- MPF Desimina Informasaun Kona-ba Resultadu Baseia ba Decentralizasaun Planeamentu no Orsamentu iha RAEOA
Home » Anúnsiu » MPF Desimina Informasaun Kona-ba Resultadu Baseia ba Decentralizasaun Planeamentu no Orsamentu iha RAEOA Imprime pájina
MPF Desimina Informasaun Kona-ba Resultadu Baseia ba Decentralizasaun Planeamentu no Orsamentu iha RAEOA
Ministériu Planu no Finansas (MPF) ho parseira UNICEF ho Ministériu xave sira hala’o desiminasaun informasaun kona-ba Resultadu Baseia ba Decentralizasaun Planeamentu no Orsamentu iha RAEOA. Konteudu husi desiminasaun ne’e liga liu ba prosesu no prosedimentu ba planeamentu no orsamentu ne’ebé alinha ho programa Labarik no Inan – Feto sira nian. Lia hirak ne’e informa husi Diretór Jerál Finansas Estadu MPF, Januario da Gama ba jornalista sira iha Salaun Madre Dominican Oecusse, 12 de Abril 2018.
Diretór Jerál ne’e esplika katak, workshop ne’e realiza tanba hetan kooperasaun másimu husi UNICEF tuir akordu ne’ebé hala’o iha fulan hirak liu ba ho objetivu atu halo kapasitasaun ba ita nia setores sira no ajensia iha nivel munisípiu inklui RAEOA para bele iha intendementu no akompañamentu prosesu no prosedementu sira hodi tulun utiliza hanesan referensia ba iha prosesu de elaborasaun da planeamentu orsamentu tinan-tinan ninian.
“Tópiku ida ne’e nia rezultadu bazeia ba desentralizasaun planeamentu no orsamentu, sesaun ida ne’e hanesan faze datoluk ne’ebé mak implementa iha RAEOA depois de implementa ona iha munisípiu seluk hodi hola reflesaun ba programa labarik no inan feton ninian. E Matéria ne’ebé sei apresenta durante loron rua sei mai ho perspetiva ida kona-ba polítika no planeamentu ninian ne’ebé sei orienta oinsa ministériu no ajensia sira bele halo planeamentu ida que adekuada hola reflesaun ba nesesidade iha terenu,” haktuir Januario.
Iha workshop ne’e mós koalia kona-ba operasionalizasaun iha nivel setoral ne’ebé sei foka ba asuntu direitu labarik nian, hodi identifika kestaun malnutrisaun no partisipasaun labarik iha edukasaun no mós foka ba sensibilizasaun jéneru iha area planeamentu no orsamentu nian.
Alem de ne’e sei aprezenta mos kona-ba siklus no prosedimentu preparasaun orsamentu do estadu. Por tantu prátikamente RAEOA hanesan autoridade ida, MPF hamutuk ho UNICEF iha hanoin ida hodi fo referensia ba partisipantes depois bele iha koñesementu konseitu kona-ba planeamentu preparasaun orsamentu ne’ebé refleta duni ba iha nesesidade báziku ninian. Sesaun traballu ida ne’e mós iha loron ikus liu sei hala’o atividade prátika ida para halo diskusaun grupo ou diskusaun téknika atu identifika defisiensia do implementasaun ba iha planeamentu no programa liu-liu ba programa labarik no sensibilizasaun jéneru no hetan rekomendasaun no sujestaun ruma hodi promove diak liu iha futuru oin mai.
Diretór ne’e hatutan, MPF hamutuk ho UNICEF agredese tebes ba autoridade RAEOA bele simu no fasilita hodi halo sosializasaun no deseminasaun kona-ba progresu no regras sira. Tanba programa ne’e hala’o dahuluk no implementa iha munisípiu Ermera ne’ebé mak involve munisípiu Liquica no munisípiu Aileu no faze daruak implementa iha munisípiu Baucau no hetan partisipasaun maka’as husi munisípiu Viqueque no munisípiu Manututo rasik no faze datoluk agora daudauk hala’o iha RAEOA.
Iha fatin hanesan Sekretáriu Regional RAEOA – ZEESM ba assunto Administrasaun, Francisco Xavier Marques dehan, importansia husi atividade ne’e oinsa atu kapasita rekursu umanu ne’ebé existe iha RAEOA ne’e, sira bele hatene no iha koñesementu klean halo orsamentu e mós oinsa halo ezekusaun orsamentu no planu aprovisionamentu ne’ebé existe iha RAEOA.
“Programa ne’e em termus governu hala’o ona maibé, ami hanoin katak seidauk to’o tanba ita haré katak agora daudaun ne’e mundu sempre nakfila lao ba oin liuhosi globalizasaun parte teknológia. Buat hirak ne’e hotu tanba oportunidade fo kapasitasaun hanesan ne’e tenki lao nafatin atu nune’e bele akompaña progresu mundu nian ne’ebé mak agora daudauk ami iha”, katak Francisco.
Programa workshop loke husi Sekretáriu Administrasaun RAEOA-ZEESM rasik no hetan partisipasaun husi Ministériu Saúde, Ministériu Sosial no Solidaridade, Ministériu Dezenvolvimentu Reforma do Institusional, Ministériu Edukasaun no sira seluk ne’ebé iha relasaun servisu ba programa labarik no jéneru.