• Sensus Agrikula 2019 “Hau Nia Resposta, Hau Nia Futuru “ Atinji pursentu 47

Home » Anúnsiu » Sensus Agrikula 2019 “Hau Nia Resposta, Hau Nia Futuru “ Atinji pursentu 47 Imprime pájina

Sensus Agrikula 2019 “Hau Nia Resposta, Hau Nia Futuru “ Atinji pursentu 47

Sensus Agrikula 2019 “Hau Nia Resposta, Hau Nia Futuru” ne’ebé ofisialmente lansa iha loron 13 Agostu 2019 responsabiliza hosi Ministériu Finansas no Ministériu Agrikultura no Peskas oras ne’e atinji ona pursentu 47. Lian hirak ne hato’o husi Diretur Jeral Estatíska no Prezedenti Komite Sensus Agrikula, Elias dos Santos Fereira iha nia knar fatin Cai-Coli loron Tersa 17 Setembru 2019.

“Persentajen dadus ne’ebé haruka mai nasionál hamutuk 47%. Sensus Hakarak informa mos katak iha munisípiu balun atraza liu-liu RAEOA, foin mak hahu iha 27 Agostu 2019” tenik Elias dos Santos Fereira.

Ekipa Diresaun Jerál Estatístika hosi Ministériu Finansas hamutuk ho ekipa Ministériu Agikultura no Peskas ne’ebé hetan apoiu hosi FAO (Organizasaun Nasoens Unidas ba Alimentasaun no Agrikultura) antes ne’e aprezenta tiha ona progresu hosi Sensus Agrikula iha sorumutu Konsellu Ministru loron 7 Agustu 2019 iha Palasiu Governu.

Rekunhese katak Sensus Agrikula nu’udar sensus dahuluk depois Timor-Leste restaura ukun rasik an iha loron 20 Maiu 2002 sei ajuda Governu Timor-Leste hodi hatene dadus lolos kona-ba estrutura kada uma kain agrikultór nian. Nune’e ho dadus hirak ne’e sei ajuda governu no parte interveniente sira hodi elabora polítika no programas setór Agrikula tuir prioridades prinsipal hosi Planu Estratéjia Dezenvolvimentu Nasionál (PEDN) 2011-2030.

Iha prosesu ezekusaun Sensus Agrikula 2019 hasoru uitoan problema tékniku iha prosesu aprovizionamentu konaba produs material tekniku balun hanesan Sticker, Manual Questionairu (Imprimi Questionairu). Nune’e mos limitasaun ba asesu lina eletrisidade iha area rurais balun ne’ebé rezulta ekipa labele uza fasilidade android.

“Tanba ne’e, persentajen agora iha nasionál foin pursentu 47. Maibe ida ne’e sura hosi dadus ne’ebé tama mai nasionál lor-loron , seidauk sura ho Manual Questionairu ba área rural seluk ne’ebé seidauk asesu ba Eletrisidade” hateten Diretur Jeral Estatíska no Prezedenti Komite Sensus Agrikula.

Oras ne’e total pesoal intervistadór ba Sensus Agrikula hamutuk 1.292, inklui Operadór GPS hamutuk ema 646, Supervizór 646 no totál ne’ebé rekrutadu ba Sensus Agrikula hamutuk 2.584 Mane 64% no Feto 36% mak hala’o Sensus Agrikula ne’ebé sei remata iha loron 12 Outubru 2019.