• Parlamentu Nasionál aprova iha Jeneralidade Proposta de Lei Enkuadramentu Orsamentu Jerál Estadu no Jestaun Finanseira Públika

Home » Announcements » Parlamentu Nasionál aprova iha Jeneralidade Proposta de Lei Enkuadramentu Orsamentu Jerál Estadu no Jestaun Finanseira Públika Print Page

Parlamentu Nasionál aprova iha Jeneralidade Proposta de Lei Enkuadramentu Orsamentu Jerál Estadu no Jestaun Finanseira Públika

Parlamentu Nasionál liuhosi sesaun plenária iha loron 6 fulan-Jullu tinan 2021, aprova ona iha Jeneralidade Proposta de Lei n.º 27/V/3ª – Enkuadramentu Orsamentu Jerál Estadu no Jestaun Finanseira Públika, ho 37 votu a favor (61%), 12 kontra no 11 abstensaun.

Hafoin aprovasaun iha jeneralidade, plenária mós delibera diskusaun espesialidade ba Proposta Lei refere iha Komisaun C, Parlamentu Nasionál ne’ebé trata asuntu Finansas Públikas ho 44 votu a favor (72%), 0 kontra no 17 abstensaun. Razaun delibera diskusaun espesialidade ba Komisaun C tanba konteúdu Proposta de Lei ne’ebé kompleksu tebes atu nune’e bele fó enfaze ba kualidade husi Proposta de Lei refere molok submete filafali ba iha Plenária ba diskusaun aprovasaun finál globál.

Sesaun plenária ne’e prezide husi Prezidente Parlamentu Nasionál, Sua Exelénsia Aniceto Longuinhos Guterres Lopes, akompaña husi membru-sira husi Meza Parlamentu Nasionál, ho prezensa husi Ministru Finansas, Rui Augusto Gomes no Vise-Ministra Finansas, Sara Lobo Brites ne’ebé hanesan proponente ba Proposta de Lei refere. Ministru Finansas no Vise-Ministra Finansas mós akompaña husi ekipa tékniku Ministériu Finansas.

Ba oin, Ministériu Finansas hein konvite husi Komisaun C Parlamentu Nasionál ne’ebé trata asuntu Finansas Públikas atu halo diskusaun espesialidade iha tempu badak nia laran hodi hetan entendimentu di’ak tantu iha nível Parlamentu no mós iha nível entre Parlamentu no Governu.