• Sistema Finanséiru Fundu Covid-19 Prontu Ona Ba Ezekusaun

Home » Announcements » Sistema Finanséiru Fundu Covid-19 Prontu Ona Ba Ezekusaun Print Page

Sistema Finanséiru Fundu Covid-19 Prontu Ona Ba Ezekusaun

20200428_Sistema Finanséiru Fundu Covid-19 Prontu Ona Ba Ezekusaun-edited by DGuterres

Sekretáriu Tékniku Jestaun Fundu Covid-19 (STJFC) Januario da Gama hateten sistema finanséiru Fundu Covid-19 prontu ona komesa ohin ba oin ministériu no insitituisaun implementadór sira bele halo ona ezekusaun.

“Ohin Ministériu Finansas através Sekretariadu Tékniku fundu ninian konvoka sesaun traballu ida ho diretór jerál no diretór nasionál sira husi ministériu no instituisaun implementadór fundu Covid-19 sira. Ho ajenda prinsipál rua, primeiru maka sosializa Standard Operasional Prosedure (SOP) ne’ebé regula kona-ba regras administrasaun ezekusaun fundu Covid-19 nian. Segundu maka halo notifikasaun ba liña ministériu no instituisaun implementadór sira katak, fundu ho nia sistema finanséiru prontu ona para komesa ohin ba oin bele halo ona ezekusaun”, informa Sekertáriu Tékniku Jestaun Fundu Covid-19 (STJFC) Januario da Gama iha Auditórium Ministériu Finansas loron 28 Fulan-Abril 2020.

Purtantu iha ajenda primeiru iha padraun SOP ne’e importante, tanba fundu ida ne’e ho nia implementasaun ho karakter ida transversál. Fundu ne’e tenki responde situasaun emerjensia sira ne’ebé mosu husi moras Covid-19 ne’e rasik. Ho nune’e nesesita koordenasaun no kooperasaun entre ministériu no instituisaun sira ne’ebé iha ligasaun ba implementasaun fundu Covid-19 nian.

Sekretáriu Tékniku Jestaun Fundu Covid-19 (STJFC) Januario da Gama esplika lituan, Ministériu Finansas atraves Sekretariadu Tékniku hare’e katak, ita presiza implementasaun no ezekusaun ida rigorozu ba iha fundu ne’e rasik. Ho nune’e SOP ida ne’e hanesan giaun tékniku ida ba sira para bele kuidadu iha ezekusaun orsamentu fundu Covid-19 nian. Ministériu Finansas liuhusi Sekretariadu Tékniku notifika ministériu no institusaun implementadór sira kona-ba disponibilidade fundu no sistema hodi sira bele ezekuta ona orsamentu fundu Covid-19.

“Bai-bain iha orsamentu normál Ministériu Finansas fahe pakote orsamentu depois aprovadu. Termus ida ohin ita uza bolu notifika ka halo notifikasaun ba ministériu sira katak, fundu ne’e prontu ona enkuadra ona iha sistema entaun ministériu no institusaun sira bele ezekuta ona orsamentu”, esplika Sekretáriu Tékniku Jestaun Fundu Covid-19 (STJFC) Januario da Gama.

Sekretariadu tékniku ne’e mós reforsa tan, husi fundu ne’ebé maka disponivel ona iha sistema atu ezekuta hatene ona aprovasaun husi Parlamentu Nasionál ho montante ho $ 150 millaun. Depois Ministériu no institusaun implementadór sira halo sira nia planu atividade no submete ba iha Sentru Intregadu Jestaun Krize (SIJK) no konsege formula impelementa liuhusi progama importante tolu. Programa primeiru maka prevensaun no mitigasaun Covid-19 nia montante orsamentu hamotuk $ 125.9 millaun ho nia sub-programa hamotuk 10. Segundu programa maka aumenta sustentavel produsaun liga ba produtividade ho nia alokasaun orsamentu hamotuk $ 4.9 millaun no Programa terséiru maka asesu produtu alimentasaun servisu ho nia alokasaun orsamentu $ 19.1 millaun.

“Husi programa ida terséiru ninian, atu halo akizasaun fo’os hodi halo intervensaun ba merkadu no halo apoiu humanitáriu karik efeitu husi moras Corona halo ita nia komunidade presiza hetan tulun ho akisisaun fo’os”, hateten Sekretariadu Tékniku.

Relasiona ho progama sira iha leten, halo alokasaun orsamentu ba iha ministériu no instituisaun sira hamotuk 13; primeiru tuir lei ne’ebé aprova iha Parlamentu Nasionál iha kabimentu $ 50 millaun ba Parlamentu Nasionál, Gabineti Primeru Ministru $ 1.6 millaun, Sekretariadu Komunikasaun Sosiál $ 2.07 millaun, Ministériu Agrikultura no Peskas $ 4.5 millaun, Ministériu Negosiu Estranzeiru $ 2.4 millaun, Ministériu Finansas $ 9 millaun, Ministériu Saúde $ 52.4 millaun, Ministériu Solidaridade Sosiál no Inkluzaun $ 15 millaun, Ministériu Turismu Komersiu Industria $ 6 millaun.

Iha sorin seluk aloka mós ba ita nia seguransa Forsa Falentil Defeza Timor-Leste (F-FDTL) $ 12.5 millaun, Policia Nasionál Timor-Leste $ 670 millaun, Sentru Nasionál Logistika $ 19.1 millaun, Sentru Integradu Jestaun Krize $ 34.5 millaun.

“Alokasaun sira ohin temi ba iha ministériu no instituisaun sira ne’e kontribui hotu ba programa no atividade ba iha prevensaun no mitigasaun Covid-19 ninian”.

Nune’e mós Sekretáriu Tékniku Jestaun Fundu Covid-19 (STJFC) Januario da Gama esplika husi notifikasaun sira ne’ebé ohin halo ho ninia SOP ohin distribui ona no esplika kona-ba ninia prosesu ba ministériu no institusaun. Primeiru sira prepara ona sira nia planu ezekusaun, planu despezas no atividade husi programa no sub-programa ne’ebé integra ona iha sistema. Ho nune’e bele asegura katak, ezekusaun husi ministériu no institusaun sira tenki konsistente nafatin ho planu originál ne’ebé hetan ona aprovasaun husi Komisaun Interministériál no Konsellu Fundu.

Ida segundu Ministériu Finansas liuhusi Sekretariadu Tékniku sei koordena ministériu no institusaun sira para bele loke konta bankaria ida. Atividade no desepezas sira ne’ebé ezekuta ho forma osan adiantamentu sira tenki loke konta bankaria para Ministériu Finansas transfere osan adiantamentu ne’e ba konta bankaria operasionál ministériu no instituisaun ida-idak nian.

“Agora iha situasaun Covid-19 ninian Ministériu Finansas transfere osan adiantamentu ba konta bankaria operasionál ministériu no instituisaun ida-idak no sira nia finansas maka sei foti osan hodi finansia sira nia atividade ne’ebé ho forma adiantamentu”’.

Ohin lista ministériu ho nia orsamentu ne’ebé aprezenta ne’e enkuadra ona iha sistema, mais iha implementasaun depende ba nesesidade husi ministériu sira. Karik pedidu ruma tama maka la prense rekezitus Sekretariadu Tékniku sei rekomenda ba konsellu jestaun hodi halo aprovasaun hodi bele inisia uluk nesesidade sira ne’ebé tama ba prioridade.

Sekretáriu Tékniku Jestaun Fundu Covid-19 (STJFC) Januario da Gama informa tan katak, Konsellu Jestaun sei halo aprovasaun iha 1 Maiu 2020. iha períodu loron 2 ka 3 depois Konsellu Ministru aprova, Sekretariadu Tékniku liuhusi Diresaun Jerál Tesouru (DJT) sei halo kriasaun sistema ba CPV no PRT para bele halo pagamentu no sira ne’ebé adiantamentu, bele transfere ba konta bankaria ministériu sira. Ida ne’ebé através prosesu aprovizionamentu ita sei delega ba ministériu no institusaun sira para bele halo prosesu to’o iha faze ida expenditure ka pedidu pagamentu maka sira haruka mai Ministériu Finansas, atraves tékniku para bele halo pagamentu.