• Konferensia Imprensa Ba Serimónia Lansamentu e-Request

Home » Anúnsiu » Konferensia Imprensa Ba Serimónia Lansamentu e-Request Imprime pájina

Konferensia Imprensa Ba Serimónia Lansamentu e-Request

Autoridade Tributária Timor-Leste (ATTL) husi Ministériu Finansas dala ida tan marka momentu históriku hodi lansa e-Request ne’ebé hola parte iha plataforma ba e-Services.

“nudar Vice-Ministra Finánsas, ne’e hanesan previléziu ida mai hau tamba lansamentu Certidão de Dívidas (CD) online liu husi e-Request hanesan passu markante ida iha ámbitu Programa Reforma maka Autoridade Tributaria (AT) alkansa iha sira nia esforsu atu kaer rasik Reforma hodi kontinua halo melloramentu ba prestasaun servisu AT nian. Hanesan ita hotu akompaña, Programa Reforma Fiskál hahu husi kedas iha VI Gov. no transformasaun ne’ebé konsegue alkansa iha tempu ne’ebá maka mudansa Estatuto Diresaun Jerál Impostu no Diresaun Jerál Alfandega eleva ba Autoridade Tributária no Autoridade Aduaneira” hateten Vice-Ministra Finánsas Sra. Sara Lobo Brites iha loron 10 jullu 2020 iha auditóriu MF.

S.E. Sra. Vice-Minístra mos akresenta liu-tan katak “nesesidade hodi halo Reforma ba Diresaun rua ne’e tambá ita nia reseita husi riku-soin minaria sei la dura no sei esgota iha tempu balun, ne’e duni, reseita ne’ebé bele resiliente hodi kontinua iha sustentabilidade fiskál ba futuru mak reseita domestika, ne’ebé Estadu tau fiar ba Autoridade Tributária hodi jere administrasaun no kolesaun”.

Iha ámbitu Reforma no liga ba prestasaun serbisu no dezempeñu AT, Sra. Vice-Ministra Finánsas informa mós katak “reforma sira ne’ebé implemeta la’ós meramente atu fo kbi’it deit ba AT wainhira hala’o sira nia knaar ka goza estatutu Autonomia Administrativa no Finanseira, maibé iha objektivu prinsipál liu maka oinsa AT bele sai instituisaun ida ne’ebé KREDIVEL katak hetan FIAR no RESPEITU hosi sidadaun hotu-hotu, liu-liu kontribuinte sira. AT presisa sai instituisaun ho REPUTASAUN DIAK, presiza hadia prestasaun servisu hodi bele hakbesik liu tan atedimentu ba kliente ho forma efisiente no efikásia wainhira hala’o knar hodi rekolla impostu ba Estadu”.

Durante serimónia lansamentu e-Request, Diretora Jerál Autoridade Tributária, Mônica Rangel da Cruz, informa katak “lansamentu e-Request ne’e marka tan pasu bo’ot ida ne’ebé alkansadu husi ATTL, ne’ebé esensialmente atu ajuda no auxilia ita nia kontribuinti liu-liu: (i), evita aboresimentu administrativu ne’ebé la nesesáriu sira no (ii), minimiza kustu ba konformidade ne’ebé bele fo sufrimentu ba kontribuinti sira. Ho e-Request, kontribuinti sira la nesesáriu mai aprezenta fízikamente iha edifísiu ATTL nian hodi hato’o pedídu ba emisaun Certidão de Dívidas. Sira bele hato’o pedídu husi fatin ne’ebé deit, tempu no momento ne’ebé deit, wainhira sira bele liga ba redi internet”.

Diretora Jerál mos hatutan tan katak wainhira kontribuinti sira rekere ba Certidão de Dívidas, kontribuinti sira hotu sei simu alerta automátiku ne’ebé jere husi sistema hodi informa katak sira nia solisitasaun sei reveé hela. Sei karik la hetan kestaun/pergunta pendente ruma ne’ebé rejista iha SIGTAS no wainhira buat hotu kumpri ona tuir lei, kontribuinti sira bele kedas hetan sira nia Certidão de Dívidas iha loron ida ka rua nia laran.

E-Request ne’e hola parte ba iha plataforma e-Services, ne’ebé lansa ona ofisialmente iha loron 4 outubru 2019 husi S.E. Sra. Vice Ministra Finansas no Diresaun Jeral Autoridade Tributária (DJAT). Desde lansamentu, E- Services iha tinan kotuk, plataforma ida ne’e benefisia kontribuinti sira besik 2000, iha ne’ebé realiza ona e-Filing no e-Reporting. ATTL husi Ministériu Finánsas planu hela hodi kontinua dezenvolve liu-tán plataforma e-Services, nune’e intrudúz e-Payment iha futuru.

#remata