• REFORMA FISKÁL ATU REDÚS DEPENDÉNSIA BA FUNDU MINARAI

Home » Announcements » REFORMA FISKÁL ATU REDÚS DEPENDÉNSIA BA FUNDU MINARAI Print Page

REFORMA FISKÁL ATU REDÚS DEPENDÉNSIA BA FUNDU MINARAI

Talkshow on FRC_27 Apr 2017

“Komisaun Reforma Fiskál (KRF) atu halo reforma iha áreas fundamentais 3, mak hanesan atu halo reforma iha área polítika, enkuadramentu legais, no administrasaun”, hatete Vise Ministru Finansas, Helder Lopes iha Talkshow ne’ebé ko’alia kona-ba Importánsia Reforma Fiskál ba Timor-Leste iha Muzeum Rezisténsia, Dili.

Vise Ministru esplika katak, Reforma iha área polítika mak oinsá atu aumenta reseitas doméstika sa’e ba 15% iha tinan 2020, nune’e mós atu asegura efisiensia iha despezas públika nian. Iha área Enkuadramentu Legais, mak atu kria lei sira ne’ebé atu suporta ba alkánsa polítika, tanba ne’e mak KRF halo ona Lei Tributaria no Lei IVA (Impostu Valór Akresentadu) ne’ebé submete ona ba Konsellu Ministrus, hafoin sei haruka ba Parlamentu Nasionál. No iha área Administrasaun mak oinsá atu kapasita administrasaun tributária no administrasaun alfándega, atu nune’e sira iha kapasidade hodi halo servisu ho efisiénsia iha kolesaun reseitas.

Vise Ministru informa mós katak, fonte ba reseitas doméstika la’ós de’it husi Alfándega no Impostu, maibé husi mós taxas no enkargus. Tanba ne’e KRF sei haree mós kona-ba oinsá halo reforma iha taxas no enkargus.

“Parlamentu Nasionál sei fó prioridade ba polítika governu nian kona-ba reforma fiskál, tanba inisiativa estabelese reforma fiskál ne’e di’ak, atu nune’e ita labele depende liu ba fundu minarai”, hatete Deputadu Parlamentu Nasionál, Francisco Miranda Branco.

Iha fatin hanesan Diretór Ezekutivu NGO Luta Hamutuk, Mericio Akara hatete, “Durante ne’e ita depende demais ba fundu minarai, kuaze 90-95% orsamentu estadu depende ba fundus minarai”. Maibé ho inisiativa governu nian hodi estabelese Reforma Fiskál, ita hein katak ho hetan reseitas doméstika hanesan ita espera katak sa’e ba 15%, bele taka despeza ba saláriu no pensaun atu nune’e la presiza tan foti husi fundu minarai.

Atu hetan tan informasaun, favór kontaktu: Cecilia Tilman Gonçalves, Komisaun Reforma Fiskal,
iha +670 7727 6436, ctgoncalves@mof.gov.tl