• Banku Mundial fo treinamentu “análize rejime fiskal pensaun”

Home » Anúnsiu » Banku Mundial fo treinamentu “análize rejime fiskal pensaun” Imprime pájina

Banku Mundial fo treinamentu “análize rejime fiskal pensaun”

Banku Mundial foin lalais ne’e fo treinamentu durante semana ida konaba “análize rejime fiskal pensaun” ba ofisial sira Governu nian husi Ministériu Finansas no Ministériu Solidariedade Sosial. Treinamentu refere realiza husi Sigunda, 26 to’o Sesta, 30 Janeiru 2015 iha Sentru Treinamentu Ministériu Finansas.

Treinamentu ida ne’e, ne’ebé fornese husi treinador sira Banku Mundial, foka liu ba iha Pension Reform Options Simulation Toolkit (PROST) – sistema informátiku ida hodi halo simulasaun ba sistema pensaun. Sistema ida ne’e dezeñadu hodi halo estimasaun ba tendênsia futura sistema pensaun ba tempu naruk, inklui kobertura pensaun, kontribuisaun, benefísiu, fluxu finánseiru, no teste sistema ninia robustez ba surpreza sira (hanesan demográfika no ekonómika) no avalia no kompara opsaun sira hodi promove desizaun informada.

Sistema ida ne’e bele prodús projesaun demográfiku, sistema demográfiku pensaun, sistema finansiamentu pensaun no rezultadu individual sira seluk.

Iha kontektu Timor-Leste nian, treinamentu ida ne’e relevante tebes-tebes tamba “nia foka liu pensaun ka Rejime Siguransa Sosial ne’ebé foin lalais ne’e propoin ona”.

Timor-Leste laos nasaun primeiru ne’ebé aprende konaba sistema ida ne’e. Nasaun membru liu sia-nulu (90) maka uza tiha ona sistema ida ne’e. Sira uza hodi estuda impaktu krizi finanséiru ba sistema pensaun tipu oin-oin, dívida implísita pensaun, no kompara resultadu teste husi sistema ne’e ho modelu OIT nian no modelu aktuarial sira seluk.

Treinamentu semana ida ne’e remata ho seremonia entrega sertifikadu ba partisipante selesionadu nain sanulu resin tolu (13) husi Direisaun Nasional Polítika Ekonómika Ministériu Finansas no Ministériu Soliedaridade Sosial .