• Papel Ministériu Finansas iha seitor bancaria ba dezenvolvimentu ekonómia Timor-Leste

Home » Anúnsiu » Papel Ministériu Finansas iha seitor bancaria ba dezenvolvimentu ekonómia Timor-Leste Imprime pájina

Papel Ministériu Finansas iha seitor bancaria ba dezenvolvimentu ekonómia Timor-Leste

3032017-b

Estudante Institute of Business (IOB)organiza seminariu ida ne’ebe mak konvida husi parte Governu liu husi Ministériu Finansas no bancaria inklui Banco Central Timor-Leste (BCTL) no Banco Nacional Comercial Timor-Leste (BNCTL) hodi hasa’e konhecimentu estudante sira konaba “Papel seitor bancaria iha dezenvolvimentu seitor ekonómia no fila liman iha Timor-Leste” ne’ebe mak realiza iha Salaun Ekontru Kampus C IOB, Delta 3 (29/03/2017).
Ministériu Finansas nia papel mak atu halo polítika fiskal para kontribui ba dezenvolvimentu iha seitor industria bankaria ka finanseira no mos dezenvolvimentu ekonómiku no papel polítika fiskal mak hanesan atu kolekta reseitas no mos oinsa atu asegura efisiensia no efikaz iha despezas públika, haktuir Vice Ministru Finansas, Sr. Helder Lopes.
Vice Ministru ne’e esplika mos katak sobre reforma fiskal ne’ebe Ministériu Finansas agora daudaun halo hela tamba iha preokupasaun husi públiku, ba ita nia dependensia fundus minarai ne’e maka’as tebes no ita halo oinsa para bele hetan tan reseitas husi seitor seluk hodi nune’e bele sustenta tan ita nia orsamentu estadu, no mos reforma saida mak ita halo ho nia efeitu ba aban bainrua nian.
Alem de ne’e, Sr. Helder mos realsa liu tan konaba fundu petroliferu, tamba osan ne’e osan públiku no alin sira ne’e hanesan futuru ida sira tenki hatene jestaun osan ne’e no oinsa ita atu dada osan ne’e tuir lei haruka.Tuir relatoriu ikus husi Banku Central iha fulan Janeiru ne’e balansu osan fundu petroliferu nian US$16 miloens.
Hatan ba preokupasaun husi estudante sira konaba dependensia ba fundu minarai, Vice Ministru informa katak estratéjia ne’ebe mak agora governu halo mak polítika front loading fiscal policy, ne’e katak tamba ita sei iha problema infrastrutura báziku, Rekursus Humanus, saúde, edukasaun, kiak no problema sira seluk ho nune’e liu husi polítika front loading fiscal policy ne’e governu hatete katak ita ba foti osan husi fundu minarai no aumenta osan oituan husi impostu nian para resolve tiha lai problema hirak ne’e. Kuandu ita la gasta osan ita sei labele resolve problema hirak ne’e. Depois wainhira osan hotu ona, ita tenki fila fali ba dada osan husi fundu iha nivel sustentabilidade, labele dada liu ida ne’e. Ida ne’e mak polítika ne’ebe agora Governu opta.
Governante ne’e afirma liu tan, lei fundu petroliferu nebe mensiona katak kada tinan Governu so bele foti deit osan husi fundu petroliferu 3%, maibe kuandu Governu bele justifika ba Parlamentu Nasional (PN) katak dada liu 3% atu halo saida serteja ida ne’e PN sei diskute hodi aprova, Governo bele dada no aplika polítika front loading ne’e.

Iha fatin hanesan, Reitor IOB, Sr. Augusto Soares hateten katak, seminariu ne’e hanesan inisiativa estudante IOB atu hatene klean liu tan konaba papel governu no bancaria sira ba iha dezenvolvimentu seitor ekonomia no fila liman iha Timor-Leste.
Seminariu ne’ebe interesante tebes nebe marka prezensa husi orador nain tolu mak hanesan Sr. Helder Lopes, Vice Ministru Finansa, Dr. Brigido de Sousa, Diretor Banco Nacional Comercial Timor-Leste (BNCTL) no Sra. Nur Alkatiri, Vice Governador Banco Central Timor-Leste (BCTL).Alem de estudante IOB rasik, hola parte mos estudante husi Universidade seluk hanesan Universidade Nacional Timor Lorosa’e (UNTL), Universidade Oriental Timor Lorosa’e (UNITAL), Universidade da Paz (UNPAZ), Universidade Dili (UNDIL) no Instituisaun Superior Canossa.