• KIAK MENUS IHA TIMOR-LESTE

Home » Anúnsiu » KIAK MENUS IHA TIMOR-LESTE Imprime pájina

KIAK MENUS IHA TIMOR-LESTE

Resultadu Peskiza Hatudu Katak Iha Aumentu ba Padraum Moris Uma-Kain Sira Nian

Dili, 28 Setembro 2016 – Bazeia ba resultadu peskiza kona-ba “Padraun Moris iha Timor-Leste” iha 2014, kiak iha Timor-Leste uza linha kiak nasional tuun husi 50.4% iha 2007 ba 41.8% iha 2014. Ida nee signifika katak iha aumento ba numero timor-oan nebe nia padraun moris diak kompara ho tinan 2007

Peskiza nee mos indika katak wainhira uza linha kiak internasional, kiak iha Timor-Leste tuun husi 47.2% iha 2007 ba 30.3% iha 2014. Nee signifika katak prosesu redusaun kiak iha Timor-Leste lalais liu kompara ho nasoens seluk.

Helder Lopes, Vice Ministro Finansas hateten katak“resultadu peskiza ida nee importante atu sukat progressu husi esforsu governu nian hodi reduz kiak. Nunee mos resultadu ida nee indika mai ita kona ba too iha nebe ona ita nia dezenvolvimentu no areas nebe mak ita presiza kontinua fo prioridade”
Peskiza nee halao husi Abril 2014 too Abril 2015 no intervista uma-kain hamutuk 5,916 iha Munisipios tomak iha Timor-Leste. Peskiza nee husu uma-kain sira kona-ba sira nia abilidade atu sosa sasan, hanesan aihan, uma, ropa no transporte.

Elias dos Santos Pereira, Diretor Jeral Estatistika hateten katak “resultadu peskiza nee fo informasaun diak ba governu hodi halo politika ba programa nebe diak. Pur ezemplo, governo presiza informasaun nee hodi deside kona-ba servisu setor publiku nian nebe sei selu husi povu tuir sira nia kapasidade kompras”.

Resultadu redusaun kiak nee suporta mos ho resultadu husi indikadores dezenvolvimentu balun nebe hatudu progresu signifikativu durante periodu 2007 no 2014. Iha progresu kona-ba asesu ba nesesidades basikas, hanesan asesu ba eletrisidade, saneamentu no be mos; edukasaun ba labarik sira; no atendimetu saude. Nunee mos, iha aumentu signifikativu ba numeru timor-oan nebe iha no utiliza telephone, televizaun, motorizada, no aparelhu sira seluk.

Bolormaa Amgaabazar, representante Banku Mundial iha Timor-Leste dehan “peskiza ida nee hatudu katak iha aumentu makaas ba abilidade atu sosa husi uma kain sira. Ita bele haree ida nee iha areas rurais no urbana iha Timor-Leste tomak”.

Peskiza ida nee iha kualidade no tuir padraun internasional tamba iha involvimentu perito sira husi Banku Mundial.

Helder Lopes, dehan tan katak “redusaun kiak no aumentu iha padraun moris uma kain nian nee resultadu dezenvolvimentu nebe ita tenki apresia no orgulhu. Maibe ida nee la signifika katak kiak iha ita nia rai hotu ona, sei iha buat barak nebe ita presiza kontinua halo hamutuk hodi asegura katak Timor-oan hotu-hotu moris ho prosperu no partisipa iha dezenvolvimentu rai ida nee atu sai nasaun nebe riku”.

Governu ho suporta husi parseiros tomak kompremitidu atu kontinua servisu hamutuk hodi hamenus kiak iha Timor-Leste.

Kona-ba Peskiza Padraun Moris Timor-Leste
Peskiza Padraun Moris Timor-Leste (PPMTL) 2014 nudar kontinuasaun husi peskiza PPMTL nebe hala’o ona iha tinan 2007 no 2014 husi Diresaun Jeral Estatistika ho asistensia teknika husi Banku Mundial. Peskiza ida nee foku ba oinsa atu hetan resultadu ho kualidade diak nebe sei fornese informasaun proprio atu monitoriza padraun moris no atu dezenha politika publika nebe diak hodi aumenta padraun moris povu nian iha Timor-Leste

Indikadores Prinsipais Seluk:
• Uma-kain nebe asesu ba eletrisidade: 36% iha 2007 sae ba 72% iha 2014
• Uma-kain nebe asesu ba saneamentu diak: 42% iha 2007 sae ba 60% iha 2014
• Uma kain ho oan sira eskola hotu: 58% iha 2007 ba 83% iha 2014
• Uma kain nebe ho labarik idade menus tinan 5 nebe nia todan normal: 65% iha 2007 sae ba 84% iha 2014
• Uma kain ho labarik idade menus tinan 5 ho a’as/altura normal: 62% iha 2007 ba 76% iha 2014.

Saida mak Persentajen Kiak Uza Linha Kiak Nasional?
Persentajen kiak uza linha kiak nasional hatudu kona-ba persentajen populasaun nebe nia kondisaun moris menus husi linha kiak ka padraun moris Timor-Leste nian. Informasaun ida nee importante ba governu atu uza hodi halo programa proprio ba redusaun kiak

Saida mak Persentajen Kiak Uza Linha Kiak Internasional?
Persentajen kiak uza linha kiak internasional hatudu kona-ba persentajen populasaun nebe nia kondisaun moris menus husi linha kiak nia okos bazeia ba padraun internasional. Informasaun nee importante atu kompara kiak iha Timor-Leste ho nasaun seluk. Resultadu hatudu katak persentajen kiak iha Timor-Leste uza linha kiak internasional kiik kompara ho persentajen kiak uza linha nasional.

Favor klik iha NE’E atu haré relatório detalha liu tan