• Ministru Planu no Finansas “Esforsu sira ne’ebé ita halo ne’e signifikativu”.

Home » Announcements » Ministru Planu no Finansas “Esforsu sira ne’ebé ita halo ne’e signifikativu”. Print Page

Ministru Planu no Finansas “Esforsu sira ne’ebé ita halo ne’e signifikativu”.

Funsionáriu Ministériu Planu no Finansas (MPF), ohin 2 Abril 2018 iha resintu Ministeriu nian, kuntinua hala’o programa isar bandeira rutina ne’ebe sempre realiza iha semana dahuluk kada fulan. Seremonia isar bandeira ne’e prezidi husi Ministru Planu no Finansas, Rui A. Gomes.

Iha biban ne’e Ministru Planu no Finansas Rui A. Gomes apela ba funsionarius sira atu mantein profisionalismu no integridade intelektual no kaer metin valores sira ne’ebé orienta Ministériu Planu no Finansas ida ne’e ninia servisu lorloron. Haktuir mos katak iha semana ida ne’e nia laran, MPF sei asesu osan balun husi Fundu Minarai atu asegura nafatin funsionamentu normal instituisaun Estadu hotu, presta servisus públikus, halo pagamentu ba Veteranu sira, no fim garante kredibilidade Estadu ida ne’e labele monu.

Ministru mos relata susesu hirak ne’be mak atinji tiha ona hanesan pagamentu eletróniku; pagamentu saláriu laiha atrazu; maski ho difikuldade, konsegue selu daudaun tusan balun ho DLA Piper, Tribunal Permanente ba Arbitrajen, tusan ho ADB. Inklui mos lansamentu ba dokumentu importante lubun ida, hanesan publikasaun konaba inflasaun, relatóriu temátiku konaba edukasaun, kolekta reseitas ba Estadu liuhusi programa ASYCUDA World ne’ebe lansa tiha ona iha Aeroporto Presidente Nicolau Lobato no Batugadé.

“Ita hotu hatene katak semana oin mai, kampaña partidus politikus sira sei hahú. Ha’u husu atu funsionárius tomak hakruk ba lei ne’ebé vigora atu labele hetan problema aban bainrua tanba ita nian hahalok rasik. Ha’u haree maioria staff Ministériu ida ne’e mesak tékniku deit” hateten Ministru Rui A. Gomes ba Diretores-jerais, Diretores-nasionais, Xefes Departamentus, Koordenadores Unidades, Asesores, Junior Professionals, Funsionáriu tomak Ministériu Planu no Finansas nian.

Antes atu hakotu diskursu, Ministru Planu no Finansas hato’o apresiasaun no louvor ba servisu profisional, rigorozu ne’ebé diresaun-sira hatudu; maski ho rejime duodesimal ho rekursus finanseirus ne’ebé limitadu, konsegue hakat liu fulan tolu ona.