• Timor-Leste lansa Relatóriu dahuluk ba Levantamentu Nasionál kona-ba Traballu Infantíl no Relatóriu Mini-Levantamentu Forsa Traballu 2016

Home » Anúnsiu » Timor-Leste lansa Relatóriu dahuluk ba Levantamentu Nasionál kona-ba Traballu Infantíl no Relatóriu Mini-Levantamentu Forsa Traballu 2016 Imprime pájina

Timor-Leste lansa Relatóriu dahuluk ba Levantamentu Nasionál kona-ba Traballu Infantíl no Relatóriu Mini-Levantamentu Forsa Traballu 2016

20191007_Timor-Leste lansa Relatóriu dahuluk ba Levantamentu Nasionál kona-ba Traballu Infantíl no Relatóriu Mini-Levantamentu Forsa Traballu 2016 1

Governu Timor-Leste halo pasu ida importante iha nia esforsu atu halakon traballu infantíl iha nia forma hotu-hotu, liuliu forma aat liu hosi traballu infantíl ho lansamentu no publikasaun Relatóriu Analítiku hosi Levantamentu Nasionál kona-ba Traballu Infantíl iha Timor-Leste 2016. Ida dahuluk hosi tipu relatóriu ne’e, Relatóriu Traballu Infantíl ne’e mak lansa hamutuk ho Mini-Levantamentu Forsa Traballu 2016 iha loron 7 Outobru 2019 iha Dili, Timor-Leste.

Levantamentu Traballu Infantíl 2016 halo tiha liuhosi Diresaun Jerál Estatístikas, Ministériu Finansas Timor-Leste no Sekretariadu Estadu ba Formasaun Profisionál no Empregu ho apoiu tékniku hosi Organizasaun Internasionál ba Traballu (ILO). Apoiu hosi ILO mak fornese hela iha okos akordu kooperativu sira kona-ba Programa Asaun Globál ba Asuntu Traballu Infantíl (GAP 11) no Projetu Konxiensializasaun kona-ba Sasukat no Engajamentu Polítika atu Aselera Asaun kontra Traballu Infantíl no Traballu Forsadu (MAP 16), finansia liuhosi Estadus Unidus nia Departamentu Traballu.

Relatóriu ida-ne’e mós ligadu ho Ajenda 2030 ba Dezenvolvimentu Sustentável iha okos Objetivu 8.7 ne’ebé ezije ba medida imediatu no efetivu atu halakon traballu forsadu, hapara eskravidaun modernu no tráfiku umanu no mós atu asegura provizaun no halakon forma aat liu hosi traballu infantíl.

“Futuru Timor-Leste hela iha jerasaun futuru nia liman. Labarik sira-ne’e nu’udar ita nia futuru; nune’e Levantamentu Traballu Infantíl ne’e nu’udar instrumentu xave iha implementasaun programa no inisiativa governmentál ne’ebé fasil liu atu sasukat, no bele uza nu’udar instrumentu ida ba melloria sustentável kontinua ba futuru” hateten Ministra Finansas Interina no atual Vise Ministra Finansas, Sara Lobo Brites.

“ILO fó parabens ba esforsu konkretu ne’ebé Governu Timor-Leste halo liuhosi publikasaun Levantamentu Traballu Infantíl importante ne’e. Nia deskoberta xave sira sei krusiál ba dezenvolvimentu ba polítika no programa relevante atu realiza futuru ida lahó traballu infantíl iha rain ida-ne’e,” deklara Diretór País nian hosi ILO ba Indonézia no Timor-Leste, Michiko Miyamoto.

Dadus ne’ebé aprezenta iha Levantamentu Traballu Infantíl ne’e fornese ona komprensaun kle’an liu ba parte-interesada sira-hotu iha rain ne’e kona-ha realidade ba labarik sira ne’ebé servisu, karakterístika sira hosi servisu ne’ebé sira halo, indústria no empregu iha ne’ebé sira hola parte no sira-nia atinjimentu edukasionál. Ho kobertura ba umakain 1.755 hosi munisípiu 13 hotu, deskoberta xave sira inklui:

  • Maizumenus labarik na’in 67.688 (idade tinan 5-17) ka hanesan porsentu 16,1 hela ekonomikamente ativu iha área rurál no urbana sira.
  • Razaun prinsipál tanbasá labarik sira mak ativu ekonomikamente mak atu suplementa sira-nia família nia rendimentu no labarik maioria ne’e servisu ba sira-nia família rasik, tuirfali ho servisu iha plantasaun/to’os/kanteiru.
  • Hosi porsentu 16,1 hosi labarik ne’ebé ativu ekonomikamente, porsentu 12,5 hola parte iha traballu infantíl no maioria hosi sira-ne’e (55,5%) halo servisu perigozu.
  • Hosi populasaun totál labarik, porsentu 83,8 tuir eskola; maibé, labarik sira iha traballu infantíl iha probabilidade menus atu tuir eskola.
  • Maizumenus labarik na’in 43.000 (idade tinan 5-17) mak relata katak sira nunka tuir eskola; entre labarik sira-ne’e na’in 6.455 hola parte iha atividade ekonómiku, na’in 4.901 iha traballu infantíl, no na’in 2.888 halo servisu perigozu.

Durante Levantamentu Traballu Infantíl, dadus adultu ne’e mós rekolla hosi membru seluk iha umakain. Dadus adultu nian fornese dadus xave barak ne’ebé jeralmente rekolla hosi levantamentu forsa traballu konvensionál sira. Mini-Levantamentu Forsa Traballu 2016 ho naran “Levantamentu Forsa Traballu Timor-Leste 2010-2013-2016: Tendénsia prinsipál sira bazeia ba dadus armonizadu” fornese ona série tempu hosi indikadór traballu xave sira durante períodu tinan tolu nia laran, ho objetivu atu analiza evolusaun hosi indikadór forsa traballu prinsipál sira. Deskoberta xave sira inklui:

  • Taxa partisipasaun iha forsa traballu sa’e bá beibeik durante tinan hirak nia laran hosi porsentu 24,0 iha 2010, porsentu 30,6 iha 2013 to’o porsentu 46,9 iha 2016.
  • Proporsaun ema iha empregu-ba-populasaun mós sa’e neineik-neineik hosi porsentu 22,1 iha 2010, sa’e to’o porsentu 27,3 iha 2013, to’o porsentu 42,0 iha 2016.
  • Taxa dezempregu sa’e hosi porsentu 7,8 iha 2010, to’o porsentu 11,0 iha 2013 no tun uitoan to’o porsentu 10,4 iha 2016.
  • Empregu iha agrikultura, floresta no peskas hela hanesan atividade ekonómiku ho númeru aas liu hotu.

“Deskoberta sira hosi Mini-Levantamentu Forsa Traballu 2016 sei kontribui ba baze koñesimentu no fó tulun ba planeamentu no formulasaun polítika nian,” dehan Sekretáriu Estadu ba Formasaun Profisionál no Empregu, Julião da Silva.