• Sosializasaun Rezime Kontributivu Seguransa Sosiál

Home » Announcements » Sosializasaun Rezime Kontributivu Seguransa Sosiál Print Page

Sosializasaun Rezime Kontributivu Seguransa Sosiál

media

Ministériu Solidaridade Sosial (MSS) hala’o sosializasaun konaba Rezime Kontributivu Seguransa Sosiál ba Funsiunariu hotu Ministériu Finansas nian iha Auditorium Torre Ministériu Finansas, Aitarak Laran (16/06/2017).

Seguransa sosiál nu’udár diréitu umanu fundamentál tuir Deklarasaun Universál dos Diréitus Humanus iha artigu 24. Liu husi deklarasaun ne’e, Estadu Timor-Leste konsagra kedas direitu ida ne’e iha Konstituisaun Repúblika Demokrátika de Timor-Leste (RDTL) artigu 56 ne’ebé iha pontu ida hateten katak sidadaun hotu-hotu iha diréitu ba seguransa no asistensia sosiál tuir lei no kna’ar Estadu nian.

Tuir Sra. Antónia Carmen da Cruz hanesan Oradora husi Diresaun Nasionál do Rezime Kontribuitiva Seguransa Sosiál hateten katak “Estadu iha obrigasaun atu bele promove no organiza seguransa sosiál tuir lei hodi haktuir ba direitu konstituisionál ida ne’ebé Estadu organija. Sistema protesaun sosiál ne’e rasik fahe ba parte sira hanesan seguransa sosiál no pilar seguransa sosiál rasik fahe ba parte rua mak hanesan seguransa sosiál kontribuitiva no seguransa sosiál da sidadania non kontribuitiva. Non kontributivu ne’e ita hala’o tia ona hafoin iha asistensia sosiál. Pilar ida tan maka servisu sosiais liu husi seguransa sosiál desde restaurasaun independensia ita foin maka atu iha seguransa sosiál ho rezime foun kontributiva”.

Ita hotu hatene katak Lei No. 12 /2016, 14 de Novembru kona-ba Rejime Kontributiva Seguransa Sosiál foin mak atu implementa tanba nia regulamentu sira foin maka promulga iha 19 Maiu 2017 foin lalais ne’e husi Eis presidente da Repúblika molok atu husik nian kna’ar. Desde tinan 2008 governu dezenvolve no implementa ona asaun protesaun sosiál, programa no medidas protesaun sosiál lubuk liu husi pilar asistensia sosiál, esplika Sra. Carmen.

Nia akresenta, “pilar sira ne’ebé governu implementa ne’e ninia objetivu mak atu proteje sidadaun sira ne’ebé iha situasaun vulnerável ka kiak, liu husi fornesimentu apoiu osan ka sasan sira bazeia ba avaliasaun ka asaun fornesimentu nian. Objetivu ida tan maka atu bele kombate kiak liu husi osan ne’ebé mai husi Orsamentu Gerál do Estadu. Ho nune’e mós servisu sosiál desde I Governu Konstituisionál to’o VI Governu Konstituisionál desponibiliza prestasaun de servisu ba populasaun em geral liu husi fasilidade públiku gratuita iha aréa de saúde no edukasaun. Iha tan programa balun hanesan protesaun sosiál liu husi ONG nasionál no internasionál sira ba halo programa protesaun kona-ba labarik iha risku no vítima violensia doméstika”.

Rejime ne’e funsiona ho kontribuisaun trabalhador no entidades empregadores sira tantu husi seitór privadu no seitór públiku, ho nune’e hodi kontribui osan ba karteira komum ida no karteira komum ida ne’e sei la jere hamutuk ho Orsamentu Gerál do Estadu nian. Bazeia ba Dekretu Lei No. 12 /2016, 14 de Novembru, trabalhador sei kontribui 4%, no entidadades empregadores sei kontribui 6%. Atu jere osan ne’e Ministériu Finansas iha ona akordu ho Ministériu Solidariedade Sosiál hodi kria konta ketak ida ne’ebé sei jere husi Ministériu Solidariedade Sosiál.

Osan ida ne’e sei uza hodi selu ba subsidius atuál jerasaun trabalhadores sira nian wainhira hasoru situasaun iha risku nia laran no mós selu pensaun ba ita nia jerasaun dahuluk sira ne’ebé reforma. Ezemplu husi benefísiu ba jerasaun agora mak sei selu subsídiu ba inan-feton sira wainhira foti lisensa maternidade. Durante foti lisensa, funsiunariu refere sei kontinua simu nia salariu selu husi seguransa sosiál, la’os husi salariu ne’ebe iha OGE. Ho nune’e, entidades empregadores bele uza fali orsamentu alokadu ba ninia salariu hodi emprega fali trabalhador seluk temporariamente hodi kontinua servisu.

Iha implementasaun tinan dahuluk, kontribruisaun husi trabalhadores no entidades empregadores sei barak teb-tebes duke benefisiáriu no ema ne’ebé tama ba reforma. Nune’e, sei iha fundu rezerva ida hodi jere osan restu ne’ebé iha. Atu garantia sustentabilidade wainhira fundu rezerva ne’e komesa menus mak sei hasa’e taxa selu kontribuitiva nian iha futuru.

Iha sosializasaun rejime kontribuitivu seguransa sosiál ida ne’e hetan partisipasaun másimu husi diresaun sira hotu ne’ebé maka hamahan a’an iha Ministériu Finansas nia okos.