• Ministériu Finansas no IFC servisu hamutuk hodi suporta reforma Aduaneira

Home » Anúnsiu » Ministériu Finansas no IFC servisu hamutuk hodi suporta reforma Aduaneira Imprime pájina

Ministériu Finansas no IFC servisu hamutuk hodi suporta reforma Aduaneira

International Financial Corporation (IFC), husi Grupu Banku Mundial, asina akordu ida ho Ministériu Finansas iha loron 12 Maiu 2015 iha Sentru Treinamentu Ministériu Finansas. Akordu refere asina husi Sra. Norberta Soares, Direitora Jeral Servisu Korporativu, Ministériu Finansas no Sra. Melissa Day, Reprezentante Rezidensia, IFC.

Akordu ida ne’e hanesan kontinuasaun husi suporta hirak ne’ebé durante ne’e IFC fornese ba Direisaun Jeral Alfândega. Suporta ida ne’e sei kontribui ba hadiak kolesaun reseitas, deteta sasán elísitu sira ne’ebé atravesa fronteira no harii no hametin komunidade nia fiar ba iha funsiunalizmu públiku. Objetivu ida ne’e refleta prioridade Governu nian hodi kontinua reforma sistema tributaria atu nune’e bele hadiak balansu finanseiru nasaun nian no halibur barak liu tan reseitas doméstikas.

Akordu refere mo’os sei foo benefisiu bo’ot ein termu estabelesimentu no dezenvolvimentu Kódigu Aduaneiru Konsolidadu, tarifa foun Aduaneira, modelu negósiu ida simplifikadu hodi hamenus duplikasaun no fornese servisu sentralizadu no hadiak abilidade analítiku intelejensia funsiunariu Aduaneira sira nian.

Sra. Melissa, iha ninia intervensaun, hateten katak reforma Aduaneira  nuda’ar “prioridade seitor privadu” no Akordu ida ne’e sei kontribui ba “administrasaun Aduaneira ida efetivu”, ne’ebé sei “distingi Timor-Leste husi nasaun seluk, hadiak ninia kompetitividade, hamenus kustu sasán sira tama mai” no halo Timor-Leste “fatin ida atrativu ba investimentu” no buat sira ne’e hotu sei “foo benefisiu ba povu Timor-Leste”.