• Teste Avaliasun Importante Tebes ba Funsiunario Sira Nia Koñesimentu

Home » Anúnsiu » Teste Avaliasun Importante Tebes ba Funsiunario Sira Nia Koñesimentu Imprime pájina

Teste Avaliasun Importante Tebes ba Funsiunario Sira Nia Koñesimentu

Aileu, 9 Outubru 2018, Diresaun Jerál Estatístika (DJE) servisu hamutuk ho Unidade Rekursu Humanus (URH) Ministériu Finansas halo teste avaliasaun ba funsiunáriu kazuais nain 5 ne’ebé durante tinan barak ona servisu iha Estatístika Munisípiu Aileu.

Tuir Ofisial Dezenvolvimentu Rekursu Humanus, Serafin Tilman hateten katak objetivu hosi avaliasaun ida ne’e foka liu ba funsiunáriu kazuais sira ne’ebé maka rekrutadu hosi Diresaun Jerál Estatístika (DJE) sira hamutuk 72 pessoas iha 12 munisípiu la inklui RAEOA.

“Ohin ita avalia ba sira nain 5 iha munisípiu Aileu no sira nia kontratu ne’ebé maka sei termina iha 31 de Dezembru tinan ida ne’e, tanba ne’e maka liuhosi avaliasaun ida ne’e posibilidade atu bele halo extensaun ba sira nia kontratu. Hare’e ba kontratu atual ne’ebé maka iha, sira ita bolu hanesan ajente administrativu, liuhosi avaliasaun ida ne’e maka bele difini lolos sira nia estatuto”, katak Serafin.

“Avalisaun ida ne’e la’os atu termina kontratu maibé, avaliasaun ida ne’e atu hare’e kona-ba dezempeñu servisu, karik seidauk diak ita presija hadia. Tanba servisu Diresaun ou Ministériu nafatin presija sira nia apoiu. Liuhosi avaliasaun ida ne’e atu ajuda mós diresaun no ministériu hodi hare’e sa apóiu mak sira presiza hodi kapasita liutan sira hodi halo servisu ne’ebe eziste iha munisipiu”, nia salienta.

Hosi Unidade Rekursu Humanus Ministériu Finansas fó apoiu mai Diresaun Jerál Estatístika atu bele asegura partisipasaun avaliasaun ida ne’e envolve parte sira hotu-hotu liu-liu Ministériu Finansas bele apár ho prosesu tomak liga ho kontratu sira.

Iha sorin seluk tuir Tuir Xefi Unidade munisípiu Estatístika (UME), Maria do Carmo Moreira katak, teste avaliasaun ida ne’e para bele hatene to’o iha ne’ebé lo’os funsiunáriu kazuais sira nia koñesimentu ou ablidade iha área estatístika ninian. No ida ne’e hanesan prosedimentu ida ita tenki avalia fila-fali hodi nune’e bele aumenta sira nia kapasidade liu-liu liga ho sira nia servisu. avaliasaun ida ohin diferente no rigorozu, tanba ita involve mós Unidade Rekursu Humanus hosi Ministériu Finansas no ida ne’e la hanesan tinan kotuk.

“Avaliasaun utiliza tipu 3 mak hanesan primeiru, avalia informasaun jerál kona-ba administrasaun nian, segundu mak prátika komputadór atu nune’e ami mós bele hatene liutan sira nia abilidade kona-ba utilizasaun komputadór iha sira nia servisu fatin no terseiru ami aplika teste elektrónika ka on line test no matérial jerál sira liga ho Diresaun Jerál Estatístika nia servisu loron-loron ne’ebé sira hala’o”, tenik Xefi Unidade ne’e.

Hatan ba estatutu funsiunáriu kazuais sira nian, Xefi ne’e informa agora esforsu hela hosi Diresaun Jerál Estatístika no Rekursu Humanus Ministériu Finansas para atu hatene sira nia estatutu oinsa no sira ne’e konsidera hanesan ajente administrasaun públika ou sira sei hanesan funsiunáriu kazuais. Ita hare’e ba sira nia kontratu ita bele dehan ajente administrasaun públika maibé, dalaruma sira mós tenki prense kriteria ne’ebé fó sai hosi funsaun públika. Espera katak iha tempu badak sira nia estatutu ida kazuais ne’e bele muda ba ajente administrativu finansas públiku nian.

Relasiona ho avaliasaun refere tuir Lucia da Costa hanesan funsiunáriu kazuais munisípiu Aileu hateten, avaliasaun ida ohin importante tebes ba ami nain hira ne’ebé maka hanesan funsiunáriu kazuais no ami espera ami nia kontratu bele aumenta tan hodi nune’e ami bele fó apoiu ba atividade Diresaun Jerál Estatístika iha munisípiu Aileu.

Funsiunáriu kazuais sira ne’e hahú kontratu iha sensus 2015 no depois de hare’e ba volume servisu iha estatístika katak iha atividade balun presija tebes funsiunáriu kazuais sira atu bele halo, tanba ne’e Diresaun Jerál Estatístika hare’e ba termu kontratu katak sira bele kontinua kontratadu ba servisu serves nian no iha atividade refere kobre to’o iha nivel aldeia, tanba ne’e presija funsiunáriu kazuais atu servisu.