• MPF Halo Transferensia Funsionáriu ba Administrasaun Munisípiu Covalima

Home » Anúnsiu » MPF Halo Transferensia Funsionáriu ba Administrasaun Munisípiu Covalima Imprime pájina

MPF Halo Transferensia Funsionáriu ba Administrasaun Munisípiu Covalima

MPF HALO TRANSFERENSIA FUNSIONARIU BA ADMINISTRASAUN MUNISPIU COVALIMA-FINAL

Kinta-Feira, 14 Juñu 2018 foin lalais ne’e, iha Salaun Administrasaun Munisípiu Covalima hala’o seremónia transferensia funsionáriu nain tolu (3) husi Ministériu Planu no Finansas (MPF) liuhusi Diresaun Nasionál Monitorizasaun no Jestaun Patrimóniu Estadu (DNMJPE) ba Administrasaun Munisípiu Covalima. Transferensia refere asisti dereitamente husi Reprezentante Administrador Munisípiu Covalima, Jacinto dos Santos hanesan mós Xefe Rekursu Umanus Munisípiu Covalima nian, Diretór Jéral Finansas Estadu, Januario da Gama, Diretor Nasionál Logístika e Manutensaun Domingos Marques no Diretora DNMJPE, Timotea P. Marques.

Funsionáriu nain tolu mak hanesan Elizabeth Funan hanesan Administrasaun Tékniku, Grau E hahu kareira iha tinan 2002, Domingos Mau Meta hanesan Administrasaun Tékniku Grau E ne’ebe hahu nia kareira iha tinan 2006 no Manuel Quintão hanesan Administrasaun Tékniku hahu nia kareira hanesan funsionariu iha tinan 2012.

Iha intervensaun transferensia refere, Diretór Jerál Finansas Estadu Januario da Gama haktuir, seremonia ida ne’e hanesan kontinuasaun husi akordu interorganika entre Ministériu Administrasaun Estatal ho Ministériu sira ne’ebé selebra iha dia 1 Setembru 2016, atu deskonsentra servisu balun ba munisípiu sira nune’e, ho polítika ida ne’e servisu jestaun patrimoniu estadu labele kontinua sentraliza iha Ministériu Planu no Finansas nune’e MPF liuhusi patrimóniu estadu inisia koordenasaun ho administrasaun munisípiu Covalima oinsa bele transfere funisonáriu nain 3 ho funsaun tomak inklui beins moveis estadu hodi bele fasilita no reforsa jestaun munisípiu Covalima ne’e.

“Reprezenta Ministru no Vice-Ministra Planu no Finansas, agradese no apresia ba administrasaun munisípiu Covalima ne’ebé hakarak simu rekursu ne’ebé ita investe tinan barak nia laran depois bele fo tulun servisu diáriu ba jestaun patrimóniu estadu Covalima ninian hodi bele kontribui ba jestaun ne’ebé efisiente no efikas hodi bele mós deminui despezas ba manutensaun no reparasaun”, katak DG Finansas Estadu MPF ne’e.

Nia mós akresenta katak wainhira iha ezersisiu tékniku hetan difikuldade ruma odamatan patrimóniu estadu nasionál nakloke nafatin ba imi nain tolu hodi bele koalia kestaun tékniku, halo koordenasaun no konsultasaun hodi bele fo assitensia iha prosesu servisu balun ne’ebé planea iha munisípiu Covalima ida ne’e. Tanba hatu’ur ona iha dekretu lei nú. 32/2016 servisu lelaun ne’e mesmu sei sentraliza iha MPF maibé iha preparasaun tékniku bele inisia kedas iha munisípiu Covalima hafoin bele halo koordenasaun iha nivel nasionál oinsa mak nivel nasionál bele fo assistensia no lidera atu bele implementasaun servisu lelaun iha munisípiu Covalima.

Iha fatin hanesan Diretora Timotea P. Marques hatete, seremonia transferensia ne’e realiza tanba bazeia ba despaisu Komisaun Funsaun Públika (KFP), númeru 4917 iha fulan Abril ba MPF atu transfere funsionáriu nain 3 ba administrasaun munisípiu Covalima. Tanba konsidera dekretu lei nú. 3/2016 kona-ba estatutu da administrasaun munisipais no autoridade munisipais ninian no mós dekretu lei nú. 30/2015 kona-ba organiku MPF, maka estruturamente servisu patrimóniu estadu la eziste ona iha regional sira.

“Ha’u mós hakarak hato’o kona-ba estabelesementu patrimóniu estadu regiaun Covalima nian ita estabelese iha periodu tranzisaun tempu United Nations Transitional Administration In East Timor (UNTAET) nian iha ano 2001 hamutuk ho regional sira seluk maka hanesan Regional Lospalos, Viqueque ho Oecusse, ne’ebé nia atribuisaun servisu atu kontrolu no halo supervisaun ba patrimóniu estadu nian tomak iha regiaun ninian no wainhira iha mudansa estrutura polítika desentralizasaun komesa inisiu ona etapa por etapa regiaun sira halo transferensia fo poder ba regional, atu munisípiu sira bele kontrola,” katak Timotea.

Alem de ne’e mós, Reprezentante Administrasaun Munisípiu Covalima nu’udar mós Xefe Departamentu Rekursu Umanus Jacinto do Santos reforsa tan, tranferensia ida ne’ee akontese tuir baze legal ne’ebé mak ita hotu hatene iha dekretu lei no. 3/2016 nune’e mós akordu interorganiku iha 01 de Setembru 2016 ne’ebé mak ministériu sira asina. Tuir baze legal hirak ne’e mak ohin akontese duni transferensia e tuir mós despaisu husi KFP ne’ebé mak ohin hau atan hau rasik sai sasin.

“Tanba ami iha munisípiu Covalima espesifikamente hasoru difikuldade iha limitasaun rekursu umanus e Graca e Deus ita bo’ot sira servisu maka’as hodi transfere funsionáriu nain tolu ne’e. Alem de ne’e mós tuir dekretu lei no. 3, estabelesementu estatutu organiku maibé dirésaun Logístiku administrasaun Covalima koloka deit funsionáriu 2, tan ne’e transferensia funsionáriu nain tolu ne’ebé ofisialmente ami simu sei koloka nafatin iha diresaun logístika hodi bele hala’o nafatin servisu no asume kna’ar logístika tanba sira iha esperiensia ne’e másimu,” hatutan Jacinto.

Nune’e mós reprezentante Funsionáriu ne’ebé transfere, Domingos Mau Meta hato’o nia agradesementu ba Ministériu Planu no Finansas (MPF) liu-liu Diresaun Nasionál Monitorizasaun no Jestaun Patrimóniu Estadu ne’ebé mak durante ne’e fasilita, apoio no loke sira nian hanoin hodi aumenta sira nia kapasidade iha jestaun patrimóniu estadu ninian e buat barak ne’ebé mak sira halo mesmo iha obstaklu jestaun no kondisaun ne’ebe sei iha limitasaun.

“Ha’u haktuir fali liafuan reprezentante administrasaun hatete, husu ami atu apoio iha administrasaun munisípiu maibé ha’u hatan katak, ami mai iha ne’e ho lisan deit labele tenki liu husi eskrita ruma para nune’e ikus mai funsionáriu administrasaun munisípiu Covalima ho dignu ne’ebé mak realiza ohin loron realiza duni no ami nain tolu transfere mai iha Administrasaun Covalima”, katak Domingos Mau Meta.