- Lansa Komité Intervenientes Portuárius foun no ASYCUDA World iha APORTIL sei Asegura Efisiénsia no fasilitasaun Komérsiu iha Portu Dili
Home » Anúnsiu » Lansa Komité Intervenientes Portuárius foun no ASYCUDA World iha APORTIL sei Asegura Efisiénsia no fasilitasaun Komérsiu iha Portu Dili Imprime pájina
Lansa Komité Intervenientes Portuárius foun no ASYCUDA World iha APORTIL sei Asegura Efisiénsia no fasilitasaun Komérsiu iha Portu Dili
15 Agostu 2018 – Ohin Ministériu Finansas no Ministériu Transporte no Komunikasaun inagura estabelesementu Komité Intervenientes Portuárius (KIP) no lansa Sistema ASYCUDA World iha APORTIL hodi marka pasu ida tan ba prosesu reforma fiskál. Ministru Transporte no Komunikasaun ofisialmente instala Komité no lansa Sistema ASYCUDA World. Marka prezensa iha inaugurasaun ne’e, membrus Komité Intervenientes Portuárius, Komisaun Reforma Fiscal, reprezentante husi USAID, Programa Reforma Aduaneira no UNCTAD, parseirus dezenvolvimentu ne’ebé fó asisténsia teknika ba reforma iha Alfandegas.
Importánsia husi estabelese KIP mak atu promove metodolojia servisu integradu ne’ebé permite partes intervenientes hotu iha Portu hanesan Autoridade Aduaneira, APORTIL, no Emprezas Estivadores, atu servisu hamutuk iha maneira ne’ebé sufisiente liu ne’ebé sei permite atu estabelese no implementa prosedimentus no prátika servisu di’ak liu no atinje objetivu atu simplifika no efisiente iha movimentu container liu husi área portu, hahú husi loron container to’o iha portu ba to’o loron container sai husi portaun Portu.
Parte Intervenientes Portuárius hahú agora sei iha abilidade atu diskute asuntus komún hanesan asuntus armazenamentu no konjestaun, planu solusaun, no bele implementa planu estratéjiku hamutuk hodi ratifika lalais obstakúlus potensiál ba prosesu ne’e.
Benefísius ba komersiantes no importadores mak sei iha sistema ida ne’ebé di’ak iha jestaun no movimentu container husi partes intervenientes hotu, redús demora hasai container husi Portu, redús tempu libertasaun hodi fasilita komérsiu liu husi redús kustu armazenamentu, diminui kustu estra ba importasaun merkadorias, iha konfiansa no klareza iha prosesu importasaun no disponivel merkadorias atu fa’an fali lalais, promove komérsiu, projesaun iha planu no negósiu.
ASYCUDA (Automated System for Customs Data) mak sistema informasaun jestaun integradu Alfándega ne’ebé kontrola kada pasu iha prosesu alfándega, hahú husi identifika karga ne’ebé risku aas ba inspesaun to’o prosesu pagamentus hodi libera no entrega merkadorias. Ho habelar sistema ASYCUDA World iha APORTIL bele ajuda maka’as APORTIL iha kontabilizasaun ba manifestu no hatene informasaun ho eletrónikamente kona-ba container ne’ebé atu haruka husi ajentes transporte antes ró-ahi to’o, durante no depoizde ró-ahi sai. Ba agora daudaun, APORTIL hetan informasaun ho manuál de’it kona-ba ró-ahi no nia kargas, ne’ebé métodu ne’e karu no han tempu no bele halo sala / erru.
Uza sistema ASYCUDA World sei fó benefísiu ba APORTIL tanba sei autoriza APORTIL ho eletrónikamente haree informasaun ne’ebé ajentes transportes aprezenta ba Alfándega kona-ba ró-ahi ida no nia kargas. Sistema ne’e bele mós fornese ba APORTIL ho estatístika ne’ebé akuradu no atualizadu kona-ba ró-ahi ida no nia kargas no containers. Lansamentu ne’e hanesan pioneiru ida ba Janela Únika Nasionál Timor-Leste hodi fasilita komérsiu ho nasaun ASEAN no membrus CPLP inklui atu atinje rekezitus hodi hola parte iha Organizasaun Mundiál Komérsiu.
###
Atu hetan tan informasaun, favór kontaktu: Cecilia Tilman Gonçalves, Komisaun Reforma Fiskál,
iha +670 7727 6436 / 3310 423, ctgoncalves@mof.gov.tl