• Nota Informativa kona-ba Prosesu Pedidu Pagamentu Programa Cesta Básica

Home » Anúnsiu » Nota Informativa kona-ba Prosesu Pedidu Pagamentu Programa Cesta Básica Imprime pájina

Nota Informativa kona-ba Prosesu Pedidu Pagamentu Programa Cesta Básica

Tersa-feira, 16 Marsu 2021.

Iha fulan-fevereiru, tinan-2021, Governu Timor-Leste liuhusi Conselho dos Ministros aprova ona deliberasaun ida ne’ebé orienta liña ministériu sira hotu atu kontribui to’o 7% husi sira nia alokasaun orsamentu husi OJE tinan-2021 atu kontribui ba iha pagamentu programa Cesta Básica.

Hafoin Ministériu Finansas simu kontribuisaun to’o 7% husi liña ministériu sira, Ministériu Finansas aloka orsamentu hirak ne’e ba iha kodigu programa Cesta Básica.

Bainhira osan husi kontribuisaun hirak ne’e tama ona iha Sistema Government Resouce Planning (GRP), Ministériu Finansas notifika Ministériu Implementadór programa Cesta Básica sira atu hato’o sira nia pedidu kompromisu Commitment Payment Voucher (CPV) ba iha Sekretariadu Tékniku Fundu COVID-19 iha Ministériu Finansas.

Responsavel ba programa Cesta Básica mak Ministériu Koordenadór Assuntu Ekonómiku serbisu hamutuk ho Ministériu Turizmu, Komérsiu no Indústria (MTCI), Ministériu Agrikultura no Peskas (MAP), Sekretaria Estadu Kooperativa (SeKoop) no Sentru Lojístiku Nasionál.

Iha primeira semana fulan-marsu, tinan-2021, Sekretariadu Tékniku Fundu COVID-19 haruka fila-fali ona CPV hirak ne’e ba iha Ministériu Implementadór sira.

To’o 16 marsu 2021, Sekretariadu Tékniku Fundu COVID-19 foin simu de’it pedidu pagamentu hamutuk 42 husi Ministériu Turizmu, Komérsiu no Indústria (MTCI).

Ba Ministériu implementadór sira seluk hanesan Ministériu Agrikultura no Peskas (MAP), Sekretaria Estadu Kooperativa (SeKoop) no Sentru Lojístiku Nasionál – iha 16 marsu 2021, Ministériu Implementadór hirak ne’e informa mai Diresaun Jerál Tezouru, Ministériu Finansas katak sira nia prosesu aprovizionamentu interna foin to’o iha faze Jestaun Kontratu (Contract Management).

Tuir-mai atu esplika mós sekuénsia husi prosesu pedidu pagamentu programa Cesta Básica:

  1. Sekretariadu Tékniku Fundu COVID-19 kria no aprova Commitment Payment Voucher. Hafoin hetan ona assinatura, Sekretariadu Tékniku Fundu COVID-19 sei prepara lista no karta akompañamentu hodi haruka ba Ministériu Implementadór programa Cesta Básica sira. Prosesu ne’e presiza tempu loron-tolu.
  2. Hafoin simu CPV husi Sekretariadu Tékniku Fundu COVID-19, Ministériu Implementadór sira sei hahú prosesu aprovizionamentu hanesan kria Purchase Order (PO), Contract Management, Inspection, Normal Payment, Payment Request Tracking no Expense Voucher. Hafoin sei prepara mós pedidu pagamentu hodi submete mai Sekretariadu Tékniku Fundu COVID-19. Prosesu normál entre loron-tolu no loron-haat nia laran.
  3. Hafoin prosesu aprovizionamentu interna prontu ona, ministériu implementadór sira sei verifika uluk dokumentu hirak ne’e atu asegura katak dokumentu hirak ne’e kompletu, los no prienxe ona rekezitus pagamentu molok submete ba Sekretariadu Tékniku Fundu COVID-19.
  4. Bainhira simu ona pedidu pagamentu husi ministériu implementadór, Sekretariadu Tékniku Fundu COVID-19 sei prosesa dokumentu sira hotu no sei realiza pagamentu ba pedidu pagamentu hirak ne’ebé mak prienxe ona rekezitus pagamentu.
  5. Maibé, molok Sekretariadu Tékniku Fundu COVID-19 realiza pagamentu, kompaña sira hotu tenke kumpre sira nia dever hodi ba selu sira nia impostu rendimentu (income tax) 0,5% husi sira nia totál pagamentu.
  6. Kompaña sira tenke aprezenta sira nia resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál.
  7. Ba pedidu pagamentu hirak ne’ebé mak la-prienxe rekezitus pagamentu, Sekretariadu Tékniku Fundu COVID-19 sei devolve ba ministériu implementadór sira hodi kompleta no submete fila-fali.