• Planu Realokasaun Komunidade ne’ebé Hela iha Area Konstrusaun Portu Baia Tibar

Home » Anúncios » Eventos » Planu Realokasaun Komunidade ne’ebé Hela iha Area Konstrusaun Portu Baia Tibar Imprimir a página

Planu Realokasaun Komunidade ne’ebé Hela iha Area Konstrusaun Portu Baia Tibar

Governu liu husi Ministeriu Finansas, Ministeriu Obras Públika, Transporte & Komunikasaun, no Sekretariu Estadu Terras & Propriedades hala’o enkontru ho komunidade kona ba Planu Asaun Realokasaun (PAR) ba komunidade ne’ebé hetan afeta husi implementasaun projetu PPP Portu Baía Tibar, Liquiçá 19/09/2016.

Iha eventu ne’e, Vise Ministru Finansas, Sr. Helder Lopes, hateten governu liu husi Planu Estrateziku Dezenvolvimentu Nasionál alista kriasaun kondisoens diak hanesan komponente ida ba ita nia dezenvolvimentu ekonómiku. Parte ida husi kriasaun kondisaun diak ne’e mak harii portu ne’ebé adekuadu hodi fasilita komersiu internasionál. Tuir planu, portu refere sei subtitui Portu Dili ne’ebé iha realidade labele akomoda ona aktividades ekonomika nebe iha. Vice Ministru Finansas mos hatutan tan katak estabelesementu portu ne’e atu fasilita atividade importasaun no exportasaun ne’ebé sei aumenta iha futuru hodi kontribui ba dezenvolvimentu ekonomiku iha rai laran.

Alem de fo benefisiu ekonomiku, Portu Tibar mos sei fó benefisiu sosiál em termus de retornu sosiál ba povu. Atu asegura implementasaun Portu Tibar no haktuir kontratu entre Governu no seitor privadu, presija planu realojamentu ida ho objetivu atu prepara fatin ba implementasaun projetu refere no mos asegura prosesu realojamentu lao tuir Lei ne’ebé vigora no padraun internacional ne’ebé aplikavel.

Iha biban ida ne’e, Ministru Obras Públika, Transporte, no Komunikasaun, Sr. Gastão Sousa, hatutan katak kualker dezenvolvimentu iha rai ida sempre iha impaktu ba povu nia moris no ambiente, maibé iha mos benefisiu bo’ot husi dezenvolvimentu ne’e. Relasiona ho ida ne’e, Ministru husu kolaborasaun komunidade nian liu-liu populasaun sira ne’ebé moris iha area designadu ba projetu ne’e. Ministru mos husu lideransa komunitaria no Administrador Munisipiu Liquiça ne’ebé marka prezensa iha konsultasaun ne’e, atu servisu hamutuk hodi nune implementasaun projetu Portu Tibar bele lao ho susesu hodi bele fo benefisiu ba povu iha tempu naruk.

Iha tempu hanesan, Secretario Estado Terras & Propriedades, Sr. Jaime Xavier Lopes, mos esplika katak prosesu levantamentu ba PAR ne’e hahu iha 2014 ne’ebé involve ajensia husi multi-ministerial hodi servisu hamutuk hanesan Ekipa ba Planu Involvementu Parseiru – inklui servisu kadastrais, census sosio-ekonomiku ba populasaun ne’ebé potensialmente sei afeita, no inventoriu detalhu ba propriedade ne’ebé sei lakon. Secretario Estadu mós hatutan tan katak DNTPSC determina ona fatin ba komunidade ne’ebé lakon asesu ba peska atu muda no fatin determinadu ne’e iha Ulmera.

Konsultasaun ne’e hetan partisipasaun masimu husi komunidade afetadu, autoridade lokal sira no ministeriu relevante. Iha fatin ne’e, komunidade afetadu sira mós iha oportunidade hodi hato’o sira nia lamentasaun no sujestaun. Governu liu husiLamentasaun no sujestaun hirak ne’e hetan resposta no konsiderasaun diretamente husi governu liu husi ministeriu relevante ne’ebé marka prezensa iha neba. Ikus liu, Ministru Obras Publika, Transporte no Komunikasaun sublinha atu kontinua kolaborasaun diak ne’ebé iha durante ne’e, no informa populasaun atu hakbesik an ba governu wainhira iha duvidas relasiona ho projetu ne’e.