Timor-Leste Ministry of Finance

Home » Anúnsiu » Enkontru koordenasaun da-huluk Ministériu Finansas nian Imprime pájina

Enkontru koordenasaun da-huluk Ministériu Finansas nian

Ministériu Finansas halao enkontru koordenasaun da-huluk, ne’ebé hanaran CCFM (Consultative Council of Finance Ministry) hafoin VI Governu Konstitusional hetan tomada-de-posse iha semana ida liu ba ne’e.

Enkontru ne’ebé realiza iha Kuarta, 25 Fevereiru 2015 iha Salão de Saber, edifísiu Ministériu Finansas nian ne’e, lidera direitamente husi Ministra, Sra. Santina Cardoso no Vice Ministru, Sr. Helder Lopes no atende husi DGs, DNs, jestores no reprezentante sira parseiru dezenvolvimentu.

Enkontru refere diskute konaba asuntu importante sira lubuk ida, inklui lei orgânika VI Governu Konstitusional no ninia implikasaun ba estrutura no servisu Ministériu nian, programa loron 100 Governu nian, orsamentu ratifikativu, reforma fiskal no atividade rutina sira seluk hanesan preparasaun ba Yellow Road Workshop.

Iha enkontru ida ne’e mos, Sr. Alberto Piedade husi Sentru Treinamentu hato’o aprezentasaun ida konaba manual prosedimentu ida hodi tau matan ba treinamentu sira iha rai-liur. Tuir nia, manual ida ne’e sei asegura atu treinamentu hotu iha rai-liu fo “value added” no benefísiu ba Ministériu eim termu prestasaun servisu ida diak husi sira ne’ebé ba tuir treinamentu.

CCFM ne’e hanesan enkontru koordenasaun ida, ne’ebé halao semana rua dala-ida, fo biban ba DGs no DNs sira atu hato’o konaba progresu husi sira ninia atividade, identifika no buka solusaun ba problema sira ne’ebé sira hasoru.

Wainhira enkontru ne’e remata, direisaun ida sei prepara nota enkontru no kompila dokumentu relevante sira hotu, hafoin fahe ba DGs no DNs sira. Dokumentu hirak ne’e sei serve hanesan dokumentu baze ba iha preparasaun relatóriu ofisial progresu Ministériu nian.

Molok enkontru durante loron baluk ne’e remata, Ministra no Vice Ministru husu ba funsiunáriu sira hotu atu kontinua servisu maka’as hodi asegura prestasaun servisu ida diak ba povu Timorense.