• Rekomendasaun Konta Jerál Estadu Potensia Ba Hadi’a Kualidade Jestaun Finansas Públikas

Home » Announcements » Rekomendasaun Konta Jerál Estadu Potensia Ba Hadi’a Kualidade Jestaun Finansas Públikas Print Page

Rekomendasaun Konta Jerál Estadu Potensia Ba Hadi’a Kualidade Jestaun Finansas Públikas

20200608_Rekomendasaun Konta Jerál Estadu Potensia Ba Hadia Kualidade Jetauan Finansas Publika-editado por DGuterres

Parlamentu Nasionál Loron 08 Fulan Junho 2020- Governu liuhusi Ministériu Finansas (MF) no Ministériu Asuntus Parlamentares no Komunikasaun Sosiál, hala’o ona debate ho membru Parlamentu Nasionál sira hodi hatan kona-ba pareser Tribunál das Contas no Komisaun C liga ho relatóriu Konta Jerál Estadu 2018.

Tuir Ministru Finansas Fernando Hanjam hateten, Konta Jerál Estadu nu’udár dukumentu ida ne’ebé aprezenta kompetensia Governu no Ministériu Finansas nian la’os de’it responsabiliza ba preparasaun orsamentu jerál estadu ka supervisiona ezekusaun orsamentál. Dokumentu ida ne’e liu-liu atu sukat loloos osan publiku nian ho nia forma auditasaun sira. Governu halo daudauk ona esforsu atu hadi’a kualidade ba konta jerál estadu nian ho forma atu garante dokumentu ida ne’e fiar no klaru iha pozisaun orsamentu estadu nian, relasiona ho legalidade no koresaun valór sira ne’ebé suporta.

“Rekomendasaun no informasaun sira konsta iha konta jerál estadu potensia tebtebes ba hadi’a kualidade jestaun públiku nian. Atu melhora konta jerál estadu permite mós aumenta kualidade informasaun atu suporta desizaun sira iha polítiku nian”, informa Ministru Finansas Fernando Hanjam.

Governu sei kontinua iha nesesidade atu reforsa reforma iha finansas publikas liga ho enkuadramentu legislativu no sistema orsamentál ne’ebé serve ba kompilhasaun konta jerál estadu nian. Iha forma ida ne’e, Câmara de Contas no Parlamentu Nasionál iha kna’ar liu-liu halo auditoria, fiskaliza, no avaliasaun. Hodi kontribui makas ba hadia sistema jestaun finansas publikas no kualidade ejersisiu governativu nian liu husi rekomendasaun sira.

“Jestaun finansas públicas iha progresu makas tebes liuhusi koresaun perante husi Governu ba fraqueza sira hodi implementa rekomendasaun ne’ebé mai husi Câmara de Contas no Parlamentu Nasionál iha tinan anterior nian”, dehan Ministru Finansas.

Governante ne’e esplika, iha sentidu ida ne’e Governu hakarak informa ba deputadu sira hotu katak, iha rekomendasaun balun balun iha faze implementasaun no seluk sei kria nesesariu ba nia implementasaun sira. Tanba rekomendasaun ne’e 2018 nian no balun iha 2019 ita hahú implementa ona.

“Hakarak afirma tan katak, Governu sei rejolve frazilidade sira problema no inefisensia jestaun aplikasaun orsamentu no bens publikus ne’ebé aprezenta ona liuhusi fiskalizasun no auditoria husi Parlamentu Nasionál no Câmara de Contas”, esplika Ministru Finansas.

Ba ida ne’e governu assume responsabilidade hodi asegura no introdus mekanismu implementasaun jestaun eficiente no transparência iha orsamentu no bens publikus hodi presta servisu diak liu ba ita nia rai no povu tomak.

Iha fatin hanesan mós Vice-Ministra Finansas Sara Lobo Brites hateten, tuir ami nia haree rekomendasaun husi Câmara de Contas la kestiona legalidade kona-ba ezekusaun orsamentu iha tinan 2018 nian, maibé hatudu preokupasaun tékniku husi norma sira ne’ebé iha. Hanesan forma ida ne’ebé importante, kontinua halo koresaun téknika ba implementa normas ka regulamentu tékniku. Liu-liu iha área planeamentu, orsamentu, aprovizionamentu, jestaun patrimóniu estadu no demonstra administrasaun finanseira ou relatóriu kontas anuais.

“Ida ne’e maka presiza duni atu engloba organismu estadu sira hotu hodi obedese ba unidade no universalidade”.

Vice-Ministra Finansas mós esplika, OJE 2018 maior parte atu regula de’it despezas sira ne’ebé akontese ona iha durante períodu aplikasaun rejime duodésimu iha fulan 9 nia laran. OJE 2018 entrada em vigência iha trimestre ikus atu taka tinan finanseira, ne’e duni tempu la sufisiente ona atu regulariza programa sira ne’ebé planeadu. Orsamentu 2018 sofre alterasaun barak, tanba mudansa estruruta organika. Kualidade OJE 2018 menus tanba tempu limitadu hodi prepra orsamentu rua iha de’it fulan tolu nia laran. Utilizasaun fundu rezerva kontizensia ba masimu ba kategoria sira hotu ba levantamentu ás ba Rendimentu Sunstetabel Estimadu (RSE) hodi kobre fali despezas rekorentes tanba nesesidade Governu nian atu kumpri no honra obrigasaun kontratuais sira.

“Konsekuensia sira ne’e maka afeta tebes kualidade la’os de’it konta jerál estadu, maibé kualidade OJE rasik. Tanba ita hatene katak, Konta jerál estadu ne’e hanesan lalenok ka lalatak husi orsamentu jerál estadu”, informa Vise Ministra Finansas.

Husi parte Ministériu Finansas haree rekomendasaun sira ne’ebé aprezenta ami toma konsiderasaun. Ami mós hakarak hato’o ami nia satisfasaun rekomendasaun sira ne’ebé ami haree oituan ba kotuk 2015 iha 52 rekomendasaun, iha 2016 balun implementada parsialmente no ita konsege redus ba 46 rekomendasoens. Iha 2017 tu’un ba 23 rekomendasoens no iha 2018 iha 26 rekomendasoens.

“Ida ne’e ami haree katak, iha duni fatin para Governu bele simu no implementa hodi halo mudansa iha aprezentasaun orsamentu estadu nomós aprezentasaun konta jerál estadu iha futuru”.

Mesmu governu rekonhese difikuldade tékniku impedimentu balun ba implementasaun rekomendasaun sira hotu ne’ebé formula ona. Rekomendasaun sira ne’e hotu la-signifika falta rekonhesimentu husi Governu nian importância ba melhoria hadi’a kualidade konta jerál estadu.