• Ministériu Finansas organiza indusaun da-ruak ezame diagnóstiku Jestaun Finansa Públika

Home » Anúnsiu » Ministériu Finansas organiza indusaun da-ruak ezame diagnóstiku Jestaun Finansa Públika Imprime pájina

Ministériu Finansas organiza indusaun da-ruak ezame diagnóstiku Jestaun Finansa Públika

Sentru Kapasitasaun Jestaun Finansa Públika (SKJFP), Ministériu Finansas, halao sesaun indusaun durante ba loron rua husi 28-29 Maiu 2015. Sesaun hirak ne’e koalia konaba Preparasaun no Regras Ezame ba ezame diagnóstiku Jestaun Finansa Públika (JFP), ne’ebé sei halao iha loron 24 no 25 Juniu 2015 iha Sentru Konvensaun Dili.

Indusaun da-ruak ida ne’e halao iha Delta Nova, Dili, Timor-Leste no atende husi profesional JFP nain 1,061, ne’ebé kompostu husi Direitor Jerál, Direitor Nasional, Xefe Departamentu/Sesaun no mo’os funsiunáriu sivil sira husi orgaun estadu 29, inklui sira ninia ajénsia sira.

Sr. Alberto Alves Piedade, koordenador SKJFP, iha ninia prezentasaun aprezenta sumáriu konaba informasaun hotu iha Indusaun da-huluk no regra no regulamentu sira ba ezame diagnóstiku. Iha sesaun lima ne’ebé maka sei teste iha Ezame Diagnóstiku inklui (1) Planeamentu, (2) Orsamentu, (3) Aprovizionamentu no Jestaun Kontratu, (4) Jestaun Patrimóniu no (5) Pagamentu. Ba área JFP sira ne’ebé espesializada hanesan Reseita Tributária, Alfândega, Auditoria no Estatístika sei halao iha tinan 2015 ninia rohan.

Sr. Alberto mo’os fo klarifikasaun konaba Padraun Prosedimentu Operasional ne’ebé foin dezenvolve no esbosu polítika ida rigorozu hodi asegura prosesu profesional ida ba Teste ida ne’e tuir Padraun Nasional. Teste JFP ida ne’e maka ezame nivel nasional ida, tan ne’e presiza regras no regulamentu ne’ebé forte hodi garantia kredibilidade no akuntabilidade Ministériu Finansas nian hanesan instituisaun ida ne’ebé responsabiliza ba ezame ida hanesan ne’e iha Governu Timor-Leste.

Sr. Alberto mo’os temin importánsia husi prosedimentu ezame ida transparente no justu no nia nakloke ba sujestasaun no rekomendasaun konstrutivu sira. Sei estabelese komisaun rua – Komisaun Rekursu no Komisaun Integridade ne’ebé maka sei hatan ba kualker rekursu no asuntu sira iha relasaun ho ezame iha futuru.

Iha aprezentasaun loron rua ne’e nia rohan, Sr. Alberto aprezenta Padraun Kompeténsia JFP iha lian Tetum no kopia husi dokumentu ida ne’e sei haruka ba partisipante sira hotu.