• Parlamentu Nasionál aprova iha Jeneralidade Proposta Lei OJE 2022 ho votu a favór 68%

Home » Announcements » Parlamentu Nasionál aprova iha Jeneralidade Proposta Lei OJE 2022 ho votu a favór 68% Print Page

Parlamentu Nasionál aprova iha Jeneralidade Proposta Lei OJE 2022 ho votu a favór 68%

Díli, 3 dezembru 2021 – Parlamentu Nasionál liuhosi sesaun Plenária iha loron 3 fulan-dezembru, aprova ona iha Jeneralidade Proposta Lei númeru 35/V (4ª) – Orsamentu Jerál Estadu 2022, ho 44 votu a favor (𝟔𝟖%), 0 kontra no 21 abstensaun.

Sesaun debate jeneralidade ba Proposta OJE 2022 ho montante billiaun $1,675 hahú husi loron 1 to’o loron 3 fulan-dezembru. Ho aprovasaun ne’e, Parlamentu Nasionál no Governu sei kontinua ba diskusaun espesialidade iha loron 6 to’o loron 17 fulan-dezembru.

Sesaun Plenária ne’e prezide husi Prezidente Parlamentu Nasionál, Sua Exelénsia Aniceto Longuinhos Guterres Lopes, akompaña husi membru-sira husi Meza Parlamentu Nasionál, ho prezensa husi Sua Exelénsia Primeiru-Ministru, Jenerál Taur Matan Ruak, Ministru Finansas, Rui A. Gomes, Vise-Ministra Finansas, Sara Lobo Brites no membrus Oitavu Governu Konstitusionál. Ministru Finansas no Vise-Ministra Finansas hetan akompañamentu husi Diretór Jerál, Diretór Nasionál no Tékniku-sira husi Ministériu Finansas.

Proposta Lei OJE 2022 ne’ebé Governu aprezenta ba Parlamentu Nasionál mak proposta ida ne’ebé firme no responsável. Firme tanba Proposta ne’e adopta medidas nesesáriu atu relansa ekonomia nasionál no atu hasa’e kresimentu ekonomia hafoin tinan ida hetan xoke husi pandemia Covid-19 no inundasaun grave ne’ebé mak akontese iha fulan-abril liubá. Responsável tanba Proposta ne’e koloka finansas públiku iha dalan ida ne’ebé sustentavel, redus levantamentu osan husi Fundu Minarai atu prezerva Timor-Leste ninia rikeza iha Fundu Soberanu ba jerasaun sira tuir-mai.

Proposta ne’e nu’udar kontinuidade husi kompromisu polítiku Oitavu Governu Konstitusionál ho sidadaun Timoroan sira, to’o mandatu ramata iha tinan 2023. Iha Proposta ne’e, Governu define objetivu haat (4) ne’ebé mak Governu hakarak alkansa iha tinan oin: 1) Atu kombate pandemia ne’ebé kauza husi Covid-19; 2) Atu proteje sidadaun sira; 3) Atu rekupera ekonomia no kria empregu; 4) Tinan 2022 haree hanesan tinan rekuperasaun ba pandemia Covid-19. ***