• OJE Promove Kresimentu Ekonómia

Home » Anúnsiu » OJE Promove Kresimentu Ekonómia Imprime pájina

OJE Promove Kresimentu Ekonómia

Vice-Ministra Finansas Sra. Sara Lobo Brites

Ministra Finansas Interina i Atuál Vise-Ministra Finansas Sara Lobo Brites hateten orsamentu jerál estadu ne’e importante hanesan makina ne’ebé maka promove ita nia kresimentu ekonómiku iha rai laran.

“Ida ne’e atu hatudu mai ita katak, kresimentu enkonómia rai laran iha relasaun ne’ebé makas ho ita nia Orsamentu Jerál Estadu. Wainhira ita nia Orsamentu Jerál Estadu iha aumentu kada tinan maka nia kontribui diretamente ba ita nia kresimentu enkonómiku. Wainhira ita nia Orsamentu reduzidu ka orsamentu la iha tinan ida nia laran maka nia kontribui kedas ba kontrasaun ne’ebé maka ita hare’e iha 2017 no 2018”, informa Ministra Finansas Interina i Atuál Vise-Ministra Finansas, Sara Lobo Brites iha Novu Turismu bainhira sai oradór ba iha Semináriu Panorama Orsamentál 2021 iha loron 4 Fulan-Outobru 2020.

Molok Há’u atu tama ba iha Orsamentu Jerál Estadu, Há’u hakarak lori deputadu sira ba iha prespektiva makro ekonómia tinan 2021. Hanesan iha slide aprezentasaun historiál deste 2010 to 2018 ita nia kresimentu ekonómiku demostara tun no sa’e. Purtantu ida ne’e ita haree 2010 kresimentu ida ne’ebé maka sa’e ho Produtu Internu Brutu (PIB) taxa de kresimentu 9.5 no iha 2012 iha 6.0 pursentu.

Governante ne’e esplika, iha Orsamentu Jerál Estadu 2021 ita aposta ba iha metas makro enkonómiku importante ita nia kresimentu PIB bele sa’e 3.9 %. Ida ne’e ita preve atu bele iha melloria ne’ebé sei rekopera fali husi taxa kresimentu ekonómia negativu hanesan -3.8 % iha 2017 menus -1 % iha 2018 nune’e mós previstu atu negativu -6 % iha 2020.

“Exseptu iha tinan 2019 ne’ebé maka ita hetan kresimentu pozitivu 1.6 %, ida ne’e metas ne’ebé maka ita hakarak atinzi husi ita nia Orsamentu Jerál Estadu ba 2021”, informa Governante.

Hanesan ohin Há’u hateten ona PIB non-petrolíferu sei negativu iha -6 % iha 2020 no negativu ne’e mai husi efeitu sira despezas publikas ne’ebé maka reduzidu teb-tebes nomós situasaun inserteza polítika. Depois kontribui liutan husi pandemia Covid-19 ne’ebé implementa liuhusi medida estadu emerjensia sira.

“Fatores sira ne’e kontribui makas ba iha ita nia kresimentu ekonómiku 2020 ne’ebé maka tuir Banku Central preve katak sei iha kontrasaun purvolta -6% ”, dehan Governante.

Ministra Finansas Interina i Atuál Vise-Ministra Finansas, Sara Lobo Brites reforsa tan Orsamentu tinan 2021, Produtu Internu Brutu (PIB) non petrolíferu akrese ba 3.9 % ne’e kontribui iha investimentu setór privadu no konsumu uma kain ne’ebé sei aumenta iha orsamentu 2021.

Fator seluk ne’ebé bele kontribui ba ita nia kresimentu maka inflasaun. Iha 2020 ita rezista iha inflasaun ida ne’ebé maka ki’ik 0.7 % no iha 2021 ita preve katak sei kontinua menus husi 3 %.

“Ho inflasaun tu’un sei kontribui pozitivu ba ita nia kompetetividade iha ita nia ekonómia rai laran, tanba ba iha inflasaun ne’ebé maka ki’ik iha nível rejional no rejiuan”.

Ministra Interina mós reforsa tan, Ita sei estimula konsumu uma kain ba Orsamentu publiku nune’e mós ita nia alokasaun Orsamentu ba infrestrutura baziku nomós infrestrutura estrateziku sira sei kontribui oinsa diversifika ita nia ekonómia. Ida ne’e fator sira ne’ebé maka sei kontribui ba ita nia kresimentu enkonómia. Fatór seluk maka ambiente ne’ebé maka kondusivu, ita hotu hatene katak estabilidade polítika ne’e importante teb-tebes ba investimentu. Wainhira ita iha ambiente ida ne’ebé maka kondusivu bele promove investór sira atu investe iha ita nia rai laran.

“Tuir fali ba iha Planu Rekoperasaun Enkonómia, impaktu husi Covid-19 Governu mós fó atensaun tebes ba oinsa maka atu bele kontinua nafatin asegura prevensaun ba iha Covid-19 nomós reforsa nafatin setór privadu sira mantein sira nia negosiu ka rekopera fali iha tinan 2021”.

Governante ne’e esplika, Ita kolia ba fatór externu bele kontribui ba ita nia ekonómia rai laran, presus merkadoria bele mós kontribui ba ita nia taxa inflasaun iha rai laran. Tanba ita hatene Timor-Leste depende lós ba importasaun, ita la du’un produs no la du’un exporta. Entaun mudansa presu iha merkadu internasionál bele fó impaktu ba produtu iha rai laran. Fatór seluk maka moeda, ita uza dólar amerika nia kontribui tebes liu-liu iha nível rezional kompara ita nia parseiru merkadu sira. Entaun benifisu ida ne’ebé maka ita hetan ho ita nia moeda ne’ebé maka apresia iha merkadu.

“Apesiasaun ba dólar amerika mós kontribui ba ita nia reseitas minarai, Wainhira dólar amerika folin diak reseitas minarai mós iha aumentu”, reforsa Governante.

Maibé ita hotu-hotu konsiente katak, metas makro enkonómia ne’ebé ohin ita aposta durante situasaun Covid-19 ne’ebé inserteza sai mós preokupasaun ita hotu-hotu nian.

“Ita bele planu diak wainhira pandemia global ida ne’e seidauk mate no nafatin afeta ita nia nasaun vizinu sira ida ne’e sei fó nafatin impaktu ba ita nia ekonómia rai laran”.

Sein vasina maka sei limita ema nia movimentu i ho medida sira ne’ebé maka ita implementa durante estadu emerjensia atu halo prevensaun ba Covid-19 bele fó impaktu ba ita nia ekonómia iha tinan oin.