• Ministru Finansas Fernando Hanjam Agradese Ba Ekipa MF

Home » Announcements » Ministru Finansas Fernando Hanjam Agradese Ba Ekipa MF Print Page

Ministru Finansas Fernando Hanjam Agradese Ba Ekipa MF

Ministru Finansas Fernando Hanjam hateten, Ha’u agradese ba ekipa tomak Ministériu Finansas (MF) nian liu-liu Diresaun Gerál Planeamentu no Orsamentu (DGPO) ne’ebé maka semana kotuk dissemina ona pakote Orsamentu Gerál Estadu (OGE) 2020 ba linhas ministeriais sira.

Tuir Ministru Finansas Fernando Hanjam, ita hahú prepara ona Orsamentu Gerál Estadu (OGE) ba 2020 no sei kontinua prepara mós ba OGE 2021 nian. Ne’ebé husu kolaborasaun tomak husi diretór gerál no diretores nasionais sira hotu. Agradese ba ekipa tomak liu-liu ba Diresaun Gerál Planeamentu no Orsamentu (DGPO) ne’ebé maka semana kotuk dissemina ona pakote Orsamentu Gerál Estadu 2020 nian.

“Husu mantein linha koordenasaun ho ministérius sira hotu, atu nune’e ita bele hetan rezultadu OGE 2020 ho di’ak”, informa Ministru Finansas Fernando Hanjam, iha edifisiu Ministériu Finansas bainhira sai mestre ba Serimónia Isar Bandeira iha loron 06 Fulan Jullu 2020.

Orsamentu Gerál Estadu 2020 ne’e ita kontinua prepara fali, tanba agora daudaun sei la’o hela ho duodésimu. Parese OGE 2020 sei hahú ezekuta iha Novembru ou Dezembru nia laran. Entaun quer dizer ita iha fulan rua de’it tanba fulan sira seluk ne’e ita hahú ona ho DOT.

“Preparasaun Orsamentu Gerál Estadu 2021, diresaun gerál sira iha ministériu Finansas prepara ona, liu-liu haree ba programa prioridades VIII Governu nian. Ami sei dissemina livru oan ida ba diresaun sira kona-ba prioridade VIII Governu nian para ita hotu-hotu bele akompanha”.

Ministru mós hateten, kontinuasaun enkontru entre Ministru ho Diresaun Gerál sira hotu sei realiza hikas tuir orário ne’ebé maka sei prepara. Enkontru hirak ne’e importante tebes ba ha’u, atu nune’e ha’u bele apar ho atividades nomos programas kada diresaun ne’ebé hamahan-an iha Ministériu Finansas. Liu-liu programa no atividades sira ne’ebé iha hela prosesu tenke finaliza, liu husi enkontru sira ne’e ha’u bele apar ho di’ak saída maka tenke kontinua halo.

“Ohin ita rona tiha ona dever saida maka ita tenke kumpri no hatudu klaru ona katak ita hotu-hotu tenki servisu ho profesionál, iha desipliña servisu no hatene saida maka ita atu halo”.

Dalaruma iha tempu, ha’u sei halo visita supreza ba kada diresaun, ha’u tun direta hodi haree imi nia servisu. Selae saida maka ita hatur ona iha regras ka normas Funsaun Publika nian só para hakerek de’it Hitam di atas putih nuda’ar funsináriu publiku ne’e ita atu halo saida.

“Ha’u husu ba Diretór Gerál no Diretores Nasionais sira atu haree buat sira ne’e hotu, kuandu funsionáriu sira maka la halo tuir regras sira ne’ebé implementa tenki tau atensaun”.

Ministru Finansas Fernando Hanjam esplika, ita iha ne’e la’os atu haree oinsa bele hetan osan, la’os tanba osan maka ita servi ema, haree osan tama ba bolsu maka ita servi ema la’e. Ita tenki servisu hanesan bai-bain dehan profesionál labele inklina ba ida ne’ebá nu fim ita iha laran maka han malu fali. Ha’u husu favor ba ita hotu-hotu para kria kondisaun iha ita nia uma laran ho di’ak para ita hotu-hotu bele la’o ba oin no la’os la’o ba kotuk.

“Ita tama mai para ita hatun malu de’it di’ak liu lalika servisu no ha’u husu ba funsionáriu sira hotu-hotu toma atensaun ba asuntu refere”.

Fulan tolu ona serimonia kona-ba Isar Bandeira paradu, tanba situasaun Surto Covid-19 halo ita ida-idak buka nia moris, maibé ohin ita hahú fali hanesan normal. Maiske nunee husi Ministériu Saúde fo nafatin hanoin ba ita hotu atu mantein medida ne’ebé sira fó sai ona hanesan distansiamentu sosiál, fase liman, uza maskara kuandu ita hakbesik ba malu.