• REUNIAUN TLDPM, AJUDA ESTERNA MAI TIMOR LESTE TENKE VIZAUN IDA, PLANU IDA

Home » Anúnsiu » REUNIAUN TLDPM, AJUDA ESTERNA MAI TIMOR LESTE TENKE VIZAUN IDA, PLANU IDA Imprime pájina

REUNIAUN TLDPM, AJUDA ESTERNA MAI TIMOR LESTE TENKE VIZAUN IDA, PLANU IDA

20190705_TLDPM News 1

Ministériu Finansas (MF) no Ministériu Negósius Estranjeirus no Kooperasaun (MNEK) ho susesu lidera reuniaun Parseirus Dezenvolvimentu Timor-Leste 2019 (TLDPM, sigla inglés) durante loron ida iha 4 Jullu 2019 ho tema “Ha-klean Koordenasaun ba finansiamentu dezenvolvimentu”

Reuniaun ho Parseirus Dezenvolvimentu Timor-Leste 2019 nian hetan prezensa hosi Prezidenti Parlamentu Nasional, Arão Noé Amaral no Primieru Ministru Taur Matan Ruak nu’udar rekonhesementu ba importansia kontribuisaun histórika hosi komunidade Internasionál ba Timor-Leste hodi apoia Governu no Povu hodi reforsa esforsus dezenvolvimentu bazeia ba Planu Estratéjiku Dezenvolvimentu Nasional (PEDN)

“Iha lisoens aprendida hosi envolvimentu ita nia parseiru dezenvolvimentu sira iha dékada rua ikus ne’e, mais ami fiar katak ita nia kooperasaun ne’e tenke mellora liu através koordenasaun mais profunda, entre vantajen komparativa doadores no prioridades Governu nian” hateten Ministra Finansas Interina no atual Vise Ministra Finansas, Sara Lobo Brites iha diskursu abertura reuniaun Parseirus Dezenvolvimentu Timor-Leste 2019 ne’ebé hala’o iha Auditoriu Xanana Gusmão, Ministériu Finansas.


Reuniaun Parseirus Dezenvolvimentu Timor-Leste 2019 nian, hamosu historia foun ba Timor-Leste liuhosi lansamentu dokumentus importantes kon-ba oinsa atu kanaliza apoiu doadaores liuhosi “POLÍTIKA ASISTENSIA ESTERNA kona-ba “Prinsípius no Prosedimentus ne’ebé Reje Asisténsia La’os-Empréstimu iha Timor-Leste”,.

Polítika Asistensia Esterna dezenvolve bazeia ba lisaun hosi “Polítika Efikásia ba Jestaun Ajuda nian”, ne’ebé aprova hosi Konsellu Ministru iha 28 Marsu 2017. Ho dokumentu ne’e, Governu reafirma ninia pozisaun ba parte interesada hotu tenke mantein sira-nia kompromisu tuir dalan dezenvolvimentu nian ne’ebé Timor-Leste mak sai na’in no bele lidera rasik liuhosi Vizaun Ida, Planu Ida (One Vision, One Plan) hodi garante programa no projetu hotu-hotu bazeia ba Planu Dezenvolvimentu Estratéjiku haktuir hosi Dili Development Pact 2011. Katak Planu sira tenke fleksível atu responde ba prioridade sira iha tempu badak, tempu médiu no tempu naruk.

Polítika Asistensia Esterna mak atu aliña atividades parseiru dezenvolvimentu hanesan ho prioridades governu nian hodi bele mellora liña koordenasaun ba áreas prioritárias sira, entre Governu no parseirus dezenvolvimentu sira bazeia ba sistema ne’ebé aplika hosi Timor-Leste.

Pais Parseirus Dezenvolvimentu Timor-Leste nian ne’ebé partisipa iha reuniaun ne’e re-afirma mós sira nia pozisaun no komitmentu hodi kuntinua ajuda povu no nasaun Timor-Leste liuhosi varias atividades ne’ebé hala’o tiha ona nomós hirak ne’ebé iha ona planu atu implementa iha tempu besik mai.

Banku Dezenvolvimentu Aziatiku (ADB) iha ninia deklrasaun reuniaun apresia ba susesu hirak ne’ebé akontese iha pais ne’e hodi husu atu kuntinua servisu hamutuk hodi konsolida susesu ne’ebé mak iha.

“ Aselera prosesu hodi atinji metas hirak ne’ebé mak planeia tiha ona hodi hare’e opurtunidade kona-ba hasa’e efetividade hosi servisu hamutuk ” deklara Paulo Spantigati, xefe delegasaun ADB.

Reuniaun Parseirus Dezenvolvimentu Timor-Leste 2019 nian, remata ho komitmentu hamutuk liuhosi Kompromisu Dili ba Asaun ne’ebé refleta hosi deklarasoens hotu ne’ebé fó sai durante realizasaun Reuniaun Parseirus Dezenvolvimentu Timor-Leste 2019 nian

“Mai ita servisu hamutuk iha faze foun kona-ba dezenvolvimentu no buka dalan hodi mellora efikásia kona-ba ajuda nian no aumenta impaktu moris diak ba povo Timor-Leste” hateten Sara Lobo Brites ba pais parseiru dezenvolvimentu sira.

Reuniaun Parseirus Dezenvolvimentu Timor-Leste 2019 nian, hetan prezensa másimu hosi pais parseirus dezenvolvimentu sira, ajensia Nasoens Unidas inklui mós Sosiadade Sivil, Setor Privadu no membrus Governu VIII Governu Konstitusionál inklui Membrus Parlamentu Nasionál sira no mós institusoens estadu relevantes seluk.