• Reuniaun Trimestrál Autoridade Aduaneira

Home » Announcements » Reuniaun Trimestrál Autoridade Aduaneira Print Page

Reuniaun Trimestrál Autoridade Aduaneira

20171229_Reuniaun Semestrál Autoridade Aduaneiro

Autoridade Aduaneira hala’o reuniaun trimestrál ba dala 3 iha postu integradu Batugade ho objetivu atu bele informa liña koordenasaun servisu iha postu integradu Batugade no Salele. Reuniaun ne’e realiza iha Postu Integradu Batugade iha loron 22/12/2017.

Tuir Diretór Jerál Interinu Autoridade Aduaneira, Julião José Ximenes hateten agradese tebes ho parseiru liña Ministériu sira hodi bele fó ideias ba malu liu hosi diskusaun no koordenasaun e koperasaun para iha futuru ita bele hadia servisu postu integradu Batugede no Salele diak liu tan, atu nune’e ita bele alkansa objetivu ba nasaun.

“Maske iha buat balun ne’ebé ita alkansa ona maibé iha buat balun mós seidauk, ita presiza hala’o pur-fazeada ba parte sira ne’ebé seidauk. Purtantu ida ne’e sai hanesan sasukat ida ba ita para ita bele hare’e no diskuti hamutuk. Hanoin ba tinan oin ita hakarak buat hotu diak para bele serbi ita nia kliente no públiku ho diak liutan” tenik Diretór Interinu Julião José Ximenes.

Tinan 2017 Alfándega, Posto Integradu Batugade ho Salele implementa ona sistema Asycuda World. Iha Batugade broker sira mak halo atendimentu direta ba importadores sira depois prosesu hotu hafoin ba Alfándega verifika no analiza, ikus mai submete ba pagamentu taxa. Purtantu ita nia ofisiais Alfándega iha Batugade ho Salele formaliza no familiar ho Sistema, maibé iha futuru presiza tuir formasaun nune’e bele iha koñesimentu diak liu tan.

Iha parte seluk Jenerál Manajer Postu Integradu Batugade, Delio Jim Belo apresenta mós aktividade, progresu no dezafius serbisu postu integradu rua hanesan Batugede no Salele ba parseiru sira katak, agora dau-daun Postu Integradu Batugede no Salele iha ona asesu ba internet liu-liu parseiru sira hanesan Unidade Polísia Fronteira (UPF) atu bele koordena serbisu ba malu. Ita mós iha funsináriu rekrutadu nain 2 iha Salele no 4 iha Batugade hamutuk nain 6. Sira nia servisu hanesan Costumer Service no operasionál ho sira nia prezensa bele fó atendimentu ba públiku ho kualidade diak liutan iha futuru. Iha postu integradu ida ne’e iha ona troli indor nian no tempu besik bele uza ona. Kona-ba manutensaun X-Ray mós iha ona rekursu humanus atu bele halo manutensaun ba X-Ray. Maske kompañia sira la mai maibé iha buat balu presiza sira tenki mai. Hanesan postu integradu entaun tau ona planu orsamentu tinan oin bele aumenta instala tan CCTV 24 unit iha Batugade no Salele.

Iha fatin hanesan Diretór Jerál Finansas Estadu, Januario da Gama hateten hosi parte Finansas Estadu Ministériu Planu no Finansas nian, apresia ho kooperasaun diak ne’ebé durante iha Postu Integradu sira, liu-liu envolve entidade lubuk ida. Maske iha difikuldade no dezafiu oi-oin servisu integradu hasoru, konsege maneja no ultrapasa situasaun sira ne’ebé iha. Katak implementasaun iha dezafius barak maibé ho reuniaun koordenasaun no kooperasaun ida ne’e para atu bele selesiona, ao mesmu tempu ita buka mekanismu administrativu para halo koordenasaun diak liutan.

Diretór Finansas Estadu hatutan liu tan katak, “iha parte balun asaun sira ne’ebé foti liga liu ba buat rua hanesan kestaun polítiku no kestaun tékniku”.

Tuir kestaun polítiku tenki hare’e ba karakter problema ne’e rasik depois kanaliza tuir prosedimentu no tuir kestaun téknika maka liga ba despezas, liu-liu planu orsamentu 2018 sera que balun tenki jere hosi postu Integradu ka servisu Imigrasaun. Buat hirak ne’e tenki deskuti didiak atu labele iha duplikasaun ba alokasaun orsamentu.

Iha inkontru ida ne’e hetan partisipasaun másimu hosi liña Ministériu sira hotu hanesan reprezentante hosi Segundo Komandante Unidade Polisia Fronteira (UPF), Segundo komandante Polisia Nasional Timor-Leste (PNTL) Munisípiu Bobonaro, Diretór Jerál Servisu Imigrasaun, Diretór Diresaun Nasional Terrestres (DNTT), Karantina, Seguransa Sivíl, emprezarius no Reprezentante Ministériu Planu no Finansas nian ne’ebé maka hala’o sira nia kna’ar liga ho postu Integradu Batugade no Salele nian.