• Minístru Finánsa Simu Enkontru Kortézia husi Embaixadór UE ba Timor-Leste

Home » Anúncios » Minístru Finánsa Simu Enkontru Kortézia husi Embaixadór UE ba Timor-Leste Imprimir a página

Minístru Finánsa Simu Enkontru Kortézia husi Embaixadór UE ba Timor-Leste

14 Janeiru, 2021.

Dili, Timor-Leste – S.E. Minístru Finánsas, Rui Augusto Gomes akompaña husi S.E. Vice-Minístra Finánsas, Dra. Sara Lobo Brites, simu enkontru kortézia husi S.E. Embaixadór Uniaun Européia (UE) ba Timor-Leste, Sr. Andrew Jacobs no Xefe Seksaun Kooperasaun UE, Sr. Ramon Reigada.

Enkontru ne’e diskute tópiku lubun ida inklui UE nia programa Apoiu Orsamentu Diretu, reforma fiskál no jestaun finánsas públiku, dezenvolvimentu setór privadu, diversifikasaun ekonómika, dijitalizaun no mós área prioridade sira seluk.

Iha enkontru ne’e, S.E. Minístru Rui Augusto Gomes hatete “Governu Timor-Leste liuhusi Ministériu Finánsas rekoñese katak UE mak hanesan doadór boot ida ba Timor-Leste. Ami mós rekoñese katak to’o agora, UE mak doadór dahuluk no úniku doadór ida ne’ebé mak fornese asisténsia liuhusi Apoiu Orsamentu Diretu no ida-ne’e hanesan sinál konfiansa ida ba ami no ami sei kontinua hadi’ak ami-nia akuntabilidade, efisiénsia no efikaz durante mandatu Governu ida-ne’e.”

Embaixadór Jacobs responde katak UE orgullu tebes atu fornese programa Apoiu Orsamentu Diretu ba Governu Timor-Leste. Nia mós kongratula Minístru Rui Augusto Gomes bá nia nomeasaun foun ne’e no garantia ba Minístru katak UE prontu atu kontinua apoiu Ministériu iha implementasaun estratéjia atu hadi’ak jestaun finánsas públiku tanbá ne’e hanesan xavi ida ba dezenvolvimentu ekonómiku.

Durante enkontru ne’e, Vice-Minístra Sara Lobo Brites mós aproveita oportunidade hato’o agradesimentu ba UE ne’ebé mak ajuda ona Governu finansia kompra sistema SIGTAS V.3. Tinan kotuk, liuhusi lideransa Vice-Minístra, Autoridade Tributária lansa ona portal e-Services ne’ebé mai ho e-Request no e-Reporting. Dijitalizasaun ida-ne’e fasilita ona kontribuente sira no Autoridade Tributária relasiona ho efisiénsia, efikaz no tuir-mai enkoraja transparénsia no akuntabilidade iha setór públiku, liuliu iha jestaun reseitas no área administrasaun.

Partisipa iha enkontru refere, Xefe Gabinete Minístru, Xefe Gabinete Vice-Minístra, Diretór Jerál Jestaun Rekursu Externa no Mobilizasaun ho ekipa, Diretora Jerál Autoridade Tributária no reprezentante husi MNEC.