• Ministériu Finansas introdús automatizasaun ba sistema emisaun sertifikadu dívida

Home » Anúnsiu » Ministériu Finansas introdús automatizasaun ba sistema emisaun sertifikadu dívida Imprime pájina

Ministériu Finansas introdús automatizasaun ba sistema emisaun sertifikadu dívida

Dili – Iha loron 16 Marsu 2015, Vice Ministru Finansas, Sr. Helder Lopes, akompaña husi Direitora Jerál Impostu, Sra. Mónica Rangel no Direitór Nasional Impostu Doméstiku, Sr. Uldarico Rodrigues, lansa, pela primeira vez iha Timor-Leste, seremónia automatizasaun sistema emisaun sertifikadu dívida. Seremónia simplés ida ne’e asiste direitamente husi funsiunáriu hotu Diresaun Impostu Doméstiku no reprezentante seitor privadu hanesan Banku Nasional Ultramarinu (BNU), Ensul no Montana Diak.

Sertifikadu dívida ne’e sertifikadu ofisial ida ne’ebé emiti husi Direisaun Impostu Doméstiku Ministériu Finansas, ne’ebé hatudu kompañia ida (pesoal natural ka pesoa legal) iha ka lae dívida ruma ba iha Governu. Alein sertifikadu dívida, sistema foun ida ne’e mós fornese sertifikadu rejistu.

Vice Ministru, iha ninia intervensaun badak iha bibán ida ne’ebá, hateten automatizasaun ba prosesu emisaun sertifikadu divída ida ne’e hanesan “parte ida husi inisiativa Governu nian hodi halo reforma fiskal”. Reforma fiskal ne’e mai ho nia objetivu ida atu hasa’e reseita doméstika liu husi haluan baze tributária no ao mesmo tempo atrativu nafatin ba investidór sira. Nia mós aumenta tan katak sistema foun ida ne’e “introdús automatizasaun, habadak tempu prosesamentu, hametin kontrolu no transparánsia”.

Prosesu automatizadu foun ida ne’e hanesan pasu diak ida husi métodu ida uluk, iha ne’ebé emisaun sertifikadu dívida halo manualmente. Prosesu foun ida ne’e mos hanesan parte ida husi reforma bo’ot ne’ebé Direisaun Impostu Ministériu Finansas nian halao iha 2013, iha ne’ebé hahú fali rejistrasaun ba Númeru Identifikasaun Fiskal (NIF). Re-rejistru ida ne’e hodi asegura katak informasaun ne’ebé fornesidu lo’os, kompletu no atualizadu.

To’o agora kontribuente sira hamutuk liu nain 15,000 maka rejistru fila fali tiha ona ho sistema foun. Ministériu Finansas kontinua apela ba kontribuente sira, rezidente ka laos rezidente, atu mai rejistra fila fali ho Autoridade Impostu atu hetan NIF foun. Aktu ida ne’e hatudu katak sidadaun ne’ebé diak kontribui ba dezenvolvimentu nasaun ida ne’e.