• Komunikadu Imprensa Governu Timor-Leste ho Uniaun Europeia iha Dili hahu Dialogu Politika ba Apoiu Orsamentu iha Timor-Leste .

Home » Atividade Ministru » Komunikadu Imprensa Governu Timor-Leste ho Uniaun Europeia iha Dili hahu Dialogu Politika ba Apoiu Orsamentu iha Timor-Leste . Imprime pájina

Komunikadu Imprensa Governu Timor-Leste ho Uniaun Europeia iha Dili hahu Dialogu Politika ba Apoiu Orsamentu iha Timor-Leste .

Dili, 23 Jullu 2020

S.Exia Ministra Negosiu Estranjeiru no Kooperasaun hanesan Ordenador Nasional ba Fundu Europeu Dezenvolvimentu, senhora Adaljiza Magno ho Embaixador Uniaun Europeia, senhor Andrew Jacobs lansa Dialogu Politika entre Uniaun Europeia ho Ministeiru Finansas, Ministeriu Saude no Ministeiru Administrasaun Estatal ligadu ba Programa Apoiu Orsamentu husi Uniaun Europeia.

Hahu hosi 2018, Governu Timor-Leste hetan ona Apoiu Orsamentu husi Uniaun Europeia iha ambitu Fundu Europeu Dezenvolvimentu ho pagamentu anual iha loron 2 fulan Jullu 2020, Governu Timor-Leste simu 7,6 miloens Dolar americanos husi Uniaun Europeia iha ambitu implementasaun reforma estratejiku iha setor sira hanesan Jestaun Finansas Publika, Nutrisaun, Dekonsentrasaun no Desentralizasaun.

Atu bele avalia progresu ba implementasaun politika iha area setorial tolu, atu bele identifika obstaklu sira no atu bele rona mos perspetiva oi-oin husi parseiru sira, inklui Sosiedade Sivil. Ho nune’e mak, sei realiza Dialogu Politika tolu hanesan: Dialogu ba Jestaun Finansas Publika sei prezide husi S.Exia senhor Ministro Finansas ho senhor Embaixador Uniaun Europeia. Dialogu ba Nutrisaun sei prezide husi S.Exia senhora Ministra Saude ho senhor Embaixador Uniaun Europeia. Ikus liu, Dialogu ba Dekonsentrasaun no Desentralizasaun sei prezide husi S.Exia senhor Ministro Administrasaun Estatal ho senhor Embaixador Uniaun Europeia.

Dialogu sai hanesan oportunidade atu permite diskusaun kona ba politika setorial sira ne’ebe promove reforma ba dezenvolvimentu sustentavel, liu husi sasukat efisiensia, integridade, transparansia no responsabilidade. Iha parte seluk, promove subsistensia no servisu publiku ba sidadaun sira bazeia ba Planu Estratejiku Nasional 2011-2030.

Dialogu Politika realiza iha Ministeriu Finansas – Auditorium Xanana Gusmão no partisipa husi S.Exia Ministra Negosiu Estranjeiru no Koperasaun senhora Adaljiza Magno, S.Exia Ministru Finansas, senhor Fernando Hanjam, S.Exia Ministra Saude, senhora Odete Maria Freitas Belo, S.Exia Ministru Administrasaun Estatal, senhor Miguel Pereira de Carvalho, S.Exia vise-Ministra Finansas, senhora Sara Lobo Brites, S.Exia vise-Ministru Saude, senhor Bonifacio Maucoli dos Reis, S.Exia vise-Ministru Administrasaun Estatal, Lino de Jesus Torrezão, S.Exia Embaixador Uniaun Europeia, senhor Andrew Jacobs no S.Exia Embaixador Portugal, senhor José Pedro Machado Vieira.

S.Exia Ministra Negosiu Estranjeiru no Koperasaun senhora Adaljiza Magno hanesan mos Ordenadora Nasional liu hosi nia deskuru dehan ” nudar Ordenadora Nacional hau rekoñese katak hosi apoiu ba Programa Indicativo Nacional 2007 – 2014, Uniaun Europeia fo Apoiu Orsamentu 4.5% hosi 100 miloens dolares iha 10th FED, maibe ba Programa Indicativo Nacional 2014-2020, Uniaun Europeia hasa’e Apoiu Orsamentu ba 40% hosi 105 miloens dolares ne’ebe finansia hosi 11th FED, kumpre ba prinsipius “Country Own, Country Lead and Country System” nian. Ida ne’e hatudu katak Uniaun Europeia rekoñese no iha konfiansa ba Sistema Jestaun Finansas Publikas ne’ebe governo Timor-Leste ho Parseiru Desenvolvimentu sira hamutuk hari no hametin. Maske nune’e sei iha lakunas no dezafiu barak ne’ebe nafatin ita hasoru, no mos nafatin haka’as aan atu hadia”.

S.Exia Embaixador Uniaun Europeia, senhor Andrew Jacobs haktuir katak Dialogu Politika ba ohin loron ne hanesan oportunidade importante atu bele avalia progresu reforma iha area setorial tolu ne’ebe ligadu ho Apoiu Orsamentu mai husi Unaiun Europeia. EU afavor ba Apoiu Orsamentu hanesan modalidade Apoiu ida ne’ebe garante qualker tempu. Implementasaun iha Timor-Leste ne’e hanesan rekoñesementu ida husi UE nia konfiansa ba sistema Governasaun no maturidade parseria entre Timor-Leste ho UE. Fundu husi Apoiu Orsamentu sei halo pagamentu wainhira hatudu progresu ba iha implementasaun politika reforma sira. Indikador sira ne’ebe sai hanesan sasukat ba pagamentu ne’e konkorda antes antes ona entre Timor-Leste ho UE. Pagamentu sira ne’e sei halo direitamente ba iha Konta Tezoru no sai hanesan Orsamentu Estadu ida deit ne’ebe labele separa husi Orsamentu Estadu sira seluk. Apoiu Orsamentu hanesan orsamentu sira seluk husi Governu ne’ebe tenki superviziona husi Parlamentu no mos kontrola husi Kamara da Kontas.