• Ministra Finansas hala’o Sorumutu Semanal ho Primeiru Ministru

Home » Anúnsiu » Ministra Finansas hala’o Sorumutu Semanal ho Primeiru Ministru Imprime pájina

Ministra Finansas hala’o Sorumutu Semanal ho Primeiru Ministru

20190603_Ministra Finansas hala’o Sorumutu Semanal ho Primeiru Ministru

Ministra Finansas En Ezersisiu no atual Vise Ministra Finansas Sara Lobo Brites kuntinua relata rezultadu servisu Ministériu Finansas iha enkontru semanal ho Primeiru Ministru Taur Matan Ruak. Enkontru ne’ebé hala’o iha Palasiu Governu loron 3 Junu 2019 koalia kona-ba preparasaun enkontru ho Doadores sira inklui koalia mos prioridade Governu ba tinan 2020 no 2021.

Vise Ministra Finansas durante realizasaun enkontru ho Primeiru Ministru rona orientasaun kona-ba preparasaun eventus sorumutu ho doadores sira inklui pedidu atu distribui konvite ba orgaun soberanu sira hanesan Parlamentu Nasionál, Prezidenti Repúblika no Tribunal. Sorumutu ho Doadores sira tuir planu sei realiza iha loron 4 Jullu 2019 depois kuaze tinan rua, entre 2017 to mai 2018, Governu Timor Leste labele realiza enkontru refere tanba kondisaun politika rai laran atual neba.

“ Iha 4 Jullu Governu sei hato’o ba parseiru sira programas Governu nian, para bele orienta parseiru sira nia apoiu mai ita nia programa. Hanesan daudaun ita hetan apoiu hosi Uniaun Europeia, Governu Australia, Estadus Unidus, USAID, JICA no Embaisada China” dehan Vise Ministra Finansas.

Iha sorin seluk, enkontru ho Primeiru Ministru ne’e koalia mos kona-ba prioridade Governu ba tinan 2020 no 2021. Prioridades hirak ne’e sei ligadu metin ho projetu hirak ne’ebé mak atu implementa. Programa hirak ne’e sei koalia mais klean ne’ebe sei involve ho ativamente hosi instituisaun estadu hotu iha journada orsamental ne’ebe sei realiza iha semana ikus fulan Jullu tinan ne’e.

“ Ho orientasaun hosi Primeiru Ministru nian maka bai-bain hau informa ona ba ita bo’ot sira, hare’e liu ba infra-estrutura eskola no uma ba UPF sira ne’ebé maka prioridade tenke tau iha orsamentu 2020” hateten Ministra Finansas En Ezersisiu, Sara Lobo Brites depois remata enkontru semanal ho Primeiru Ministru Taur Matan Ruak.