• Nota Informativa Relasiona ho Transferénsia Orsamentu ba Rendas no Kustu Operasionál ba Embaixada no Konsuladu Timor-Leste sira iha rai-liur

Home » Anúncios » Nota Informativa Relasiona ho Transferénsia Orsamentu ba Rendas no Kustu Operasionál ba Embaixada no Konsuladu Timor-Leste sira iha rai-liur Imprimir a página

Nota Informativa Relasiona ho Transferénsia Orsamentu ba Rendas no Kustu Operasionál ba Embaixada no Konsuladu Timor-Leste sira iha rai-liur

Dili, 17 Marsu 2021 – Ministériu Finansas hakarak atu esklarese ba públiku relasiona ho transferénsia Orsamentu ba Rendas no Kustu Operasionál ba Embaixada no Konsuladu Timor-Leste sira iha rai-liur.

Diresaun Nasionál Finansas, Ministériu Negósiu Estranjeiru no Kooperasaun (MNEK) submete ona pedidu pagamentu ba Rendas tinan-2021 hamutuk rua-nulu-resin-ida (21) mai iha Diresaun Jerál Tezouru, Ministériu Finansas iha data 16 Marsu, tinan-2021.

Diresaun Nasionál Finansas, Ministériu Negósiu Estranjeiru no Kooperasaun (MNEK) mós submete ona pedidu pagamentu ba Kustu Operasionál ba períodu Janeiru 2021 to’o Juñu 2021 hamutuk ne’en (6) mai iha Diresaun Jerál Tezouru, Ministériu Finansas iha data 17 Marsu, tinan-2021.

Totál pedidu pagamentu ne’ebé mak MNEK submete ona mai Ministériu Finansas hamutuk rua-nulu-resin-hitu (27) no nia detalla mak hanesan tuir-mai ne’e:

  • Pedidu pagamentu ba Rendas hamutuk 21 ba Embaixada no Konsuladu sira hanesan: Brazíl, Konsuladu Atambua (Indonézia), Brunei Darussalam, Kamboja, Kuba (Havana), Mosambike (Maputu), Filipinas (Manila), Koreia du Sul (Seoul), Xina (Beijing), Vatikanu, Estadu Unidos Amérika (Washington DC), Laos, Reinu Unido (Londres), CPLP, Bruxelas, Malázia, Birmánia, Konsuladu Sídnei, Konsuladu Darwin, Novazelándia no Tókiu, Japaun. Totál pedidu pagamentu Rendas, tinan-2021 hamutuk USD 1,540,000.00
  • Pedidu pagamentu ba Kustu Operasionál hamutuk ne’en (6) ba Embaixada no Konsuladu sira hanesan: Nova Iorke, Bruxelas, Vatikanu, Bangkok (Tailándia), Vietname no Jenebra. Totál pedidu pagamentu Kustu Operasionál Janeiru 2021 to’o Juñu 2021 hamutuk USD 564,500.00

Daudaun ne’e, Ministériu Finansas sei prosesa hela pedidu pagamentu hirak ne’e no sei halo pagamentu iha semana ida ne’e nia laran. Ba Embaixada no Konsuladu sira seluk ne’ebé mak la-mensiona iha lista ne’e, sei iha hela prosesu interna MNEK nian.

Ba Konsuladu Timor-Leste iha Sídnei, Ministeriu Finansas hakarak atu esklarese katak, iha Novembru, tinan-2020, Ministériu halo ona transferénsia ba Kustu Operasional Konsuladu Sídnei ho montante USD 20,039. Pagamentu ne’e kuaze devolve dala-tolu (3) ona ho razaun Enderesu Benefisiáriu (Beneficiary Address) la-loos.

Ministériu Finansas mós informa ona ba MNEK atu koordena ho Konsuladu Sídnei hodi fornese enderesu ida ne’ebé los ba iha Banku atu ajuda Ministériu Finansas halo transferensia pagamentu tantu ba Rendas no Kustu Operasionál.

Liuhusi biban ida-ne’e, Ministériu Finansas mós hakarak atu husu ba Konsuladu Jerál Timor-Leste iha Sídnei atu ba informa enderesu atuál iha Banku atu nune’e banku refere bele atualiza informasaun ne’e iha sira-nia sistema. Bainhira problema Enderesu Benefisiáriu (Beneficiary Address) seidauk rezolve, sei difikulta Ministériu Finansas atu transfere pagamentu ba Rendas no Kustu Operasionál tinan-2021 tanbá banku sei devolve fila-fali. Se karik ida ne’e akontese, ida-ne’e la’ós kompetensia Ministériu Finansas nian.

Ministériu Finansas hakarak atu akresenta katak 75% husi prosesu ezekusaun orsamentu desentraliza ona ba iha liña ministériu sira dezde tinan-2017. Prosesu ezekusaun orsamentu ne’e, 25% de’it mak envolve Ministériu Finansas nia parte. Ne’eduni bainhira liña ministériu sira demora prosesu pagamentu husi sira nia parte, sei implika ba prosesu pagamentu tomak.

Ba Ajénsia Autonómu no Munisípiu sira, prosesu ezekusaun orsamentu desentraliza ona 100%. Signifika katak, Ajénsia Autonómu no Munisípiu sira mak realiza pagamentu hotu-hotu diretamente ba iha konta bánkaria benefisiáriu, exeptu saláriu no vensimentu.

-Ramata-