• Sosializa Fundu Petrolíferu ba komunidade sira iha área rural

Home » Anúnsiu » Sosializa Fundu Petrolíferu ba komunidade sira iha área rural Imprime pájina

Sosializa Fundu Petrolíferu ba komunidade sira iha área rural

Unidade Administrasaun Fundu Petrolíferu (UAFP) – Ministériu Finansas, tuir konvite husi Konsellu Konsultivu Fundu Petrolíferu (KKFP), no akompania mo’os husi Autoridade Nacional do Petróleo (ANP) no Extractive Industry Transparency Initiative (EITI) – Minitériu Petróleo no Rekursu Mineral, halao sosializasaun konaba Fundu Petrolíferu ba komunidade sira iha área rural.

Sosializasaun hirak ne’e hahú ho estudante universitáriu sira husi Universidade Dili (UNDIL) iha loron 22 Maiu 2015, hafoin kontinua ba komunidade sira iha postu-administrativu sira  tolu hanesan Fohorem-Suai (27 Maiu), Maubisse-Ainaro (28 Maiu) no Turiscai-Manufahi (29 Maiu).

Panelista sira husi kada entidade aprezenta tópiku sira mesak oin-oin. KKFP fo introdusaun jerál konaba razaun estabelese Fundu Petrolíferu no ninia papél no responsabilidade sira tuir Lei Fundu Petrolíferu.

ANP koalia liu konaba kontratu fahe produsaun iha kampu rua Bayu-Undan no Kitan, inklui mo’os oinsá fahe reseita petrolífera no taxa. EITI foka liu ba asuntu transparénsia. Sira haré liu ba oinsa verifika reseita sira ne’ebé kompania mina sira selu no Governu simu.

UAFP, ne’ebé reprezenta husi Sra. Olga Inés da Conceição, aprezenta tópiku komprehensivu hanesan objetivu estabelese Fundu Petrolíferu, reseita atual no projeitada, balansu Fundu Petrolíferu, retornu investimentu, oinsá Fundu Petrolíferu fo benefisiu ba povu, mekanizmu Fundu Petrolíferu, polítika fiskal Fundu Petrolíferu, Rendimentu Sustentável Estimativa (RSE), enkuadramentu governasaun, prosesu foti desizaun investimentu, polítika investimentu Fundu Petrolíferu, evoluasaun estratejia investimentu no planu ba oin.

Komunidade sira hatudu sira ninia estuziasmu bo’ot tebes-tebes ba programa sosializasaun hirak ne’e. Maibé iha sira nia pergunta sira, sira preokupa liu konaba utilizasaun ka implementasaun rekursu sira. Sira preokupa konaba falta infraestrutura bázika iha sira nia rain no kualidade infrastrutura sira ne’ebé a’at tebes, ne’ebé, tuir sira, bele fo ameasa ba sustentabilidade Fundu Petrolíferu ne’e rasik.