• Sistema Asycuda Asegura Transparensia Akuntabilidade

Home » Announcements » Sistema Asycuda Asegura Transparensia Akuntabilidade Print Page

Sistema Asycuda Asegura Transparensia Akuntabilidade

Diretór Jerál Interinu Autoridade Aduaneira, Julião José Ximenes hateten, apresia tebes ho plano Ministériu Planu no Finansas tanba ho politika rasik bele kria Sistema Asycuda World husi parte Hand-Carry ninian hodi garante no asegura transparensia akuntabilidade. Lia hirak ne’e informa wainhira loke lansamentu ba Sistema Asycuda World iha edifisio Autoridade Auduaneira Posto Integrado Batugade, Munisípiu Bobonaro 27 de Marsu 2018.

Nia esklarese tan, Governu Timor-Leste iha Politika liu hosi Ministériu Planu no Finansas hodi halo kontratadu ho kompañia United Nations Conference on Trade and Development (UNCTAD) hodi implementa Sistema Asycuda World husi parte Hand-Carry ne’ebé mak implementa ona iha nasaun barak ona.

“Sistema ida ne’e furak tanba iha futuru sei implementa sai Odamatan Ida (Single Door) katak, wainhira prosesu registu iha Fronteiras, Ministériu seluk mós bele asesu. Exemplo, registu kompañia ruma iha Sistema ne’e bele Banku asesu, parte Imigrasaun, karantina mós asesu, MPF rasik no seluk tan ne’ebé relasaun servisu ho Autoridade Aduaneira, tanba Sistema uniku ne’ebé relasaun ho exportasaun no importasaun tuir termus internasional ninian, ne’ebe governo sei esforso maka’as parte ida liu husi Programa Reforma Fiscal ba atendimento hodi fasilitas lalais komersio, haktuir Diretúr Interinu ne’e.

Julião aumenta tan, tinan kotuk liu ba Sistema Asycuda World implementa ona maibé ita proseso hamutuk deit liu husi despachantes/broker, tanto husi Hand-Carry, e agora iha ona separasaun Kargu nian (Kargu katak, Kamioneta ne’ebe tula sasan) no Hand-Carry ofisial alfandega mak proseso rasik Dokumento Aduaneiro Unico (DAU). Sistema ne’e atu haré liu ba Hand-Carry ninian e Sistema ne’e rasik iha fulan kotuk fase primeiro implementa ona iha Aero Portu Internasional Presidente Nicolao Lobato no agora iha Posto Integrado Batugade no fulan oin iha Posto Integrado Mota Masin Salele-Suai Covalima.

Iha fatin hanesan Xefe Unidade de Informatika e Estatistika Aduaneira Zeca Amaral hatutan, Asycuda World parte Hand-Carry nian uniku tanba versaun foun tebes ne’ebé hetan suporta husi nasaun Unidas liu husi agensia UNCTAD.

“ Ha’u nia unidade hetan ona formasaun barak oinsa atu uza versaun foun ba Sistema Asycuda parte Hand-Carry nian ne’ebe registu liu husi portal no instituisaun ne’ebé servisu hamutuk ho Autoridade Aduaneira bele asesu ida ne’ebé mak registu no seidauk,” dehan Zeca.

Konvidados ne’ebe marka prezensa mak: husi Imigrasaun, Policia Militar, Karantina, DNTT, UPF, Seguransa Sivil, Broker ho Servisu Ajensia Integradu ne’ebe destaka iha Batugade.