• Pontus ba Situasaun Aktual Sistema Jestaun Finansas Públika

Home » Anúnsiu » Pontus ba Situasaun Aktual Sistema Jestaun Finansas Públika Imprime pájina

Pontus ba Situasaun Aktual Sistema Jestaun Finansas Públika

Dili, 18 Outubru 2018

Kauza ba atrazu sira iha iha Sistema tanba tékniku sira presija tempu hodi halo ajustamentu iha sistema tanba iha periode DOT utiliza estruturas Governu anterior, enkuantu iha OGE 2018 Annual mai ona ho estruturas foun VIII-Governu nian, nune’e iha periode ne’e presija konsidera aspektu prosesual sira hanesan:

1. Liñas Ministeriais ne’ebé maka foun (Presija kria kódigu Chart of Account foun).
2. Liñas Ministeriais ne’ebé tau hamutuk (Merger) katak anteriormente ketak-ketak maibé agora hamutuk.
3. Liñas Ministerias ne’ebé hafahe (Split) katak anteriormente hamutuk maibé agora ketak-ketak.
4. Liñas Ministeriais no Instituisaun sira ne’ebé taka katak la existe ona iha estrutruras VIII- Governo.

Relasiona ho issu hirak ne’ebé espalha iha públiku katak, agora dau-daun sistema iha Ministériu Finansas lao ladún diak ho nune’e, Ministériu Finansas hakarak klarifika ba públiku katak sistema diak hela no loke fila fali ona ba públiku hahú husi loron segunda-feira, 08 Outubru 2018, ho asesu limitadu ba deit instituisaun sira ne’ebé sira nia instituisaun laiha problema ka issu maibé, instituisaun sira ne’ebé afetadu ka iha issu ekipa tékniku Ministériu Finansas /Free Balance kontinua halo hela ezersísiu no esforsu tékniku maka’as no la para hodi solusiona.

Servisu tékniku sira ne’ebé konsidera no tenke lao tuir antes loke Sistema maka hanesan tuir mai ne’e:
• Aktualizasaun Código Chart of Account (CoA Elements) foun ba Sistema GRP (tuir Organica VIII-Governu)
• Desativa (In active) Código Chart of Account tuan refere tuir estrutura DOT iha sistema
• Halo rekonsiliasaun entre dadus OGE 2018 Annual vs Gastus (Komitmentu, Obligasaun no Aktual) husi DOT atu evita over spending iha nivel tolu (Allot 1, Allot 2 no Financial Budget ba kada instituisaun)
• Halo Mapamentu ba dadus pesoal payroll husi Código Chart of Account tuan ba Chart of Account foun ba employee hamutuk 39 mill.
• Halo ezersísiu preparasaun ba data Migrasaun husi Código tuan ba foun ba ba tranjaksaun (Komitmentu, Obligasaun no Aktual), sira maka hala’o ona iha periode Janeiru to’o Setembru 2018, tau konsiderasaun maka’as ba Ministériu ne’ebé inisialmente ketak-ketak maibé ikus mai tau hamutuk (merger) no Ministériu ne’ebé inisialmente hamutuk maibé hafahe (Split).
• Desativa (Inactive) ba Instituisuan sira ne’ebé hetan negativu tanba alokasaun OGE annual menus husi DOT iha Allot 2 no Allot 1
• Aktualiza budget control update voucher ba instituisaun sira afetadu hanesan utiliza Código Chart of Account sala, Orsamentu menus no seluk-seluk tan.

Husi prosesu sira mensiona iha leten hakarak freza no klarifika iha ne’e katak laos problema ho Sistema maka Ministériu Finansas fó asesu limitadu ba user sira maibé Ministériu Finansas presija teb-tebes atu halo rekonsiliasaun dadus entre OGE 2018 no DOT Janeiru to’o Setembru 2018 ne’ebé iha estruturas no organica diferente.

Informa mós ba públiku katak Ministériu Finansas konsiente asuntu ida ne’e nu’udar prioridades no importante tebes tanba ne’e mak tékniku Ministériu Finansas halo servisu extra ordinariu tebes katak 24 horas kada loron (servisu husi bomdia to’o bomdia) hodi resolve no finaliza issu sira ne’e, nune’e kada instituisaun bele hahú hikas sira nia ezekusaun hanesan normal.
REMATA

Mak ne’e deit klarifikasaun ne’ebé ami hato’o ba públiku nia informasaun. Atu hetan informasaun klaru liu, bele kontaktu

Joanico Pinto
Xefe USIIGF
Ministériu Finansas
+670 7732 6658
jpinto@mof.gov.tl

Agostinho Castro
Xefe Gabinete Komunikasaun no Informasaun
Ministériu Finansas
+670 7723 0124
acastro@mof.gov.tl