• Komunikadu Imprensa: Ministeriu Planu no Finansas Kolabora ho ADB hodi Hadi’ak Politikas ba Hamenus Li’ak no Dezigualdade Iha Timor-Leste.

Home » Anúnsiu » Komunikadu Imprensa: Ministeriu Planu no Finansas Kolabora ho ADB hodi Hadi’ak Politikas ba Hamenus Li’ak no Dezigualdade Iha Timor-Leste. Imprime pájina

Komunikadu Imprensa: Ministeriu Planu no Finansas Kolabora ho ADB hodi Hadi’ak Politikas ba Hamenus Li’ak no Dezigualdade Iha Timor-Leste.

Dili, 20 Fevereiru 2018 – Ohin Ministériu Planu no Finansas hamutuk ho Profesór Stephen Younger husi Commitment to Equity (CEQ) Institute, no Banku Aziátiku Dezenvolvimentu aprezenta rezultadu prelimináriu ba liña ministériu sira kona-ba avaliasaun impaktu fiskál atu hamenus ki’ak no deziguldade. Avaliasaun ne’e dezenvolve konsiderasoens sentráis lubun ida ne’ebé Timor-Leste presiza tetu atu haforsa impaktu polítika fiskál no metas ba ekuidade.

Ministru Planu no Finansas, Rui A. Gomes, PhD iha nia diskursu ba partisipante sira hatete: ‘Ministériu Planu no Finansas iha responsabilidade atu guia liña ministériu sira atu asegura katak sira nia programa no orsamentu proteje timoroan sira ne’ebé vulneravel liu, liu husi intervensoens fiskál ne’ebé efektivu no sustentavel’.

Ministériu Planu no Finansas hahú halo avaliasaun ne’e iha Maiu 2017. Liñas Ministériu ne’ebé envolve iha ezersísiu ne’e sei valida rezultadus simulasoens no haree utilidade avalisasaun ne’e wainhira identifika polítikas atu hamenus ki’ak no ba reforma fiskál.

Avaliasaun ne’e uza data ne’ebé Ministériu Finansas ho Banku Mundial foti liu husi ‘Survey of Living Standards’ iha tinan 2014, ne’ebé kobre uma kain hamutuk 5.916. Survey ne’e fó sai rezultadu katak iha nivel nasionál Timor-Leste nia ki’ak hetan redusaun husi 50,4% iha 2007 tun ba 41,8% iha 2014. Atu kompara ho nasaun sira seluk, maka bazeia ba sasukat $1,90 kada loron, maka nivel ki’ak iha Timor-Leste 30%.

Profesór Younger hatete: ‘Timor-Leste nia impostus no despezas hatun ki’ak ho kuantidade ne’ebé ás tebes kompara ho nasaun dezenvolvimentu seluk, maski ho redusaun ida ne’ebé limitadu iha nivel dezigualdade’.

Avaliasaun ne’e sei ajuda aumenta Ministériu Planu no Finansas nia abilidade atu halo polítika no enkoraja Governu tomak atu implementa Planu Estratéjiku Dezenvolvimentu nia vizaun katak Timor-Leste iha 2030 sei sai nasaun ida ne’ebé tama ona iha rendimentu média ás no pobreza extrema eradikadu ka laiha ona.

ADB nia Country Director, Paolo Spantigati nota importánsia husi governu nia programa iha saúde no edukasaun: ‘Foinsa’e sira mak futuru ba nasaun ida ne’e no ekonomia ne’e. Investe iha saúde no edukasaun ajuda hamenus ki’ak agora no garante katak ita hotu bele hateke ba oin ba futuru ida ne’ebé nabilan’.

Atu hetan tan informasaun, favór kontaktu: Cecilia Tilman Gonçalves, Komisaun Reforma Fiskál,
iha +670 7727 6436, ctgoncalves@mof.gov.tl