• Timor Leste hahu’u ona Sensus Agrikola 2019

Home » Anúnsiu » Timor Leste hahu’u ona Sensus Agrikola 2019 Imprime pájina

Timor Leste hahu’u ona Sensus Agrikola 2019

Ekipa tékniku kompostu hosi Ministériu Finansas no Ministériu Agrikultura no Peskas ofisialmente lansa ona Sensus Agrikola “Hau Nia Resposta, Hau Nia Futuru” Dahuluk iha Edifisiu Ministériu Agrikultura no Peskas, loron 13 Agustu 2019.

Rezultadu hosi Sensus Agrikola sei ajuda Governu Timor-Leste hodi hatene dadus lolos kona-ba estrutura kada uma kain agrikultór nian. Nune’e ho dadus hirak ne’e sei ajuda governu no parte intevinientes sira hodi elabora polítika no programas setór agrikola tuir prioridades prinsipal hosi Planu Estratéjia Dezenvolvimentu Nasional (PEDN) 2011-2030.

“Bazeia ba razaun fundamental sira ne’e maka iha tinan 2019, governu tau planu iha ita nia orsamentu 2019 hodi bele implementa Sensus Agrikola. Komisaun tékniku sira hahu kedas iha tinan 2017 halo preparativus no esforsu ne’ebé diak tebes nune’e ohin ita bele halo lansamentu no sei realiza Sensus Agrikola tuir padraun Internasional iha teritóriu tomak.” Hateten Vise Ministra Finansas no Ministra Finansas Enzersisiu, Sara Lobo Brites iha diskursu lansamentu Sensus Agrikula 2019.

Ekipa Diresaun Jerál Estatístika hosi Ministériu Finansas hamutuk ho ekipa Ministériu Agikultura no Peskas ne’ebé hetan apoiu hosi FAO (Organizasaun Nasoens Unidas ba Alimentasaun no Agrikultura) antes ne’e halo preparasaun másimu ho entidades relevantes hodi finaliza kestionáriu Sensus Agrikola.

“Aproveita biban ida ne’e kongratula ekipa Diresaun Jerál Estatistika no Ministériu Agrikultura no Peskas no FAO ba ita bo’ot sira nia esforsu bele halo realidade ne’e hahu ohin” hateten Vise Ministra Finansas, Sara Lobo Brites.

Dadus hosi Sensus Agrikula sei ajuda mos kona-ba realizasaun peskizas sétor agrikltura ho nune’e prosesu akompañamentu ba moris vida agrikultura iha Timor Leste bazeia duni ba situasaun real ne’ebé mak hasoru hosi agrikultor sira. Iha parte seluk,ajuda mos governu hodi hadia produsaun alimentar, produsaun pekuaria, hortikultura, floresta no peskas.

Iha okaziaun ne’e mos Vise Ministra Finansa, Sara Lobo Brites apela ba povu Timor Leste tomak hodi pro-ativu atu hola parte iha Sensus Agrikula 2019.“Hau hakarak hato’o ba inan aman uma kain agrikultór sira iha teritóriu Timor laran tomak. Atu kontribui ita bo’ot sira nia resposta iha Sensus Agrikultura, “Hau Nia Resposta Hau Nia Futuru Hola Parte Ba”.

Sensus Agrikula 2019 sei kobre teritóriu tomak inklui RAEAO no sei remata iha loron 12 Outubru 2019