• Ministra Finansas Interina, Sara Lobo Brites Observa Sensus Agrikula Iha Postu Adiministrativu Atabae

Home » Anúnsiu » Ministra Finansas Interina, Sara Lobo Brites Observa Sensus Agrikula Iha Postu Adiministrativu Atabae Imprime pájina

Ministra Finansas Interina, Sara Lobo Brites Observa Sensus Agrikula Iha Postu Adiministrativu Atabae

20191011_Ministra Finansas Observa Sensus Agrikula Atabae 1

Hodi bele hatene kondisaun real hosi servisu Sensus Agrikula 2019 iha terenu, Ministra Finansas Interina no atual Vise Ministra Finansas Sara Lobo Brites akompaña hosi Diretór Jerál Estatístika (DJE) Elias dos Santos Ferreira , iha loron 10 Outubru 2019 observa direta ba ekipa Sensus Agrikula 2019 “Hau nia Resposta, Hau Nia futuru” iha Postu Administrativu Atabae, Munisípiu Bobonaro.

“Ida ne’e importante hodi halo akompañamentu ba ita nia alin sira. Katak sensus ne’e alkansa duni tuir orariu ho objetivu ne’ebé ita hakarak”. Informa Vise Ministra Finansas,Sara Lobo Brites iha Atabae depois observa atividade ekipa Sensus Agrikula iha Atabae.

Diretór Jerál Estatístika, Elias dos Santos Ferreira ne’ebe akompana iha vizita traballu ne’e rekunhese katak vizita hosi autoridade nasionál sira nu’udar jestu hodi motiva ekipa sira iha munisípiu hodi hala’o servisu ho responsabilidade tomak.

“Ohin hanesan oportunidade diak hosi Ministra Finansas e atual Vise Ministra Finansas ne’ebé sai hanesan mós primeiru vise diretiva ba sensus agrikula mai vizita iha Postu Administrativu Atabae, Munisípiu Bobonaro ida ne’e importante” haktuir Diretór Jerál Estatístika

Oras ne’e rezultadu hosi Sensus Agrikula 2019 iha Postu Administrativu Atabae iha ona faze final maske iha dezafius balun wainhira hahu’u halao servisu refere.

“Komunidade sira fó dadus ne’ebé fiksu ka akurat, tanba ami sempre dehan ba sira katak dadus ne’ebé ami foti hosi ita bo’ot sira ne’e segredu entre ita bo’ot sira ho ami. Entaun sira mós aseita ho ida ne’e sira konkorda fó hotu dadus ne’ebé ami husu ba sira”. Supervizór Suku Aidabalete Postu Adimistrativu Atabae, Eulalia da Cruz.

Realizasaun Sensus Agrikula 2019 iha Postu Administrativu Atabae hetan apoiu masimu hosi autoridade lokal wainhira ekipa Sensus Agrikula tun ba terenu hodi rekolla informasaun hosi kada uma kain iha Postu Atabae.

“Hato’o hau nia agradesimentu ba autoridade lokal liu-liu Administradór Munisípiu, Administradór Postu, Xefi Suku, Xefi Aldeia, Polisia ba entidade hotu ne’ebé maka durante ne’e fó apoiu tomak liu-liu media sira hodi divulga informasaun relasiona ho servisu Sensus Agrikula 2019” hateten Diretór Jerál Estatístika, Elias dos Santos Ferreira antes fila hikas mai Dili.