• PN Aprova Ona Proposta Governu Ba Autorizasun Transferência Daruak FP

Home » Announcements » PN Aprova Ona Proposta Governu Ba Autorizasun Transferência Daruak FP Print Page

PN Aprova Ona Proposta Governu Ba Autorizasun Transferência Daruak FP

20200624_PN Aprova Ona Proposta Governu Ba Autorizasun Trasferensia Daruak FP - editado por DGuterres

Governu liu husi Ministériu Finansas no Ministériu Assuntus Parlamentares no Komunikasaun Sosiál hala’o ona diskusaun plenária ho membru Parlamentu Nasionál sira hodi aprova proposta lei kona-ba autorizasaun ba transferência extraordinária daruak husi Fundu Petrolíferu (FP) ho montante US $ 286.8 milhões.

Tuir Ministru Finansas Fernando Hanjam, razaun Governu apresenta proposta lei ida ne’e ho objetivo rua: ida, autorizasaun ba transferência extraordinária husi Fundu Petrolíferu (FP); no rua, prosede alterasaun dahuluk ba lei nº 2/2020 iha loron 6 fulan Abril kona-ba autorizasaun transferência extraordinária husi Fundu Petrolíferu.

“Uainhira Orsamentu Jerál Estadu (OJE) ba tinan 2020 seidauk tama iha vigor Governu recorre ba reseitas fiscais no saldo tinan anterior nian hodi finansia despezas públicas”, informa Ministru Finansas Fernando Hanjam, iha Parlamentu Nasionál iha loron 22 de Junho 2020.

Reseitas sira kompleta ho transferência extraordinária husi Fundu Petrolíferu US $ 250 milhões ne’ebé autoriza husi Parlamentu Nasionál liuhusi lei nº 2/2020 iha loron 6 fulan Abril. Maibé produtu husi reseitas sira ne’e só premite de’it finansia administrasaun públika regular nian to’o fulan Agostu tinan finanseiru 2020 de’it.

Governante ne’e esplika, levantamentu la sufisiente to’o OJE 2020 tama em vigor. Tanba ne’e, iha nesesidade Governu hakat mai iha Parlamentu Nasionál hodi husu tan autorizasaun ba transferência extraordinária husi Fundu Petrolíferu ho montante US $ 286.8 milhões.

“Levantamentu ida ne’e atu garante kontinuidade funsionamentu instituisaun estadu nian no assegura pagamentu obrigasaun legál no kontratuál sira ne’ebé estadu assume ona no garante saldo iha Tesouru labele menus husi US $ 200 milhões”, informa Ministro das Finanças.

Votasaun finál globál ba proposta lei nº 17/V/ (2a) ne’ebé autoriza ba realizasaun transferência extraordinária daruak husi Fundu Petrolíferu iha tinan finanséiru 2020 no prosede ba primeira alterasaun ba lei nº 2/2020 iha loron 6 fulan Abril.

Ho rezultadu votasaun finál global ba proposta lei refere “a-favór 43, kontra 0, no abstensau 18 ho nune’e proposta lei n0 17/V/ (2a) aprovadu”, deklara Prezidente Parlamentu Nasionál (PPN) Aniceto Guterres iha salaun plenária.

Prezidente Parlamentu ne’e informa katak, aban Komisaun C ne’ebé trata asuntus finansas públikas no Ministériu Finansas sei finaliza redasun finál no sei manda kedas ba Prezidente Repúblika hodi promulga.