• Timor-Leste ho Austrália Asina MoU Partnerships for Infrastructure (P4I)

Home » Announcements » Timor-Leste ho Austrália Asina MoU Partnerships for Infrastructure (P4I) Print Page

Timor-Leste ho Austrália Asina MoU Partnerships for Infrastructure (P4I)

Díli, 20 Dezembru 2021 – Ministru Rui Gomes no Embaixadór Austrália, Peter Roberts asina Nota Intendimentu Programa Parseria ba Infraestrutura (P4I, sigla Inglés) ne’ebé sei serve hanesan instrumentu ida ba Timor-Leste atu asesu ba apoiu husi P4I ba atividades dezenvolvimentu infraestrutura iha futuru.

Asinatura Nota Intendimentu ne’e marka pasu importante ida tan iha kooperasaun entre Timor-Leste no Austrália hodi determina futuru dezenvolvimentu infraestrutura Timor-Leste, hahú husi Projetu Espansaun Aeroportu Internasionál Prezidente Nicolau Lobato ne’ebé sei komesa tinan oin.

Projetu espansaun Aeroportu ho nia fasilidade sira sei ajuda Timor-Leste kumpre padraun seguransa internasionál no fasilita Timor-Leste ninia adesaun ba organizasaun globál no rejionál hanesan WTO no ASEAN. Projetu ne’e sei mellora país nia konektividade, fó efeitu transformativu ba ekonomia liuhusi impulsiona setór turizmu no setór ekonómiku sira seluk liuhusi estabelese ligasaun aviasaun ne’ebé di’ak ho sidade ka kapitál boot sira iha Aziátiku.

Serimonia assinatura Nota Intendimentu ne’e hatudu sinál di’ak husi Austrália nia partisipasaun hodi ajuda país viziñu hanesan Timor-Leste atu ultrapassa problema estruturál boot ida hanesan infraestrutura, no ajuda mós Timor-Leste dezenvolve no moderniza hodi bele liberta aan husi estatutu 𝐿𝑒𝑎𝑠𝑡-𝐷𝑒𝑣𝑒𝑙𝑜𝑝𝑒𝑑 𝐶𝑜𝑢𝑛𝑡𝑟𝑖𝑒𝑠.

Partisipa iha serimónia asinatura ne’e ekipa Tékniku sira husi Diresaun Jerál Jestaun no Mobilizasaun Rekursu Esternu, Ministériu Finansas. ***