• Governu Timor-Leste liu husi Ministériu Finansas assina konkordansia empresstimu ho Banku Dezenvolvimentu Asean (ADB)

Home » Anúnsiu » Governu Timor-Leste liu husi Ministériu Finansas assina konkordansia empresstimu ho Banku Dezenvolvimentu Asean (ADB) Imprime pájina

Governu Timor-Leste liu husi Ministériu Finansas assina konkordansia empresstimu ho Banku Dezenvolvimentu Asean (ADB)

Dili, 22 Dezembru 2016, Governu Timor-Leste liu husi Ministériu Finansas assina ona konkordansia ida ho Banku Dezenvolvimentu Asean (ADB) konaba empresstimu hodi finansia konstrusaun Estrada nasional estrada husi Manatuto tó Baucau iha Knowledge Centre, Edifisiu Ministériu Finansas.
Konkordansia ne’e assina husi Ministra Finansa, Sra.Santina J. R. F. Viegas Cardoso no Oficial Designado Responsável ba Misaun Residensia ADB iha Timor-Leste, Sr. Richard Phelps no partisipa husi Vice Ministru Finansa, Sr. Helder Lopes, Ministru Obras Públikas, Transporte no Telekomunikasaun, Sr. Gastao de Sousa, Xefe Representatixa JICA, Sr. Hikoyuki Ukai no mos funsiunariu husi Ministériu Finansas, ADB no JICA.
Vice Ministru Finansa, Sr. Helder Lopes hatete, “total empresstimu husi ADB hamutuk 49, 6 miloens no total valor ba projetu ne’e hamutuk 59 miloens ho nune’e Governu Timor-Leste tenki aumenta tan osan balun hodi kompleta total valor osan projetu ne’e”.
“Konstrusaun Estrada husi Manatuto to Baucau tama ba prioridade Governu Timor-Leste nian atu kompleta Estrada husi fronteira, Batugede tó Com ne’ebe mak hanaran Northern Corridor” nia hatutan.
Vice Ministru esplika katak, wainhira ita halo empresstimu, iha persepsaun balun dehan ita kria tusan ba jerasaun foun. Hau presija esplika katak, assinatura konkordansia ne’e ho objetivu katak osan ne’e baratu ho hanoin katak ita foti osan husi fundu petroliferu, ita sei lakon nia funan ne’ebe mak hetan husi investimentu petroliferu kompara ho funan ou osan ne’ebe mak ita atu selu ba empresstimu ne’e, ho nune’e governu hanoin atu halo empresstimu hodi finansia projetu ne’e.
Total empresstimu ne’ebe assina ona husi governu agora daudaun hamutuk 370 miloens, ne’e sei ki’ik liu kompara ho Produtu Internu Bruto. Governu halo ona analiz katak wainhira ita halo empresstimu ho hanoin katak ita sei bele selu fali empresstimu ne’e ho aktividades reseitas ekonómiku. Nune’e, ita hare ba rasio empresstimu no nivel sustenabilidade ita bele selu fila fali, no wanhira governu halo empresstimu sempre hare ba existensia kapasidade ne’ebe mak governu iha.
Servisu Ministériu Finansas nian mak atu buka osan hodi finansia implementasaun projetu ne’e no implementasaun projetu ne’e sei tau matan husi Ministériu Obras Públikas, Telekomunikasaun no Transporte (MOPTC) ho planu servisu ne’ebe mak assina ona.