• Teste Diagnostika Jestaun Finansas Publikas no Area Espesializada MF

Home » Announcements » Teste Diagnostika Jestaun Finansas Publikas no Area Espesializada MF Print Page

Teste Diagnostika Jestaun Finansas Publikas no Area Espesializada MF

Sentru Kapasitasaun Jestaun Finansas Publikas (SKJFP) foin lalais halao Teste Diagnostika loron tomak dala ida tan iha loron 21 Julhu 2016 iha Centro de Convenções de Dili (CCD) no partisipa husi funsionariu publiku nain 308 nebe servisu areas referidu inklui mos funsionariu Ministeriu Finansas (MF) iha area espesializada sira, Teknolojia Informatika no Komunikasaun no area nebe suporta ba funsaun Jestaun Finansas Publika (JFP). Partisipante hirak ne’e mai husi grupu oin-oin hanesan MF, linhas ministeriu, ajensia autonomous, no mos potensial ofisial JFP husi nivel munisipu nebe la konsege marka prezensa iha Teste Numerasia nebe halao iha fulan Maiu 2016. Objetivu husi teste maka atu avalia nivel kunhesimentu funsionariu nebe servisu iha area relevante ba JFP no area espesializada MF wainhira halao servisu. Informasaun husi teste ida ne’e sei utiliza hanesan baze ba kapasitasaun iha area mensionadu sira tamba reformas ne’ebé hala’o daudaun kona-ba JFP iha Timor-Leste, lidera husi Ministra Finansas hakarak reforsa liu tán transparênsia finanseira iha setor públiku enkuantu kontinua dezenvolve Kompeténsias nia funsionárius públikus no ajentes sira. Teste iha sesaun dader kobre area Numerasia, Kontabilidade no Relatoriu Finanseira, Auditoria Interna, Alfándega, Impostu, Estatìstika, Investimentu, Politika Ekonomika, Jestaun Parseria Dezenvolvementu, Legal, Rekursu Umanu, Administrasaun, Jestaun Arkivu no Dokumentasaun, no Teknolojia Informatika no Komunikasaun. Sesaun lorokraik koloka ba hirak nebe nomeiadu ba teste iha area sira hanesan Planeamentu, Orsamentu, Aprovizionamentu no Jestaun Kontratu, Jestaun Patrimoniu no Frota, no Pagamentu. Teste Diagnostiku ne’e superviza estritamente no monitoriza husi supervizor sira nebe maka kompostu husi 50% asesores internasionais no 50% konsultor nasionais nebe servisu iha MF atu asegura kredibilidade no mos mantem prosesu ezame nebe la tendensioza ka favorese ema partikular. Antesipadamente, SKJFP fornese Indusaun kompleta ba partisipante teste hotu-hotu iha loron 12 Julhu 2016 iha Salaun Delta Nova, Comoro. Durante Indusaun, Kordenador SKJFP, Sr. Alberto Piedade sublinha importansia atu iha profesionais JFP nebe kualifikadu iha Timor Leste atu bele promove transparensia no prestasun servisu nebe no responsabilidade iha area JFP ba iha orgaun no institusaun estadu tomak. Sr. Alberto mos desimina informasaun kona ba padraun kompetensia nebe utiliza hanesan referensia atu presta servisu nune’e mos aprezenta kona ba lalaok teste diagnostiku ninian. Hafoin Indusaun partisipante respetiva sira konfirma sira ninian identidade no simu PIN (Personal Identity Number) ba teste.

Hanesan prátika, rezultadu teste sei desimina ba kada partisipante iha loron servisu tolu-nulu (30) nian laran depois loron ezame. Informasaun kona ba prosesu tuir mai sei desimina antes tinan ida ne’e remata.