• Promove Boa Governasaun ba Funsionário Ministériu Planu no Finansas.

Home » Anúncios » Promove Boa Governasaun ba Funsionário Ministériu Planu no Finansas. Imprimir a página

Promove Boa Governasaun ba Funsionário Ministériu Planu no Finansas.

20180228_PROMOVE BOA GOVERNASAUN BA FUNSIONARIU

Funsionáriu públiku Ministériu Planu no Finansas partísipa Semináriu ho tema “Prevene no Kombate Korupsaun Hodi Promove Governasaun Di’ak no Porteze Diréitus Humanus Iha Servisu Administrasaun Públika”. Programa ne’e realiza iha Auditoriu Xanana Gusmão, Ministériu Planu no Finansas, Quarta-feira 28 Fevereiru 2018.

Ministru Planu no Finansas Rui A. Gomes iha sesaun abertura semináriu ne’e hateten katak, objetivu hosi semináriu ida ne’e atu sensibiliza informasaun ba funsionáriu husi Ministériu Planu no Finansas hodi nune’e bele fó hanoin kona-ba elementus sira ne’ebé importante bainhira hala’o jestaun Boa Governasaun.

“Kaer metin étika no integridade. Konsistensia iha liafuan no hahalok tenke hahú kedas hosi Ministru/Vice-Ministra to’o Diretór sira presiza fó uluk ezemplu di’ak hasoru korupsaun no atividade ne’ebé ho tendensia fraudelenta”, hateten Ministru Rui A.Gomes iha ninia diskursu abertura ne’ebé hetan mós prezensa husi Provedór Diréitus Humanus no Justisa, Silveiro Pinto Baptista.

Hosi sorin seluk, Provedór Diréitus Humanus no Justisa Silveiro Pinto Baptista salienta katak, atividade ne’e bele ajuda diresaun xefia sira ne’ebé maka hakna’ar-an iha Ministériu Planu no Finansas, atu nune’e bele hala’o sira nia servisu mais diak liu.

“Atendimentu ba públiku ne’ebé diak no transparansia, akuntabilidade, efisensia no efikasia nu’udar aktus hodi promove pensamentu Governasaun ne’ebé diak iha ita nia servisu fatin” tenik Provedór Diréitus Humanus no Justisa Silveiro Pinto Baptista.

Semináriu ne’e hetan partisipasaun hosi ekipa Provedór Diréitus Humanus no Justisa (PDHJ), Komisaun Anti Korupsaun (CAC), Inspeksaun Jerál Estadu, Komisáriu Komisaun Funsaun Públika (CCFP) inklui jestór sira hosi Ministériu Planu no Finansas rasik.

Atu hare liu tan Ministru Planu no Finansas nia diskursu iha workshop ne’e, favor klik: https://www.mof.gov.tl/wp-content/uploads/2018/02/Discurso-de-Abertura-pelo-MPF_Seminario-Boa-Governacao_28-Fev-2018.pdf