• Serimonia Lansamentu Primeira Pedra ba Konstrusaun Portu Baia Tibar Liu husi Modalidade Parseria Público Privadu

Home » Announcements » Serimonia Lansamentu Primeira Pedra ba Konstrusaun Portu Baia Tibar Liu husi Modalidade Parseria Público Privadu Print Page

Serimonia Lansamentu Primeira Pedra ba Konstrusaun Portu Baia Tibar Liu husi Modalidade Parseria Público Privadu

porto tibar

Kuarta-Feira, 14 Juñu 2017, governu liu husi Ministériu Finansas, Ministériu Obras Públika no mos Ministériu Planu no Investimentu Estratéjiku servisu hamutuk ho sektór Privadu Timor-Leste hala’o serimonia lansamentu primeira pedra ba kontrusaun Portu Baia Tibar.

Tuir Vice Ministru Finansa, Sr. Helder Lopes katak Portu Tibar ida ne’e ita implementa liu husi modalidade Parseria Públiku Privadu (PPP) baseia ba Akordu de Konsesaun nebe Governu Timor-Leste asina ho kompanhia Bolloré Ports iha 3 Junho 2016 iha nebe governu mos sei partisipa iha finansiamentu konstrusaun obra ne’e, no sector privadu sei prepara desenho, konstroe, opera no mantein portu ne’e durante tinan 30 oin mai. Hakarak informa mós katak portu Tibar hanesan projektu primeiru nebe implementa liu husi modalidade Parseria Públiku Privadu (PPP) ho hanoin ida katak ba oin partisipasaun no kontribuisaun sektór privadu iha investimentu sei boot liu tan iha desenvolvimentu economiku no parseiru importante Governu nian.

“Portu Tibar ne’e rasik governu hahu planeia desde tinan balun liu ba, hodi halo estudu no avaliasaun tékniku, ambientál, sosiál, ekonómia no finanseiru. Atu asegura Portu Tibar ne’e bele la’o ho diak iha 17 Maíu 2017 governu hanesan Grantor no Concessionaire halo ona kontratu ho kompañia ida ne’ebé sei supervizia prosesu konstrusaun Portu Tibar nebe hanaran Independent Engineer (EI)”, tenik Vice Ministru Sr. Helder Lopes.
Iha parte seluk Ministru Planu no Investimentu Estratéjiku, Sr. Kayrala Xanana Gusmão hateten katak atu dezenvolve Timor-Leste ba futuru ita labele hare’e ba tinan ida rua de’it, maibé presija hanoin nia kontinusaun hodi nune’e bele garantia bei-oan sira nia futuru.

“Tanba ne’e governu komesa dezenvolve mos Parque Industrial nebe besik ba Portu Tibar nebe sei sai hanesan fatin promosaun no prosesamentu produtu local. Nune’e, Tibar sai hanesan zona industria atu reduz inportasaun no hasae exportasaun nebe’e promove produtu local no ho dalan hirak ne’e bele redus kiak. Ministru ne’e mos haktuir katak, atu dezenvolve ita nia rai, tenki iha hanoin desenvolvimentu nebe’e bo’ot no luan liu suku nune’e mos tenki luan liu Timor hodi hare ba do’ok no nivel internasional. Estadu tenki esforsu la’os atu fohan povu, maibé kria kondisaun para povu bele produz no bele halao sira nia aktividade ekonomika, ida ne’e mak estadu nia obrigasaun” akresenta Sr. Xanana Gusmão.

Iha nia intervensaun, Ministru Obras Públikas Eng. Gastão de Sousa hateten, konstrusaun Portu ida ne’e ho kustu nebe’e bo’ot no tenki halo parseria ho sektór privadu atu tau osan hamutuk ho governu hodi konstrui no opera portu ne’e rasik. Husi parseria ida ne’e governu tau osan hamutuk 129.45 miloens no seitór privadu nian ho valor osan total mais ou menus valór 490 miloens. Husi ne’e ita hatene katak seitór privadu nia osan bo’ot liu governu nian.

Seremonia lansamentu primeira pedra ne’e partisipa husi membrus governu, representante parseirus desenvolvimentu, embaixadores iha Timor-Leste, representante sektor privadu, sociedade civil, funsiunarius no representantes komunidade suco Tibar.