• New Deal husi g7+ endorsa iha Forum Alto Nivel ba Aid Effectiveness iha Busan, Korea du Sul- 29 Nov- 1 Dez 2011

Home » Announcements » New Deal husi g7+ endorsa iha Forum Alto Nivel ba Aid Effectiveness iha Busan, Korea du Sul- 29 Nov- 1 Dez 2011 Print Page

New Deal husi g7+ endorsa iha Forum Alto Nivel ba Aid Effectiveness iha Busan, Korea du Sul- 29 Nov- 1 Dez 2011

HLF-Busam-30Nov-1 Dec2011

Busan- Grupu g7+ ne’ebe lidera husi Ministra Finansas Timor-Leste aprezenta ‘New Deal’ iha Forum Alto Nivel kona-ba Aid Effectiveness(Efikasia Ajuda) iha Busan, Korea du-Sul. Orador ba Sessaun Ministerial  ba bloku Estadu Frajil sira mak Ministra Finansas Timor-Leste – Emilia Pires, Ministru Negosius Estranjeirus Australia-Kevin Rudd, Ministru Finansas no Planeamentu Ekonomia Sudaun du-Sul -Kosti Manibe Ngai, Deputy Ministru Finansas Afganistan -Mustafa Mastoor no Ministru ba Planeamentu no Ekonomia Republika Central Afrika -Sylvian Maliko.

Objetivu iha diskusaun bloku Estadu Frajil mak oinsa atu muda hahalok no servisu doadores iha tulun ne’ebe foo ba nasaun frajil no iha Konflitu, liu husi komitmentu ne’ebe iha New Deal nudar vizaun husi nasaun frajil.

Lider g7+, Emilia Pires iha bloku ida ne’e aprezenta New Deal husi g7+ ne’ebe kompostu husi komitmentu toluprimeiru komitmentu mak PSGs (Peacebuilding and State Building goals) ne’ebe kompostu husi objetivu lima mak hanesan Politika Lejitimidadi, Seguransa, Justisa, Baze Ekonomia, Rendimentu no Atendimentu; Segundu Komitmentu mak FOCUS (Fragility Assessment, One Vision one Plan, Compact, Use of PSGs to monitor, Support Political dialogue and leadership); terseiru Komitmentu mak TRUST(Transparency, Risk-Sharing, Use and strengthen country systems, Strengthen Capacities, timely and predictable aid).

Dokumentu kona ba New Deal bazea ba Deklarasaun Paris kona ba efikasia ajuda iha tinan 2005, hatutan fali iha Accra  ho Accra Agenda for Action  (AAA) iha 2008 no asegura fali iha deklarasaun Dili  iha Abril 2010, tuir mai deklarasaun Monrovia Roadmap (Monrovia- Liberia) iha 2011, ne’ebe diskuti klean liu tan iha retiru Juba, Sudaun du- Sul iha Outubru 2011, ikus mai resultdu hirak ne’e hetan apresiasaun makás  husi nasaun doadores iha forum alto nivel ba dala haat kona ba efikasia ajuda iha Busan, Korea du- Sul.

Antes lori plataforma New Deal ba forum alto nivel iha Busan, Lider g7+, Emilia Pires nudar mos Ministra Finansas Timor Leste, lidera enkontru maratona ho membru nasaun g7+, sosiedade sivil, sektor privado, no doadores sira, hodi rona sira nia hanoin no akomoda sira nia ideia hotu.

Hafoin dokumentus new deal hetan nia komitmentu husi nasaun doadores sira, delegasaun no reprezentante nasaun doadores hotu, inklui membru grupu g7+ hato’o aprosimasaun no kongratulasaun ba Lider g7+, Emilia Pires ho nia grupu tomak, ne’ebe halo sakrifisiu makás ba susesu New Deal ne’e.

Plataforma New Deal hanesan komitmentu ne’ebe nasaun frajil sira  elabora hamutuk hanesan mata dalan atu lori nasaun frajil sira sai husi frajilidade ba dezenvolvimentu hodi alkansa MDGs. Atu bele alkansa objetivu ida ne’e presiza mos komitmentu husi nasaun doadores sira iha prosesu implementasaun. Tan ne’e iha intervensaun ba bloku Estadu Frajil sira, Doadores sira hanesan United Nations, United Kingdom, Switzerland, Belgiium, Denmark, Sweden, Australia no sira seluk foo sira nia komitmentu hodi suporta implementasaun New Deal g7+ nian.

Iha sorin seluk, estadu no povu Australia hato’o sira nia sinseridade no komitmentu hodi foo apoiu nafatin ba Timor Leste atu implementa New Deal.

Apoiu Australia nian ne’e afirma iha akordu entendimentu (MoU) ne’ebe asina direitamente husi Ministru Negosius Esntranjeirus Australia, Kevin Ruud ho Ministra Finansas Timor Leste, Emilia Pires iha aula konferensia Centro Convensaun Bexco, Busan.

Ministru Kevin Ruud afirma katak Australia kontinua suporta Timor Leste iha sektor agrikultura, saniamentu (bee mos), no foo asistensia ba rekursu humanus relasiona ho sistema finansas nian. Kevin Ruud hateten mos katak, desde tinan 1999, Australia foo apoiu ba Timor Leste hodi reforsa harii sistema governasaun, no foo apoiu ba iha sektor defeza no seguransa.

Iha sorin seluk, Ministra Emilia hateten katak durante ne’e doadores sira fo ajuda ba rai frajil sira, maibe liu husi sira nia ajensia ka ajensia mundial sira deit, tamba ne’e, ajuda hirak ne’e dala barak la atinji objektivu ne’ebe trasa husi rai frajil sira. Nune’e, ajuda doadores sira nian la efektivu hodi rezolve problema rai frajil sira nian. Tamba ne’e, ho New Deal ne’e, Australia apoiu TL direitamente tuir sistema estadu Timor Leste nian rasik hodi atinji Millennium Development Goals (MDGs).

New Deal ne’e forte iha nasaun avansadu sira nia futar matan, tamba nia substansia makás liu hodi muda doadores sira nia komportamentu fo ajuda ba nasaun frajil sira. Basaa, durante ne’e doadores sira fo ajuda ba nasaun fragil sira, maibe la iha nia finalidade ida diak, tamba la apar ho sistema estadu ida-idak nian.

Hafoin diskusaun iha bloku ba Estadu Fajil sira, ekipa g7+ kontinua halao dikusaun iha Site Event Sessaun Ministerial. Ekipa g7+ kumpostu husi Timor-Leste, Guinee-Bissau, Afganistan hamutuk ho reprezentante UN, EU, Interpeace, Denmark Sweden, UK, Netherlands co-chair sessaun ida ne’e. Sessaun ida ne’e foo oportunidade hodi diskuti klean liu kona-ba asaun hodi lori PSGs depois de Busan inklui diskuti strategia, planu no suporta saida mak kada nasaun oferese iha prosesu implementasaun. nomos oinsa Diálogu Internasional bele suporta implementa no monitoriza New Deal depois de Busan.

Hatan ba pergunta hirak ne’e doadores hanesan Denmark, Sweden no Belgium foo nia komitmentu hodi suporta implementasaun New Deal no kontinua sira nia suporta ba nasaun Afganistan hanesan sira nia parseirus. Emilia pires hanesan Lider ba g7+ responde katak New Deal laos ikus maibe inisiu husi prosesu. Prosesu implementasan new deal sei la fásil maibe fiar katak ho komitmentu g7+ no servisu hamutuk entre governu, sosiedade sivil, parlamentu no sektor hotu-hotu iha kada nasaun sei implementa komitmentu New Deal ida ne’e. Reprezentante Organizasaun InterPeace foo énfaze ba iha  partisipasaun, parlamentu, Sosiedade sivil no setor privadu importante iha implementasaun New Deal.

Ho estratejia ne’ebe fokus no sólidu tebes, g7+ hetan susesu ho endorsa New Deal iha Forum Alto Nivel ba Aid Effectivenss iha Busan. Hanesan rezultadu, hamutuk nasaun liu 30 no organizasaun internasional hanesan UN, EU, Banku Mundial, Central African Bank, ADB no sira seluk mak endorsa ona ba New Deal g7+ nian. Rezultadu ida ne’e marka pasu positivu ba g7+.

Tuir planu, iha tinan 2012, g7+ sei halibur hamutuk iha sorumutu harii pas no harii estadu, no bazea ba konkordansia membru g7+ sira, sai hanesan uma nain ba reuniaun tuir mai mak Nasaun Guinee-Bisau. REMATA