- Ofisial Jestaun Finansa Públika Tuir Teste Diagnóstiku
Home » Anúnsiu » Ofisial Jestaun Finansa Públika Tuir Teste Diagnóstiku Imprime pájina
Ofisial Jestaun Finansa Públika Tuir Teste Diagnóstiku
Sentru Kapasitasaun Jestaun Finansa Públika (SKJFP), servisu hamutuk ho Diresaun Nasional Dekonsentrasaun Finanseira (DNDF), Ministériu Finansa, halao Teste Diagnóstiku ba ofisial jestaun finansa públika (JFP) munisípiu sira iha dadér, 4 Maiu 2016, iha Sentru Konvensaun Dili.
Objetivu principal husi teste ida ne’e maka atu avalia kapasidade ofisial JFP sira nian ne’ebé sei nomeiadu hanesan ofisial JFP iha sira idak-idak ninia munisípiu. Rezultadu husi teste ida ne’e sei uza hanesan liña-de-baze ida hodi estabelese no planeia treinamentu iha área JFP, hanesan parte ida husi programa dekonsentrasaun finanseira ba tinan ida ne’e.
Ofisial nain 360 husi munisípiu oin-oin inklui Aileu, Ainaro, Baucau, Bobonaro, Covalima, Ermera, Lautem, Liquica, Manatuto, Manufahi no Viqueque maka tuir teste ida ne’e. Sira hetan nomiasaun husi sira idak-idak ninia munisípiu husi liña ministériu oin-oin hanesan kandidatu potensial ba profesional JFP. Ba etapa dahuluk, partisipante sira ne’e tuir uluk teste numerasia bázika. Tuir mai, sira sei tuir teste ba sira idak-idak nia área espesializada hanesan pagamentu, aprovizionamentu, jestaun patrimóniu, planeamentu no orsamentu, hafoin fulan ne’en (6) sira servisu tiha ona iha área JFP.
Antes tuir teste diagnóstiku, partisipante sira tuir uluk sensaun informasaun ida konaba Padraun Kompetensia JFP no Teste Diagnóstiku in Sigunda, 2 Maiu 2016. Iha sesaun refere, Sr. Alberto Piedade, Koordenador SKJFP, no Sra. Lídia Guterres, Direitora Nasional ba Dekonsentrasaun Finanseira hato’o aprezentasun balun, ne’ebé kobre tópiku sira hanesan área JFP, profesional JFP no baze legal ne’ebé fó kbi’it ba SKJFP hodi halao avaliasaun ba funsiunáriu públiku hotu-hotu ne’ebé servisu iha área JFP. Informasaun seluk ne’ebé hetan inklui mós rezultadu husi teste diagnóstiku JFP sira uluk no ninia implikasaun ba treinamentu sira relasiona ho área JFP no preparasaun ba akreditasaun JFP. Rezultadu husi teste ida ne’e sei haruka ba Ministériu Administrasaun Estatal hodi uza ba objetivu planeamentu dekonsentrasaun. Wainhira programa dekonsentrasaun hahú, SKJFP, servisu hamutuk ho DNDF, sei kontaktu ofisial JFP munisípiu sira hotu-hotu hodi tuir tan teste diagnóstiku seluk ba sira idak-idak ninia área espesializada. SKJFP sei fó treinamentu ba ofisial JFP iha área JFP no sei sertifika sira ne’ebé kualifika hanesan profesional JFP akreditadu.