluk sira hotu nian ne’ebé fó an ba mate iha Timor-Leste tomak hodi tane ita nia luta ba identidade no liberdade ba ita nia pátria”, katak Ministru Planu no Finansas, Rui A. Gomes.

Durante komemorasaun loron proklamasaun independensia ba dala 42 ida ne’e, Ministru Planu no Finansas, Rui A. Gomes le’e mós leitura Proklamasaun Independensia Repúblika Demokrátika de Timor-Leste (RDTL) 28 Novembru 1975.

Antes atu hakotu ninia diskursu, Ministru Planu no Finansas hato’o mos katak sasukat ida ba independensia nia susesu no mós ba maturidade polítika ukun nain no povu nian maka susesu ne’ebé hetan iha ita nia prosesu paz no rekonsilíasaun interna no esterna, se la iha estabilidade maka ita sei la iha dezenvolvimentu.

Komemorasaun loron proklamasaun independensia iha Aileu hetan mos partisipasaun husi Vice-Ministra Planu no Finansas, Sara Lobo Brites inklui ekipa Ministériu Planu no Finansas, komunidade Aileu , autoridade lokál, sosiadade sivil, sívitas akadémika, organizasaun nasionál no internasionál, polísia no mós hetan animasaun dansa kultura hosi estudante sira.