• Oé-Cusse: inísiu husi futuru ida diak ba Timor-Leste

Home » Anúnsiu » Oé-Cusse: inísiu husi futuru ida diak ba Timor-Leste Imprime pájina

Oé-Cusse: inísiu husi futuru ida diak ba Timor-Leste

Timor-Leste hahú tama tan ba iha etapa foun ida iha ninia viajen naruk ba realiza ninia mehi hodi sai nasaun rendimentu médiu-altu ho populasaun ida prósperu, saudável no matenek. Seremónia tranferénsia poder no devolusaun kompeténsia husi Governu Sentral ba Autoridade Administrativa Espesial Oé-Cusse (ARAEO) no Zona Espeial Ekonomia Sosial no Merkadu (ZEESM) sai nuda’ar inísiu ba futuru ida diak, laos deit ba povo atonio Oé-Cusse, maibe mos ba povo tomak Timor-Leste nian.

Seremónia loron rua ne’e hahú ho enkontru Konsellu Ministrus iha 23 Janeiru 2014. Lansamentu primeira pedra ba konstrusaun Monumentu Lifau, Jardim Frente Marítima no Sentru Informasaun Turístika no Kultural realiza iha Sábadu dadér, 24 Janeiru 2015. Projeitu hirak ne’e artiketu/a Timor oan maka dezeña no sei konstrui husi kontrator Timor oan sira. Projeitus hirak ne’e sei remata molok komemorasaun tinan 500 navigador no misionáriu Português sira sama-ain iha Timor-Leste. Seleberasaun ne’e sei halao iha Loron Independénsia – 28 Novembru 2015.

Inisialmente seremónia ofisial tranferênsia poder no devolusaun kompetênsia sei halao iha loro-kraik 24 Janeiru 2015. Maibe tamba udan-bo’ot, seremónia refere adia tiha loron tuir mai. Maske nune’é iha parte loro-raik kontinua ho han-hamutuk ida ne’ebé oferese husi Governu ba delegasaun sira ne’ebé inklui mos Vice Governador Nusa Tenggara Timur (NTT), Vice Jeneral Tentara Nasional Indonesia (TNI), Kapolri NTT, Administrador Atambua no delagasaun Indonesia nian sira seluk.

Seremónia ofisial tranferênsia poder no devolusaun kompetênsia, ne’ebé realiza iha Domingu, 25 Janeiru 2015 iha Oé-Cusse, Ambeno ne’e, atende husi Primeiru Ministru, membru Governu hotu, membru Parlamentu Nasional, Prokurador Jeral, Presidente ARAEO, Komisariu KAK, Jeneral F-FDTL, Korpu Diplomátiku, funsiunáriu públiku, seitor privadu, nai-lulik, ONGs no mos povo atoni Oé-Cusse. Seremónia refere hahú ho hananu hinu nasional, tuir kedan ho lia-nain sira halo kuku, bensaun husi nai-luluk no hafoin dansa trandisional husi feto Oé-Cusse.

Dr. Mari Alkatiri, Prezidente ARAEO, iha nia diskursu hateten Lei Nu.03/2014, tuir Konstituisaun Repúblika, fo dalan atu kria ARAEO no estabelese ZEESM. Nia mos akresenta katak “estatutu espesial Oé-Cusse la signifika separasaun total husi Timor-Leste, maibé Oé-Cusse sei sai hanesan polo dezenvolvimentu hodi kontribui diak liutan ba dezenvolvimentu nasaun tomak”. Nia argumenta katak transferênsia poder no devolusaun kompetênsia simplesmente signifika Governu Central hakbesik-an liu tan ba povo Oé-Cusse hodi hakbi’it sira atu sai polo ba dezenvolvimentu nasaun nian. Nia mos hameno katak “dezafiu barak maka sei hein ita. Dezafiu hirak ne’e la bele dada ita ba kotuk, maibe halo ita prepara-an liu tan hodi hasoru dezafiu foun”.

Iha bibán hanesan Primeiru Ministru, Kay Rala Xanana Gusmão, iha nia diskursu husu ba Oé-Cusse oan sira atu neon-nakloke no partisipa ativamente iha prosesu dezenvolvimentu ida ne’e. Nia enkoraja povu tomak atu servisu hamutuk hodi identifika dezafiu, hadiak no hakbi’it sira nia-an atu preparadu hodi hasoru dezafiu foun iha futuru.

Nia fo hanoin ba Oé-Cusse oan sira katak tinan 40 liu ba sira hananu “ami povu atoni sai atan ba bebeik”.

Nia husu ba sira atu husi ohin ba oin sira hananu ai-knanoik foun “ohin ami povu atoni hakarak servisu makas hodi dezenvolve rai Ambeno sai diak ba ami oan no bein-oan sira”. Primeiru Ministru remata ninia diskursu ho mensajen importante ida ne’e – “fiar a’an lao ba oin tamba hamutuk ita bele dezenvolve ita nia nasaun husi baze hodi halo mudansa ba futuru povu nian”.

Tinan 500 liu ba navegador no misionariu Português tama uluk iha rai Oé-Cusse molok kontinua sira nia esplorasaun no haklaken lian-maksoin ba rai seluk iha Timor-Leste. Ohin Oé-Cusse dala ida tan sai hanesan inísiu ba futuru ida diak hodi sai polo ida ba dezenvolvimentu Timor-Leste. Oé-Cusse simplesmente “o início e o futuro”.