• Rejime Planeamentu Jestaun Forsa de Trabalhu da Administrasaun Públika

Home » Announcements » Rejime Planeamentu Jestaun Forsa de Trabalhu da Administrasaun Públika Print Page

Rejime Planeamentu Jestaun Forsa de Trabalhu da Administrasaun Públika

Ekipa Komisaun Funsaun Públika halo sosializasaun Proposta Rejime Planeamentu Jestaun Forsa Trabalhu da Administrasaun Públika ba funsionáriu Ministériu Planu no Finansas iha Salaun Auditorio, Ministériu Planu no Finansas, loron 15 Marsu 2018.

Tuir Sekertariadu Ezekutivu Comisaun Funsaun Públika (CFP), Maria de Jesus Sarmento hateten, objetivu husi enkontru ida ne’e atu husu input no feedback husi Ministériu Planu no Finansas nian ba esbosu Dekretu Lei Planeamentu Forsa de Trabalhu. CFP hili MPF hanesan Ministériu primeiru atu halo konsultatasaun tamba MPF mak kaer osan no Dekretu refere sei iha ligasaun mós ba osan. Espera katak hotu-hotu nia ideias sira bele asegura, fortifika liutan entermus konteudu esbosu no ikus mai bele sai hanesan dekretu lei ida hodi asegura forsa de trabalhu ba nasaun Timor-Leste.

Ideia atu hakerek Dekretu Lei ida ne’e mosu tamba agora dadaun ita la hatene lolo’os ita nia númeru forsa de tabalhu iha administrasaun públika. Iha kada Ministériu ita iha funsiunáriu permanentes, ajentes administrasaun públika, kazuais, kontratadus non-nivel, asesores nasionais no internasionais. Balun Ministériu sira rejista no informa mai komisaun maibé balun mós la kabe ba kompetensia Komisaun Funsaun Públika nian.

“Ho rezoens sira ne’e maka komisaun hanoin atu bele halo dekretu lei ida ne’ebé maka kobre ba iha funsaun sira hotu-hotu ejize atu eziste iha administrasaun públika. Para depois ita bele hatene no hakarak funsiunáriu permanente no kontratadu hira atu nune’e labele barak demais. Tanba kampu de trabalhu bo’ot no úniku iha Timor-Leste maka administrasaun públika. Ho ida ne’e maka polítika komisaun nian ho esbosu ida ne’e ita bele hare’e oinsa númeru forsa trabalhu ne’ebé ita hakarak ba administrasaun públika” tenik Sekertariadu Ezekutivu ne’e.
Nia hatutan, relasiona ho esbosu ida ne’e maka ita bele hatene buat hirak iha kraik ne’e:

1. Mapa pesoal. Ho Dekretu Lei ne’e ita bele hatene númeru forsa trabalhu ne’ebé maka ministériu hotu-hotu iha liuhosi submisaun mapa pesoál ba Komisaun
2. Liga mapa pesoal ho promosaun. Dekretu Lei kona-ba promosaun foin mak vigora iha 2018 no iha kriteriu lubuk ida para atu bele kumpri. Konserteza liuhosi kriteriu sira ne’e maka ita bele prense mapa pesoál, para ita bele hare’e forsa trabalhu nia kualidade liuhosi promosaun
3. Hare’e mós númeru de idade iha Funsaun Públika, transferénsia sira ne’ebé mak akontese destakamentu, mobilidade no rekejitus ba iha transferénsia la temi klaru iha ita nia Estatutu Funsaun públika. Dekretu lei ne’e sei ajuda.
4. Iha esbosu lei ida ne’e mós ita halo limitasaun ida ba kontratadus ou ita hamosu rejime kontratasaun. Ho ida ne’e mak ita hatene lolo’os katak ho ita nia totál forsa tabalhu ne’ebé maka ita iha ona sera que presiza tan kontratadus.
5. Esbosu ida ne’e sei respeita nafatin ba polítika governu no lei organika sira ne’ebé maka iha.

Espera katak dekretu lei ida ne’e bele kesi ba futuru hodi nune’e ita iha númerus funsiunáriu ne’ebé lo’os ho kualidade ne’ebé exelente hodi serví ba Timor-Leste.